ម្ចាស់ផ្ទះវៀតណាម បានបញ្ជាក់ពីគោលជំហររបស់ខ្លួនច្បាស់ហើយថា នឹងរៀបចំការប្រកួតស៊ីហ្គេម លើកទី៣១ ឆ្នាំ២០២១ នាពាក់កណ្ដាលខែឧសភា ឆ្នាំ២០២២ ហើយការអះអាងនេះ បានធ្វើឡើងក្នុងកិច្ចប្រជុំក្រុមប្រឹក្សាសហព័ន្ធកីឡាអាស៊ីអាគ្នេយ៍ ស្របពេលដល់ថ្ងៃឱសានវាទ គឺថ្ងៃទី១៨ ខែតុលា ឆ្នាំ២០២១ ដែលវៀតណាម ត្រូវបញ្ជាក់ឱ្យបានច្បាស់ថា នឹងរៀបចំស៊ីហ្គេម ឬក៏អត់? ព្រោះបើវៀតណាម មិនធ្វើទេ គេនឹងលុបស៊ីហ្គេម លើកទី៣១ នេះចោល ជាប្រវត្តិសាស្ដ្រតែម្ដង។
ជុំវិញបញ្ហានេះ លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) ដែលជាអ្នកចូលរួម ក្នុងកិច្ចប្រជុំក្រុមប្រឹក្សាសហព័ន្ធកីឡាអាស៊ីអាគ្នេយ៍ តំណាងឱ្យកម្ពុជា បានថ្លែងថា៖ «គណៈកម្មាធិការជាតិអូឡាំពិកវៀតណាម បានអះអាងថា ស៊ីហ្គេម លើកទី៣១ នឹងត្រូវធ្វើនៅពាក់កណ្ដាលខែឧសភា ឆ្នាំ២០២២ ប៉ុន្ដែមិនទាន់ប្រាកដថ្ងៃនោះទេ គ្រាន់តែប្ដេជ្ញានឹងធ្វើឱ្យបាន នៅពាក់កណ្ដាលខែឧសភា។ ចំពោះពេលវេលាច្បាស់លាស់ វៀតណាម នឹងផ្ដល់លិខិតផ្លូវការដល់បណ្ដាប្រទេសសមាជិក ក្នុងពេលឆាប់ៗនេះ»។
ជាមួយគ្នានេះ កិច្ចប្រជុំរបស់ក្រុមប្រឹក្សាសហព័ន្ធកីឡាអាស៊ីអាគ្នេយ៍ ក៏បានពិភាក្សា និងគាំទ្រកម្ពុជា ក្នុងការធ្វើជាសហប្រធានក្រុមប្រឹក្សាសហព័ន្ធកីឡាអាស៊ីអាគ្នេយ៍ផងដែរ ដើម្បីកម្ពុជា មានសិទ្ធគ្រប់គ្រាន់ ក្នុងការអនុវត្តការងារបច្ចេកទេសផ្សេងៗ ឆ្ពោះទៅធ្វើម្ចាស់ផ្ទះព្រឹត្តិការណ៍ស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ បន្ទាប់ពីប្រទេសវៀតណាម។
«ដោយសារកម្ពុជា នឹងត្រូវធ្វើម្ចាស់ផ្ទះស៊ីហ្គេមដែរ គេនឹងឱ្យកម្ពុជាធ្វើជាសហប្រធានក្រុមប្រឹក្សាសហព័ន្ធកីឡាអាស៊ីអាគ្នេយ៍ នៅក្នុងខែធ្នូ ឆ្នាំ២០២១ ដើម្បីឱ្យកម្ពុជាបានបន្ដការងាររបស់ខ្លួន ដោយផ្លូវការ ពេញសិទ្ធ និងពេញលក្ខខណ្ឌ ក្នុងដំណើរឆ្ពោះទៅការធ្វើម្ចាស់ផ្ទះជាប្រវត្តិសាស្ដ្ររបស់ខ្លួន នាឆ្នាំ២០២៣»។
នេះជាការបញ្ជាក់របស់រដ្ឋលេខាធិការក្រសួងទេសចរណ៍ និងជាអគ្គលេខាធិការគណៈកម្មាធិការជាតិ CAMSOC លោក វ៉ាត់ ចំរើន ហើយលោកបានឱ្យដឹងទៀតថា ទាំងការប្ដេជ្ញាចិត្តរៀបចំស៊ីហ្គេម លើកទី៣១ នាពាក់កណ្ដាលខែឧសភា ឆ្នាំ២០២២ របស់ភាគីវៀតណាម ក៏ដូចជាការឱ្យកម្ពុជា ធ្វើជាសហប្រធានក្រុមប្រឹក្សាសហព័ន្ធកីឡាអាស៊ីអាគ្នេយ៍ សុទ្ធតែទទួលបានការគាំទ្រពីបណ្ដាប្រទេសអាស៊ាន គ្រាន់តែការធ្វើសហប្រធាននេះ ត្រូវរង់ចាំការសម្រេចផ្លូវការរបស់ក្រុមប្រឹក្សាសហព័ន្ធកីឡាអាស៊ីអាគ្នេយ៍ នាខែធ្នូខាងមុខ ដែលគេនឹងអនុម័តផ្ដល់សិទ្ធដល់កម្ពុជា៕
