បរទេស៖ Barcelona មានបំណងចង់បានកីឡាករអន្តរជាតិប្រេស៊ីល Oscar ដើម្បីជំនួស Philippe Coutinho ដែលបានចាកចេញ ទៅកាន់ទឹកដី Villa Park ក្នុងលក្ខណ្ឌខ្ចីជើងសម្រាប់ពេលវេលាដែលនៅសល់នៃរដូវកាលនេះ។ Coutinho វ័យ ២៩ ឆ្នាំ បាន សម្រេចវិលត្រលប់ទៅកាន់ក្របខណ្ឌ Premier League ជាមួយក្លឹប Aston Villa លើកិច្ចព្រមព្រៀងខ្ចីជើងរយៈពេល ៦ ខែដំបូងក្រោមការដឹកនាំរបស់អតីតមិត្តរួមក្រុមគឺលោក Steven Gerrard ដោយមានជម្រើស ទិញផ្តាច់កុងត្រាប្រមាណ៤០ លានអឺរ៉ូ ដើម្បីទិញផ្តាច់នៅរដូវក្តៅខាងមុខនេះ។
បច្ចុប្បន្នគ្រូបង្វឹក Barcelona លោក Xavi Hernandez និងប្រធានក្លឹបលោក Joan Laporta កំពុងស្វែងរកខ្សែបម្រើដែលមានការច្នៃប្រឌិតថ្មីបន្ថែមទៀត មុនពេលទីផ្សារដោះដូរកីឡាករនៅខែមករាត្រូវបិទ។យោងអ្នកកាសែត TNT Sports Brazil លោក Marcelo Bechler បានឲ្យដឹងថា Barcelona បានធ្វើការទាក់ទងក្លឹប Shanghai Port ដើម្បីចរចារផ្ទេរយកOscarដើម្បី ផ្ទេរយកកីឡាកវ័យ៣០ ឆ្នាំរូបនេះ ប៉ុន្តែនិងអាចមានជួបឧបសគ្គដោយសារស្ថានភាពហិរញ្ញវត្ថុរបស់ក្លឹប។
ដូច្នេះOscar នឹងអាចផ្លាស់មកកាន់ទឹកដី Camp Nou បានលុះត្រាតែអតីតខ្សែបម្រើChelsea រូបនេះត្រូវកាត់បន្ថយប្រាក់ឈ្នួលជារឿងសំខាន់ក្រោយពីកីឡាករដែលធ្លាប់លេងអោយក្រុមសាំបាប្រេស៊ីល ៤៨ដង បានផ្ទេរទៅលេងនៅលីកកំពូលចិនក្នុងតម្លៃប្រមាណ ៦០ លានផោនកាលពីឆ្នាំ២០១៧ ។Oscar បច្ចុប្បន្នមានកិច្ចសន្យាជាមួយក្លឹបរហូតដល់ខែវិច្ឆិកា ឆ្នាំ ២០២៤ ក្រោយបង្ហាញខ្លួនបាន១៧០ ប្រកួតឱ្យ Shanghai Port និង ស៊ុតបញ្ចូលទីបាន ៥០ គ្រាប់៕
ប្រភពព័ត៍មាន៖ Sportsmole
