បរទេស៖ ក្លឹបបិសាចក្រហម Man. Utd បានដាក់បញ្ចូលអ្នកចាំទីEmiliano Martinez នៅក្នុងបញ្ជីគោលដៅផ្ទេររបស់ពួកគេ។កីឡាករអន្តរជាតិអាហ្សង់ទីនវ័យ២៩ឆ្នាំរូបនេះនៅតែបង្ហាញទម្រង់លេងបានល្អ ក្រោយចាកចេញពីArsenal មកចូលរួម ជាមួយAston Villa នៅខែកញ្ញាឆ្នាំ២០២០ ក្នុងតម្លៃខ្លួន ១៦ លានផោនបន្ទាប់ពីធ្វើបានCleansheet១៥ដង ក្នុងការបង្ហាញខ្លួន៣៨ ប្រកួតនៅក្របខណ្ឌ Premier League រដូវកាលមុន។
យោងគេហទំព័រ Daily Star បានចុះផ្សាយថាៈក្រុមជើងឯកអង់គ្លេស២០សម័យបានតាមដានពីស្ថានភាពរបស់ Martinez ជាច្រើនដង និងបានចាត់ទុករូបគេជាបេក្ខភាពដើម្បីយកមកជំនួសអ្នកចាំទីដៃទីមួយ David de Gea ប្រសិនកីឡាករ អន្តរជាតិអេស្ប៉ាញរូបនេះសម្រេចចិត្តចាកចេញពីទឹកដីOld Trafford បើទោះបីជាកិច្ចសន្យារបស់ខ្លួននឹងផុតកំណត់នៅឆ្នាំ២០២៣ក៏ដោយ។
ក្រៅពីកីឡាករខាងលើនេះ Illan Meslier របស់ Leeds United គឺជាជម្រើសម្នាក់បន្ថែមទៀត ប៉ុន្តែ Martinez កីឡាករដែលបានជួយអាហ្សង់ទីនឈ្នះពានCopa America ២០២១ មានតម្លៃខ្លួន៥០លានផោនគឺជាជម្រើសសំខាន់ជាង ។សម្រាប់Martinez បច្ចុប្បន្នមានកិច្ចសន្យាជាមួយAston Villa រហូតដល់ឆ្នាំ 2024 និងបានរក្សាClean Sheet ចំនួន ៥ ដងក្នុងការប្រកួតនៅPremier League ១៦ដងសម្រាប់រដូវកាលនេះ៕
ប្រភពព័ត៍មាន៖ Sportsmole
