បរទេស៖ ខ្សែបម្រើអន្តរជាតិដាណឺម៉ាក Christian Eriksen បានស៊ុតបាល់បញ្ចូលទីកាលពីថ្ងៃអង្គារ ក្នុងពេលវិលទៅកាន់កីឡដ្ឋានក្នុងទីក្រុង Copenhagen វិញ ដែលជាកន្លែងរូបគេបានជួបបញ្ហាគាំងបេះដូង កាលពីឆ្នាំមុន ខណៈដែលក្រុមបាល់ទាត់ជម្រើសជាតិអង់គ្លេស និងបារាំង ក៏បានកត់ត្រាជ័យជម្នះក្នុងការប្រកួតមិត្តភាពមុន World Cup របស់ពួកគេផងដែរ។
Eriksen ដែលទទួលតួនាទីជាប្រធានក្រុម បានស៊ុតបាល់បំប៉ោងសំណាញ់ទីនៅនាទី ទី៥៧ ដើម្បីជួយឲ្យក្រុមជម្រើសជាតិដាណឺម៉ាក ដណ្តើមបានជ័យជម្នះក្នុងលទ្ធផល ៣-០ លើក្រុមជម្រើសជាតិស៊ែប៊ី នាកីដ្ឋាន Parken ដែលជាកន្លែងរូបគេបានដួលសន្លប់ និងស្ទើរតែបាត់បង់ជីវិត ក្នុងការប្រកួតព្រឹត្តិការណ៍ Euro ជាមួយនឹងក្រុមជម្រើសជាតិហ្វាំងឡង់ កាលពីខែមិថុនា ឆ្នាំមុន។ ខ្សែបម្រើដ៏មានឥទ្ធិពលរូបនេះបានឲ្យដឹងថា៖ «ការវិលត្រឡប់ទៅកាន់កីឡដ្ឋាន Parken វិញ និងស៊ុតបាល់បញ្ចូលទី១គ្រាប់ រួមជាមួយនឹងការស្វាគមន៍ដែលខ្ញុំទទួលបាន គឺជាចំណុចដែលធ្វើឲ្យខ្ញុំមានការរំភើប។
ទាំងនេះ ធ្វើឲ្យខ្ញុំមានការរីករាយជាពិសេស។ នាកីឡដ្ឋាន Wembley ឯនោះវិញ កីឡាករ Ollie Watkins បានស៊ុតបាល់បញ្ចូលទីនៅថ្ងៃដែលរូបគេបានបង្ហាញខ្លួនជាលើកដំបូងរបស់គេសម្រាប់អង់គ្លេស ខណៈដែលក្រុមរបសលោក Gareth Southgate បានយកឈ្នះលើក្រុមជម្រើសជាតិកូតឌីវ័រ ក្នុងលទ្ធផល ៣-០។ ជាមួយគ្នានេះ ក្រុមដែលមានការផ្លាស់ប្តូរច្រើន បារាំង ក៏ដណ្តើមបានជ័យជម្នះផងដែរ ខណៈដែល Kylian Mbappe និង Olivier Giroud រកបានគ្រាប់បាល់បញ្ចូលទីដូចគ្នា ក្នុងពេលក្រុមម្ចាស់ជើងឯកពិភពលោកមួយនេះ បានផ្តួលក្រុមជម្រើសជាតិអាហ្រ្វិកខាងត្បូង ក្នុងលទ្ធផល ៥-០៕
ប្រភពព័ត៌មាន៖ Channel News Asia
