បរទេស៖ ខ្សែការពារ Giorgio Chiellini ជឿជាក់ថា វានឹងក្លាយជា «រឿងដ៏ល្អ» ក្នុងការបញ្ចប់អាជីពអន្តរជាតិរបស់គេ ពេលប៉ះជាមួយនឹងក្រុមបាល់ទាត់ជម្រើសជាតិអាហ្សង់ទីន នាកីឡដ្ឋាន Wembley នៅរាត្រីនេះ ក្រោយពីបានជួយឲ្យក្រុមជម្រើសជាតិអ៊ីតាលី ឈ្នះពាន Euro ឆ្នាំ២០២០ នៅលើទីលានក្នុងទីក្រុងឡុងដ៍ មួយនេះ កាលពីឆ្នាំមុន។
កីឡាករវ័យ៣៧ឆ្នាំរូបនេះ គឺជាតួអង្គដ៏សំខាន់ម្នាក់ ដោយរូបគេបានដើរតួនាទីជាប្រធានក្រុមផង និងខ្សែការពារផងដែរ នៅពេលដែលក្រុមបាល់ទាត់ជម្រើសជាតិអ៊ីតាលី បានផ្តួលក្រុមម្ចាស់អង់គ្លេស ដោយការស៊ុតបាល់ប៉េណាល់ទីក្នុងវគ្គផ្តាច់ព្រ័ត្រនៃយុទ្ធនាការ Euro ដែលត្រូវបានពន្យារពេល១២ខែ ដោយសារតែវិបត្តិកូវីដ ១៩។ បច្ចុប្បន្ន ក្រុមជម្រើសជាតិអ៊ីតាលី នឹងត្រូវប៉ះជាមួយនឹងក្រុមម្ចាស់ជើងឯកប្រចាំទ្វីបអាមេរិកខាងត្បូងមួយនេះ ក្នុងការប្រកួតដណ្តើមពាន Finalissima នាកីឡដ្ឋាន Wembley នៅរាត្រីនេះ ខណៈដែល Chiellini នឹងត្រូវបង្ហាញខ្លួនជាអន្តរជាតិលើកទី១១៧ និងជាលើកចុងក្រោយរបស់គេ។
លោក Roberto Mancini អ្នកចាត់ការទូទៅនៃក្រុមបាល់ទាត់ជម្រើសជាតិអ៊ីតាលី អាចនឹងដាក់ Chiellini ដែលជាសមាជិកម្នាក់ក្នុងចំណោមតារាឆ្នើមដែលបានឈ្នះពាន Euro ឆ្នាំ២០២០របស់លោក ក្នុងជម្រើសទាំង១១នាក់ដំបូង។ លោកបាននិយាយថា នេះនឹងក្លាយជាការបញ្ចប់ដំណើរ «វដ្តន៍» មួយ ក្រោយពីក្រុមម្ចាស់ជងឯកពិភពលោក៤សម័យកាលមួយនេះបានខកខានក្នុងឈ្នះកៅអី World Cup ក្នុងប្រទេសកាតា នៅឆ្នាំនេះ។ នៅពេលដែលត្រូវបានចោទសួរអំពីការបញ្ចប់អាជីពអន្តរជាតិរបស់គេ ក្នុងពេលប៉ះអាហ្សង់ទីន Chiellini បានឆ្លើយថា៖ «វាគឺជារឿងដ៏ល្អក្នុងការបញ្ចប់ក្នុងការប្រកួតជាមួយនឹងអាហ្សង់ទីន»៕
ប្រភពព័ត៌មាន៖ Channel News Asia
