ក្លិបបាល់ទាត់អគ្គិសនីកម្ពុជា ដែលកំពុងមានវត្តមានលេង នៅលីគកំពូលកម្ពុជា បានសេចក្តីជូនដំណឹងជាសាធារណៈ ដោយបញ្ជាក់ថា ក្លិបនេះ នឹងបើកបង្ហាត់បង្រៀនដោយឥតគិតថ្លៃ ដល់ប្អូនៗយុវជនអាយុក្រោម១៥ឆ្នាំ បន្ថែមទៀត សម្រាប់ឆ្នាំ២០២១នេះ។
តាមការជូនដំណឹងដដែលនេះ បានឱ្យដឹងទៀតថា ក្លិបបាល់ទាត់អគ្គិសនីកម្ពុជា នឹងបើកទទួលពាក្យស្នើសុំហ្វឹកហាត់ សម្រាប់យុវជន ដែលបានដាក់ពាក្យចំនួន៣០០នាក់ដំបូងគេប៉ុណ្ណោះ ហើយយុវជន ដែលមានសមត្ថភាព និងទេពកោសល្យ ក្នុងចំណោមយុវជន ដែលបានដាក់ពាក្យចំនួន៣០០នាក់ នឹងក្លាយជាយុវជនថ្នាល សម្រាប់ក្លិបមួយនេះ ព្រមទាំងមានឱកាស បានចូលរួមការប្រកួតពានរង្វាន់ថ្នាក់យុវជន និងពានរង្វាន់ថ្នាក់ជាតិ នានា។
ជុំវិញការបើកឱកាសមានឱកាសសម្រាប់យុវជន បានហ្វឹកហាត់បាល់ទាត់ ដោយមិនគិតថ្លៃនេះ ក្លិបបាល់ទាត់ ដែលមានគោលការណ៍ប្រើប្រាស់តែកីឡាករខ្មែរសុទ្ធ អគ្គិសនីកម្ពុជា បានបញ្ជាក់ថា គឺដើម្បីចូលរួមអភិវឌ្ឍវិស័យកីឡាបាល់ទាត់ នៅក្នុងព្រះរាជណាចក្រកម្ពុជា ឱ្យមានការរីកចម្រើន ទៅពេលអនាគត។
យ៉ាងណាក៏ដោយ សម្រាប់យុវជន ដែលមានបំណងដាក់ពាក្យចូលរួមហ្វឹកហាត់នេះ ក៏ត្រូវធ្វើទៅតាមលក្ខខណ្ឌរបស់ក្លិបអគ្គិសនីកម្ពុជា ផងដែរ គឺអ្នកនោះ ត្រូវតែជាយុវជនខ្មែរ មានអាយុក្រោម១៥ឆ្នាំ មានកាយសម្បទាមាំមួន (មានកម្ពស់ចាប់ពី ១,៧០ម៉ែត្រ ឡើងទៅ មានអាទិភាពខ្ពស់) ហើយអ្នកទាំងនោះ ត្រូវតែជាអ្នកមានទីលំនៅបច្ចុប្បន្ន នៅរាជធានីភ្នំពេញ ខេត្តកណ្តាល និងខេត្តកំពង់ស្ពឺ៕
