ការរកបាន២គ្រាប់ពីសំណាក់ប្រធានក្រុម Sunil Chhetri ដោយការទាត់បាល់ពិន័យ១១ម៉ែត្រ នៅនាទីទី១៤ និងការស៊ុតបញ្ចូលទី១គ្រាប់ទៀត នៅនាទីទី៦០ ដើម្បីជួយឱ្យក្រុមជម្រើសជាតិឥណ្ឌា ឈ្នះក្រុមជម្រើសជាតិកម្ពុជា ២-០ ក្នុងវគ្គជម្រុះជុំចុងក្រោយពានរង្វាន់ AFC Asian Cup 2022 កាលពីយប់មិញនេះ វាប្រែជាគ្មានន័យអ្វីទាំងអស់ ព្រោះឥណ្ឌា ដែលធ្វើជាម្ចាស់ផ្ទះ ប្រចាំពូលD នេះ បានបង្កើតកំហុស មកលើកម្ពុជា ដែលពិបាក នឹងទទួលយកបាន។
បើទោះបីជា សហព័ន្ធកីឡាបាល់ទាត់ឥណ្ឌា បានចេញលិខិតសុំទោស ចំពោះកម្ពុជា នៅរាល់កំហុស ដែលក្រុមការងាររបស់ប្រទេសនេះ បានបង្កើតមានឡើង មកលើកម្ពុជា ទាក់ទងនឹង ការមិនយកចិត្តទុកដាក់ ទាំងអាហារ ការស្នាក់នៅ រួមទាំងទង់ជាតិរបស់កម្ពុជា ពិសេសការមិនចាក់ភ្លេងជាតិ សម្រាប់ក្រុមជម្រើសជាតិ នៅមុនការប្រកួតចាប់ផ្តើម ប៉ុន្តែនៅរាល់កំហុសទាំងអស់នេះ វាកំពុងក្លាយជាប្រធានបទដ៏ក្តៅគគុកថា តើម្ចាស់ផ្ទះ ឥណ្ឌា មានចេតនាធ្វើបែបនេះ ឬក៏ជាកំហុសអចេតនា?
ផ្នែកទៅលើព័ត៌មានទទួលបាន ជុំវិញស្ថានភាពជាក់ស្តែង ដែលក្រុមជម្រើសជាតិកម្ពុជា បានជួបប្រទះ នៅមុនការប្រកួតជាមួយក្រុមម្ចាស់ផ្ទះឥណ្ឌា កាលពីយប់មិញនេះ គឺក្រុមតំណាងឱ្យកម្ពុជាដ៏កម្សត់មួយនេះ មិនត្រូវបានម្ចាស់ផ្ទះ អនុញ្ញាតឱ្យប្រកួតសមជើង នៅកីឡដ្ឋាន Salt Lake ទីក្រុង Kolkata មុនការប្រកួតនោះទេ ដោយប្រទេស បានត្រឹមឱ្យក្រុមកម្ពុជា ចូលទៅលើកីឡដ្ឋាននេះ តែប៉ុណ្ណោះ ហើយបញ្ហានេះ ជារឿងអចេតនា ឬក៏ជាការរៀបចំទុកមុន របស់ម្ចាស់ផ្ទះឥណ្ឌា ខណៈការប្រកួតធំៗ សុទ្ធតែត្រូវបានអនុញ្ញាតឱ្យក្រុមភ្ញៀវ បានលេងនៅលើទីលាន មុនការប្រកួតផ្លូវការនោះ?
ទន្ទឹងនឹងនេះ ការមិនយកចិត្តទុកដាក់ ទាំងទៅលើអាហារ ការស្នាក់នៅ រួមទាំងទង់ជាតិរបស់កម្ពុជា ពីសំណាក់ម្ចាស់ផ្ទះឥណ្ឌា និងសហព័ន្ធកីឡាបាល់ទាត់អាស៊ី (AFC) ជារឿងចាយដន្យ ឬក៏ជាចេតនារបស់ម្ចាស់ផ្ទះឥណ្ឌា ដែលចង់បំបាក់ទាំងស្មារតី និងគុណភាពកម្លាំងរបស់កម្ពុជា ក្នុងន័យចង់ឈ្នះក្រុមកម្ពុជា ខ្លាំងពេក?
ជាមួយគ្នានេះ ការមិនចាក់ភ្លេងជាតិ ឱ្យក្រុមជម្រើសជាតិកម្ពុជា នៅម៉ោងគោរពភ្លេងជាតិ មុនការប្រកួតចាប់ផ្តើម វាជាបញ្ហាបច្ចេកទេសរបស់អ្នកចាក់ភ្លេង ឬក៏ម្ចាស់ផ្ទះឥណ្ឌា ចង់ធើស៊ីផ្លូវចិត្តតំណាក់កាលចុងក្រោយ មកលើក្រុមកម្ពុជា ម្តងទៀត? ព្រោះបើយោងតាមសារព័ត៌មាន Sport Star របស់ឥណ្ឌា បានបញ្ជាក់ថា ខាងមន្ត្រីកម្ពុជា ទៅវិញទេ ដែលបានយកទូរសព្ទស្មាតហ្វូនរបស់ខ្លួន ដើម្បីចាក់ភ្លេងជាតិ ដោយសារអ្នករៀបចំការប្រកួតរបស់ឥណ្ឌា មិនអាចរកភ្លេងជាតិកម្ពុជាបាន ក្រោយពេលក្រុមកម្ពុជា បានឈរចាំគោរពភ្លេងជាតិ ទាំងអារម្មណ៍ក្តៅក្រហាយ អស់ពេលជាង៦នាទី។
ចំពោះកំហុសទាំងនេះ បើទោះបីជាចេតនាក្តី អចេតនាក្តី ប៉ុន្តែវាបានបង្ហាញរួចទៅហើយថា ឥណ្ឌា មានភាពកម្សោយខ្លាំង ចំពោះការធ្វើជាម្ចាស់ផ្ទះលើកនេះ ហើយបញ្ហានេះ វាកំពុងតែស្ថិតក្នុងការរិះគន់យ៉ាងខ្លាំង ពីសំណាក់អ្នកគាំទ្រកម្ពុជា ទៅលើម្ចាស់ផ្ទះឥណ្ឌា ដែលមិនបានបង្ហាញការគោរព និងឱ្យតម្លៃ ដល់កម្ពុជា ដែលជាភ្ញៀវ។ កំហុស និងភាពអសកម្មរបស់ឥណ្ឌា ក៏កំពុងធ្វើឱ្យប្រទេសនេះ បាក់មុខខ្លាំង នៅលើឆាកអន្តរជាតិ ផងដេរ ដែលគេគិតថា ឥណ្ឌា អាចនឹងមិនទទួលបានឱកាសធ្វើជាម្ចាស់ផ្ទះ សម្រាប់ការប្រកួតផ្លូវការ ដែលរៀបចំដោយ AFC ទៀតនោះទេ៕
