សហព័ន្ធកីឡាគុនល្បុក្កតោកម្ពុជា ក្រោមកញ្ចប់ថវិកាចំណាយរបស់ក្រសួងអប់រំ យុវជន និងកីឡា បានសម្រេចលើកយកការប្រកួតកីឡាគុនល្បុក្កតោជ្រើសរើសជើងឯកថ្នាក់ជាតិ ឆ្នាំ ២០២១ ដែលបានពន្យារពេល ដោយសារវិបត្តិកូវីដ១៩ នោះ មកធ្វើនៅមជ្ឈមណ្ឌលជាតិហ្វឹកហ្វឺនកីឡាការ៉ាតេនៃសាកលវិទ្យាល័យភូមិន្ទភ្នំពេញ នាថ្ងៃសុក្រនេះ ហើយគ្រោងបញ្ចប់ នៅថ្ងៃអាទិត្យ ចុងសប្តាហ៍នេះ។
សម្រាប់ការប្រកួតថ្នាក់ជាតិនេះ មានអ្នកលេងគុនល្បុក្កតោលើវិញ្ញាសាសម្តែងទម្រង់មេគុន និងអ្នកប្រយុទ្ធ ប្រមាណ ២០០ នាក់ មកពី ២៨ សាលាគុន បានចូលរួម ហើយសហព័ន្ធកីឡាគុនល្បុក្កតោកម្ពុជា បានកំណត់គោលដៅយ៉ាងច្បាស់លាស់ថា ការប្រកួតនេះ វាមិនផ្តោតតែត្រឹមការជ្រើសរើសកីឡាករ កីឡការិនីមានសមត្ថភាព ដើម្បីត្រៀមប្រកួតតំណាងឱ្យជាតិ នៅលើឆាកអន្តរជាតិប៉ុណ្ណោះទេ ប៉ុន្តែការប្រកួតនេះ ក៏ផ្តោតសំខាន់ទៅលើការអភិរក្ស និងអភិវឌ្ឍន៍ក្បាច់គុនព្រលឹងជាតិ អត្តសញ្ញាណជាតិ និងវប្បធម៌ជាតិ មួយនេះឱ្យបានគង់វង្ស និងកាន់តែមានភាពល្បីល្បាញ ផងដែរ។
សហព័ន្ធកីឡាគុនល្បុក្កតោកម្ពុជា បានកំណត់ជាគោលការណ៍ថា៖ «ការប្រកួតនេះ ត្រូវបានធ្វើឡើងក្នុងគោលបំណងថែរក្សាប្រពៃណីទំនៀមទម្លាប់ នៃការប្រកួតគុនល្បុក្កតោ ដែលមានតាំងពីបុរាណកាលមក ដូច្នេះការប្រកួតនេះ យើងបានបណ្តុះគំនិតជាតិនិយម និងធ្វើឱ្យមជ្ឈដ្ឋានទូទៅ មានការយល់ដឹងកាន់តែច្បាស់ពីគុណតម្លៃ នៃគុនល្បុក្កតោ ដែលបុព្វបុរសបង្កើតទុកឱ្យកូនខ្មែរជំនាន់ក្រោយ»។
សហព័ន្ធ បានកំណត់ទៀតថា៖ «តាមរយៈការប្រកួតនេះ យើងបានបំផុសការផ្សព្វផ្សាយតាមគោលការណ៍អភិរក្ស និងអភិវឌ្ឍន៍ក្បាច់គុនព្រលឹងជាតិ អត្តសញ្ញាណជាតិ ព្រមទាំងវប្បធម៌ជាតិ ដើម្បីឱ្យមានការគាំទ្រពីមហាជន និងអាចទាក់ទាញក្រុមយុវជនចូលរួមហ្វឹកហាត់គុនល្បុក្កតោឱ្យបានកាន់តែច្រើន»។
