មន្រ្តីជំនាញរបស់សហព័ន្ធកីឡាកាយសម្ព័ន្ធកម្ពុជា លោក ណយ ផាណា បានអះអាងថា ក្រុមកីឡាកាយសម្ព័ន្ធកម្ពុជា នឹងអាចឈានទៅរកឧត្តមភាព និងភាពជោគជ័យ ជូនប្រទេសជាតិ សម្រាប់ការប្រកួតស៊ីហ្គេម លើកទី ៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ បើសិនជា យើងមានលទ្ធភាពបើកវគ្គបច្ចេកទេសគ្រូជំនាញ និងសិក្ខាសាលា ឬធ្វើការបោះជំរំ ឱ្យបានញឹកញាប់ជារៀងរាល់ឆ្នាំ។
លោក ណយ ផាណា បានបញ្ជាក់ថា៖ «បើសិនមានលទ្ធភាពធ្វើការសិក្សាតាមរយៈការបើកវគ្គបច្ចេកទេសគ្រូជំនាញ និងសិក្ខាសាលា ឬធ្វើការបោះជំរំ ឱ្យបានញឹកញាប់ជារៀងរាល់ឆ្នាំ នោះគ្រូបង្វឹក គ្រូជំនួយ និងកីឡាករ កីឡាការិនី កាន់តែមានការយល់ដឹងលើបច្ចេកទេស និងអាចលើកកម្ពស់គុណផលកាន់តែប្រសើរ និងធ្វើឱ្យកីឡាកាយសម្ព័ន្ធកម្ពុជា ឈានទៅរកឧត្តមភាព និងភាពជោគជ័យ ជូនប្រទេសជាតិមាតុភូមិ ជាពិសេស ឆ្ពោះទៅកាន់ការប្រកួតកីឡា ស៊ីហ្គេម លើកទី ៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ»។
ការលើកឡើងបែបនេះរបស់ លោក ណយ ផាណា ត្រូវបានធ្វើឡើង នៅក្នុងពិធីបិទវគ្គបណ្តុះបណ្តាលគ្រូបង្វឹកកីឡាកាយសម្ព័ន្ធ កម្រិត ១ និងបោះជំរំ (Level 1 Class P3+Training Camp) កាលពីព្រឹកថ្ងៃអង្គារ នៅសាលាបឋមសិក្សា សាលាលេខ ៥ ខេត្តកំពង់ឆ្នាំង ដោយវគ្គនេះ ស្ថិតក្រោមកញ្ចប់ថវិកាចំណាយប្រចាំឆ្នាំ របស់ក្រសួងអប់រំ យុវជន និងកីឡា ដែលបានទម្លាក់ជូនសហព័ន្ធកីឡាកាយសម្ព័ន្ធកម្ពុជា ហើយក៏ស្ថិតនៅក្នុងផែនការសកម្មភាពប្រចាំឆ្នាំរបសើសហព័ន្ធនេះ ផងដែរ។
«ផ្អែកតាមផែនការសកម្មភាព ឆ្នាំ ២០២១ របស់សហព័ន្ធកីឡាកាយសម្ព័ន្ធកម្ពុជា សហការណ៍ ជាមួយក្រសួងអប់រំ យុវជន និងកីឡា គឺយើងបានរៀបចំបើកវគ្គបណ្តុះបណ្តាលនេះ ដើម្បីពង្រឹងនូវគុណភាពបច្ចេកទេស ជូនដល់គ្រូបង្វឹកកម្រិត ១ ឱ្យមានការយល់ដឹងកាន់តែប្រសើរ និងត្រៀមលក្ខណៈឱ្យបានល្អ សម្រាប់ចំណេះ ជំនាញមួយនេះ ដើម្បីឆ្ពោះទៅរកភាពជោគជ័យ ក្នុងព្រឹត្តិការណ៍កីឡាជាតិ និងត្រៀមឆ្ពោះទៅរកឧត្តមភាព ក្នុងព្រឹត្តិការណ៍ស៊ីហ្គេម ឆ្នាំ ២០២៣ ជូនជាតិមាតុភូមិ ដែលកម្ពុជាទទួលធ្វើជាម្ចាស់ផ្ទះ»។
អគ្គលេខាធិការសហព័ន្ធកីឡាកាយសម្ព័ន្ធកម្ពុជា លោក ណយ ផាណា បានបន្ថែមថា៖ «ឆ្លងកាត់ការសិក្សានេះ សិក្ខាកាម បានបង្ហាញឱ្យឃើញ អំពីការយល់ដឹងបន្ថែម លើទ្រឹស្តី និងការអនុវត្តជាក់ស្តែងផ្ទាល់ នៃប្រភេទកីឡាកាយសម្ព័ន្ធ គ្រូបង្វឹកកម្រិត ១ នេះ ព្រមទាំងលើកកម្ពស់ នូវកម្រិតសមត្ថភាពបច្ចេកទេស និងដកស្រង់បាន នូវបទពិសោធល្អៗ ថ្មីៗបន្ថែមទៀត ជាពិសេស គឺបានយល់ដឹងអំពីការផ្លាស់ប្តូរច្បាប់ថ្មី ឆ្នាំ ២០២១-២០២៤ ផងដែរ»។
តាមរបាយការណ៍របស់គណៈកម្មការ បានឱ្យដឹងថា វគ្គបណ្តុះបណ្តាល ដែលបានធ្វើឡើងតាំងពីថ្ងៃទី ១ ខែធ្នូ មកនោះ មានសិក្ខាកាម ជាគ្រូជំនាញថ្នាក់មូលដ្ឋាន និងកម្រិត ១ ចំនួន ២២ នាក់ បានចូលរួម ហើយសិក្ខាកាម ដែលមកពីរាជធានីភ្នំពេញ (៤ នាក់) ខេត្តកំពង់ឆ្នាំង (១៣ នាក់) ខេត្តក្រចេះ (៤ នាក់) និងខេត្តកំពង់ចាម (១ នាក់) ទាំងនេះ ទទួលការបណ្តុះបណ្តាលផ្ទាល់ ដោយលោក ណយ ផាណា និងគ្រូជំនួយរបស់សហព័ន្ធ លោក សោ សុផេង។
ឆ្លងកាត់ការសិក្សាទាំងទ្រឹស្តី និងការអនុវត្តជាក់ស្តែងនេះ សិក្ខាកាមទាំង ២២ នាក់ (ស្រី ៦ នាក់) នេះ ត្រូវបានគ្រូឧទ្ទេសវាយតម្លៃ ដោយទទួលបាននិទ្ទេសល្អ ចំនួន ១០ នាក់ ស្មើ ៤៥,៤៥ ភាគរយ និទ្ទេសល្អបង្គួរ ៨ នាក់ ស្មើ ៣៦,៣៦ ភាគរយ និងនិទ្ទេសមធ្យម ៤ នាក់ ស្មើ ១៨,១៨ ភាគរយ៕
