បរទេស៖ ប្រធាន FIFA លោក Gianni Infantino បានស្នើសុំនាយករដ្ឋមន្រ្តីអង់គ្លេសលោក Boris Johnson ចំពោះការលើកលែង ក្លឹបនៅ Premier League ដើម្បីអនុញ្ញាតិអោយ កីឡាករបានធ្វើដំណើរសម្រាប់បង្ហាញវត្តមានចូលរួមការប្រកួតជម្រុះ World Cup ២០២២ ជាមួយប្រទេសដែលត្រូវបានចាត់ចូលក្នុងបញ្ជីក្រហម។
ការលើកឡើងនេះគឺបន្ទាប់ពីក្លឹបនៅប្រទេសអង់គ្លេសនិងអេស្ប៉ាញទើបតែបានប្រកាសជាផ្លូវការណ៏ ថាពួកគេនឹងមិនបញ្ចេញកីឡាករដែលកំពុងប្រកបអាជីពនៅលីកកំពូលអឺរ៉ុបទាំងពីរនេះដើម្បីចូលរួម ការប្រកួតនៅក្នុងប្រទេសដែលចាត់ចូលក្នុងបញ្ជីក្រហមឡើយ។ លោក Infantino បានមានប្រសាសន៍ថា“ ខ្ញុំបានស្នើវិធីសាស្រ្តមួយដែលស្រដៀងទៅនឹងដំណាក់កាលចុងក្រោយនៃ Euro 2020 ដែលត្រូវអនុវត្ត។ទោះយ៉ាងណាអ្នកនាំពាក្យរដ្ឋាភិបាលបានបញ្ជាក់ប្រាប់ BBC Sport ថានាយករដ្ឋមន្រ្តីបានទទួលលិខិតនេះហើយនឹងឆ្លើយតបតាមស្ថានភាពជាក់ស្តែង។
គួររំលឹកថានៅក្រោមច្បាប់របស់រដ្ឋាភិបាលចក្រភពអង់គ្លេសកីឡាករ នឹង ខកខានការប្រកួតអស់រយៈពេលមួយចំនួនដោយសារតែត្រូវដាក់ខ្លួនឯងអោយនៅដាច់ដោយឡែករយៈពេល ១០ ថ្ងៃ ក្រោយបញ្ចប់តួនាទីហើយ វិលត្រឡប់មកចក្រភពអង់គ្លេសវិញ។ ក្របខ័ណ្ឌ Premier League បានឆ្លើយតបទៅនិងបញ្ហានេះថាៈសហព័ន្ធនៅតែមានការស្ទាក់ស្ទើរប៉ុន្តែធ្លាប់បានសម្រេចជាឯកច្ឆន្ទថានិងមិនអនុញ្ញាតិអោយកីឡាករទៅចូលរួមព្រឹត្តការណ៏ប្រកួតជម្រុះWorld Cup ២០២២ ។បើទោះបីជាការពិភាក្សាយ៉ាងទូលំទូលាយ បានកើតឡើងជាមួយសមាគមបាល់ទាត់ដែលជាអាណាព្យាបាល និង រដ្ឋាភិបាល ដើម្បីស្វែងរកដំណោះស្រាយ ប៉ុន្តែគ្មានការលើកលែងទេ។ ហើយទីបំផុតសហព័ន្ធកីឡាបាល់ទាត់អង់គ្លេសF Aក៏បានគាំទ្រជំហររបស់ក្របខណ្ឌ Premier League ហើយនឹងមិនអនុញ្ញាតឱ្យកីឡាកររបស់ខ្លួនធ្វើដំណើរទៅកាន់ប្រទេសនានាដែលនៅក្នុងបញ្ជីក្រហមឡើយ៕
ប្រភពព័ត៍មាន៖ BBC