ជាមួយគ្នានេះ សហព័ន្ធ នឹងប្រើការប្រកួតថ្នាក់ជាតិ ដើម្បីវាស់ស្ទង់សមត្ថភាពរបស់ក្រុមកីឡាករ-កីឡាការិនី រួចធ្វើការសម្រិតសម្រាំងរកអត្តពលិកឆ្នើម និងមានសមត្ថភាព ដើម្បីយកទៅបំប៉នការហ្វឹកហាត់បន្ថែម ត្រៀមចេញទៅប្រកួតតំណាងឱ្យជាតិ នៅលើឆាកអន្តរជាតិ ពិសេសការប្រកួតស៊ីហ្គេម ឆ្នាំ ២០២៣ ដែលសហព័ន្ធកីឡាគុនល្បុក្កតោបានដាក់គោលដៅរួចហើយថា ត្រូវដណ្តើមមេដាយមាសឱ្យបានច្រើនជាងបណ្តាប្រទេសផ្សេងៗ ដើម្បីឱ្យស័ក្តិសមថា កម្ពុជាជាម្ចាស់ក្បាច់គុនល្បុក្កតោនេះ។
លោក អ៊ួ តារា អគ្គលេខាធិការរងសហព័ន្ធកីឡាគុនល្បុក្កតោកម្ពុជា បានប្រាប់ថា៖ «ការប្រកួតថ្នាក់ជាតិនេះ នឹងផ្តល់ឱកាសឱ្យកីឡាករ-កីឡាការិនី បានបញ្ចេញសមត្ថភាព និងវាស់ស្ទង់កម្រិតបច្ចេកទេស ដ៏ពិតប្រាកដរបស់ពួកគាត់ ដើម្បីយើងអាចជ្រើសរើសបាននូវកីឡាករ-កីឡាការិនីមានទេពកោសល្យល្អ និងប៉ិនប្រសប់ យកទៅបំប៉នការហ្វឹកហាត់ឯកទេស និងជំនាញបន្ថែម ឱ្យឈានដល់កម្រិត ដើម្បីត្រៀមខ្លួនចូលទៅប្រកួតប្រជែង នៅលើឆាកអន្តរជាតិ ជាពិសេសការប្រកួតស៊ីហ្គេមលើកទី៣២ ឆ្នាំ ២០២៣ ក្នុងនាមជាម្ចាស់ផ្ទះ»។
យោងតាមកម្មវិធីប្រកួតរបស់សហព័ន្ធកីឡាគុនល្បុក្កតោកម្ពុជា បានឱ្យដឹងថា ពិធីបើកការប្រកួតជើងឯកថ្នាក់ជាតិ ឆ្នាំ២០២១នេះ នឹងត្រូវធ្វើឡើង នៅរសៀលម៉ោង៣ជាង ថ្ងៃសុក្រនេះ ក្រោមវត្តមានចូលរួមផ្ទាល់របស់លោកបណ្ឌិតសភាចារ្យ ច័ន្ទ សារុន ដែលជាប្រធានសហព័ន្ធ រួមទាំងមន្រ្តីពាក់ព័ន្ធ គ្រូបង្វឹក និងក្រុមអត្តពលិកជាច្រើនរូបនេះ។
សម្រាប់ការប្រកួតនេះ ក្រុមអត្តពលិកទាំងអស់ នឹងត្រូវប្រកួតប្រជែងគ្នា នៅលើវិញ្ញាសាចំនួន២១ ក្នុងនោះវិញ្ញាសាទ្វារមេគុនដៃ, ទ្វារមេគុនអាវុធឥតមុខ, ទ្វារមេគុនអាវុធមានមុខ, ទ្វារមេគុនព្រលឹងល្បុក្កតោ, ទ្វារមេគុនដៃក្រុម, សមយុទ្ធបុរស ១ទល់១, សមយុទ្ធនារី ១ទល់១ រីឯប្រភេទវិញ្ញាសាប្រយុទ្ធ មានប្រយុទ្ធផ្នែកបុរសប្រភេទទម្ងន់ ៤៨-៥០គីឡូក្រាម, ៥២-៥៤គីឡូក្រាម, ៥៦-៥៨ គីឡូក្រាម និង ៦៤-៦៦គីឡូក្រាម ខណៈផ្នែកនារី រួមមានប្រយុទ្ធប្រភេទទម្ងន់ក្រោម ៤៥គីឡូក្រាម, ៤៨-៥០គីឡូក្រាម, ៥៣-៥៥គីឡូក្រាម និងប្រភេទទម្ងន់ ៥៨-៦០គីឡូក្រាម ជាដើម៕
