បរទេស៖ លោក Carlo Ancelotti បាននិយាយកាលពីថ្ងៃចន្ទថា ប្រវត្តិដ៏ត្រចះត្រចង់របស់ Real Madrid ក្នុងក្របខ័ណ្ឌ Champions League នឹងជួយឲ្យពួកគេមានប្រៀប នៅពេលដែលពួកគេប៉ះជាមួយនឹងក្រុម Manchester City ក្នុងការប្រកួតជើងទី១នៃវគ្គពាក់កណ្តាលផ្តាច់ព្រ័ត្រ នៅរាត្រីនេះ។
ការឈ្នះពានក្របខ័ណ្ឌកំពូលអឺរ៉ុបចំនួន១៣លើករបស់ Real Madrid ធ្វើឲ្យពួកគេក្លាយជាក្លិបដ៏ជោគជ័យបំផុតក្នុងយុទ្ធនាការនេះ ស្របពេលដែលក្រុម Man City បានបង្ហាញខ្លួនក្នុងការប្រកួតក្របខ័ណ្ឌ Champions League វគ្គផ្តាច់ព្រ័ត្រ ជាលើកដំបូង កាលពីឆ្នាំមុន ដែលនៅពេលនោះពួកគេបានរងបរាជ័យក្រោមស្នាដៃក្រុម Chelsea ក្នុងលទ្ធផល ១-០។ លោក Ancelotti បានប្រាប់សន្និសីទសារព័ត៌មានថា៖ «ប្រវត្តិដែល Real Madrid មានក្នុងយុទ្ធនាការនេះ មានន័យចំពោះយើង ជាងគូប្រកួតរបស់យើង។ ប្រវត្តិដែលបានរីកលូតលាស់អស់រយៈពេលជាច្រើនឆ្នាំជួយឲ្យកីឡាករមានអារម្មណ៍ ទម្ងន់នៃអាវនេះ ពោលគឺទម្ងន់ជាវិជ្ជមាន មិនមែនអវិជ្ជមានឡើយ»។
លោក Pep Guardiola បានទទួលស្គាល់ថា ក្រុម Man City មិនអាចប្រជែងនឹងប្រវត្តិរបស់ Real Madrid ក្នុងក្របខ័ណ្ឌអឺរ៉ុបបានឡើយ ប៉ុន្តែ បាននិយាយថា ពួកគេអាចសរសេរទំព័រថ្មីរបស់ពួកគេផ្ទាល់។ ក្នុងសន្និសីទសារព័ត៌មាននៅមុនពេលការប្រកួតរបស់លោក លោក Guardiola បានបញ្ជាក់ថា៖ «ប្រសិនបើយើងត្រូវតែប្រជែងជាមួយនឹងប្រវត្តិសាស្ត្រ យើងនឹងមិនមានឱកាសឡើយ។ ប្រវត្តិរបស់ពួកគេ បង្ហាញឲ្យឃើញយ៉ាងច្បាស់។ ការលេងជាមួយ Real Madrid គឺជាការល្បងសមត្ថភាពដ៏អស្ចារ្យ។ យើងចង់សាកល្បង។ វាជាមេរៀនដ៏ល្អសម្រាប់ថ្ងៃអនាគត»៕
ប្រភពព័ត៌មាន៖ worldsoccertalk
