អ្នកចាត់ការទូទៅក្រុមជម្រើសជាតិកម្ពុជា លោក Keisuke Honda បានចាត់ទុក ការប្រកួតមិត្តភាពអន្តរជាតិជាមួយក្រុមជម្រើសជាតិទីម័រខាងកើត នៅពហុកីឡដ្ឋានជាតិមរតតេជោ នាព្រលប់ថ្ងៃព្រហស្បតិ៍ ស្អែកនេះ ថាជាការប្រកួតដ៏តានតឹង ដែលមិនអាចងាយ ស្រួលនោះទេ ហើយ ទីម័រ ក៏ធ្លាប់បានយកឈ្នះលើក្រុមកម្ពុជា ក្នុងការប្រកួត AFF U23 Championship 2022 នៅពហុកីឡដ្ឋានជាតិមរតតេជោ នេះផងដែរ។
តែទោះបីជាជាយ៉ាងណា អតីតខ្សែប្រយុទ្ធដ៏ឆ្នើម ដែលជាវីរបុរសបាល់ទាត់របស់ប្រទេសជប៉ុន លោក Keisuke Honda បានដាក់គោលដៅរួចទៅហើយថា ការប្រកួតមិត្តភាពលើកនេះ កម្ពុជា ត្រូវតែយកឈ្នះឱ្យបាន ខណៈការប្រកួតនេះ វាជាការប្រកួតដ៏សំខាន់ផងដែរ សម្រាប់កម្ពុជា ក្នុងការត្រៀមទៅចូលរួមការប្រកួតវគ្គជម្រុះពានរង្វាន់ AFC Asian Cup ដែលត្រូវធ្វើ នៅប្រទេសឥណ្ឌា ខាងមុខនេះ។
លោក Keisuke Honda បាននិយាយ ក្នុងសន្និសីទកាសែត នៅថ្ងៃពុធនេះថា៖«វាជាការពិត យើងមានការប្រកួតសំខាន់មួយ នៅប្រទេសឥណ្ឌា គឺពានរង្វាន់ AFC Asian Cup អ៊ីចឹងការជួបក្រុមទីម័រ លើកនេះ ជាការប្រកួតត្រៀមខ្លួនដ៏ល្អមួយ ហើយការប្រកួតនេះ យើងត្រូវការឈ្នះ ព្រោះយើងបានដឹងហើយថា កាលពីពានរង្វាន់ AFF U23 Championship យើងបានចាញ់ក្រុមទីម័រ»។
យ៉ាងណាក៏ដោយ លោក Honda បានបន្ថែមថា៖ «ការជួបក្រុមទីម័រ មិនមែនជាការប្រកួតដ៏ងាយស្រួលមួយនោះទេ ព្រោះទីម័រ ជាក្រុម ដែលមានកីឡាករ មានទេពកោសល្យច្រើន។ បើទោះបីជាកាយសម្បទារបស់ពួកគាត់ មិនសូវខ្ពស់ និងធំ ប៉ុន្តែ ទីម័រជាក្រុមមួយ ដែលមានកីឡាករ មានបច្ចេកទេសខ្ពស់ អ៊ីចឹងយើងត្រូវមានការប្រយ័ត្នប្រយ៉ែង ហើយយើងក៏ត្រូវការតេស្តសមត្ថភាពកីឡាកររបស់យើងដូចគ្នា ដើម្បីត្រៀមការប្រកួត នៅឥណ្ឌា»។
គួររំឭកថា សម្រាប់ការប្រកួតពានរង្វាន់ AFF U23 Championship 2022 ដែលកម្ពុជា បានធ្វើជាម្ចាស់ផ្ទះ កាលពីខែកុម្ភៈ កន្លងមកនេះ ក្រុមជម្រើសជាតិកម្ពុជាអាយុក្រោម២៣ឆ្នាំ បានធ្លាក់ត្រឹមវគ្គជម្រុះ ក្នុងពូល បន្ទាប់ពីពួកគេ បានចាញ់ក្រុមទីម័រខាងកើត ១-០ ដោយគ្រាប់នោះ ជាការភ្លាត់ធ្វើឱ្យបាលចូលទីរបស់កីឡាករ សារ ទី នៅនាទីទី១៨៕
