បរទេស៖ លោក Gareth Southgate បានបញ្ជាក់ថា តារាឆ្នើមៗរបស់ក្រុមបាល់ទាត់ជម្រើសជាតិអង់គ្លេស ពិតជាសក្តិសមក្នុងការទទួលបានភាពស្មោះត្រង់ពីលោក ពីព្រោះពួកគេនឹង «ស្លាប់ជួសគ្នាទៅវិញទៅមក» នៅលើទីលានប្រកួត។
ក្រុមរបស់លោក Southgate មិនស្គាល់ឈ្នះសោះពីការប្រកួត២លើកក្នុងយុទ្ធនាការ Nations League ក្រោយពីដណ្តើមបានលទ្ធផលស្មើ ១-១ ជាមួយនឹងក្រុមបាល់ទាត់ជម្រើសជាតិអាល្លឺម៉ង់ ក្នុងការប្រកួត National League វគ្គចែកពូលរបស់ពួកគេ កាលពីថ្ងៃអង្គារ។ គ្រាប់បាល់ប៉េណាល់ទីរបស់ Harry Kane បានតាមស្មើគ្រាប់បាល់បើកឆាករបស់កីឡាករ Jonas Hofmann ប៉ុន្តែ គ្រូបង្វឹកនៃក្រុមជម្រើសជាតិអង់គ្លេស លោក Southgate ត្រូវបានគេរិះគន់ចំពោះការស្មោះស្ម័គ្រពេកជាមួយនឹងកីឡាករដ៏យូរអង្វែងរបស់លោក បើទោះកីឡាករខ្លះមានទម្រង់លេងមិនទៀងទាត់ក៏ដោយ។ ក្នុងចំណោមកីឡាករ១៤នាក់ដែលបានបង្ហាញខ្លួនក្នុងទីក្រុង Munich ខ្សែប្រយុទ្ធ Jarrod Bowen របស់ក្លិប West Ham គឺជាកីឡាករតែម្នាក់ដែលមិនបានចូលលេងក្នុងក្រុមជម្រើសជាតិអង់គ្លេស ក្នុងពេលចាញ់ក្រោមស្នាដៃក្រុមជម្រើសជាតិអង់គ្លេស ក្នុងព្រឹត្តិការណ៍ Euro ឆ្នាំ២០២០ កាលពីឆ្នាំមុន។ កីឡាករ៧នាក់ក្នុងចំណោមកីឡាករទាំង១១នាក់ដំបូង ដែលបានប្រកួតជាមួយនឹងអាល្លឺម៉ង់ ក៏បានស្ថិតក្នុងក្រុមជម្រើសដំបូង ដែលរងបរាជ័យក្រោមស្នាដៃក្រុមជម្រើសជាតិក្រូអាស៊ី ក្នុងការប្រកួតវគ្គ៤ក្រុមចុងក្រោយនៃព្រឹត្តិការណ៍ World Cup ឆ្នាំ២០១៨។
នៅពេលដែលត្រូវបានចោទសួរថា តើលោកមានភាពស្មោះស្ម័គ្រពេកចំពោះកីឡាករទាំងនោះ ឬយ៉ាងណា លោក Southgate បានឆ្លើយតបថា៖ «ទេ យើងបើកចិត្តឲ្យទូលាយទាំងស្រុង។ Bukayo (Saka) បានចាកចេញពីក្រុម ហើយយើងមិនស្ទាក់ស្ទើរក្នុងដាក់ឲ្យ Jude (Bellingham) ចូលលេងឡើយ។ រឿងរ៉ាវពិតប្រាកដនោះគឺថា ពួកគេនឹងស្លាប់ជួសគ្នាទៅវិញទៅមកលើទីលានប្រកួត»៕
ប្រភពព័ត៌មាន៖ Channel News Asia
