បរទេស៖ ក្រុមបាល់ទាត់ជម្រើសជាតិអាល្លឺម៉ង់ បានតាមស្មើកំណត់ត្រាចាស់ដៃរបស់ខ្លួន ក្រោយពីពួកគេបានផ្តួលក្រុមម្ចាស់ជើងឯកទ្វីបអឺរ៉ុប អ៊ីតាលី យ៉ាងចាស់ដៃក្នុងលទ្ធផល ៥-២ ក្នុងការប្រកួត Nations League នាទីក្រុង Moenchengladbach កាលពីថ្ងៃអង្គារ។ គ្រាប់បាល់បើកឆាកពីកីឡាករ Joshua Kimmich និងការស៊ុតបាល់ប៉េណាល់ទី Ilkay Gundogan នាកីឡដ្ឋាន Borussia Park បានជួយឲ្យអាល្លឺម៉ង់ នាំមុខ ២-០ នៅមុនពេលពួកគេបានបន្តស៊ុតបាល់បញ្ចូលទីជាបន្តបន្តាប់។
ខ្សែប្រយុទ្ធ Thomas Mueller រកបានគ្រាប់បាល់ទី៤៤របស់គេ សម្រាប់អាល្លឺម៉ង់ ក្នុងការបង្ហាញខ្លួនជាអន្តរជាតិលើកទី១១៦របស់គេ នៅមុនពេល Timo Werner បានស៊ុតបាល់បញ្ចូលទី២គ្រាប់ចន្លោះពេលដ៏ខ្លី។ លទ្ធផលនេះ គឺដូចនឹងការដណ្តើមបានជ័យជម្នះក្នុងលទ្ធផល ៥-២ របស់អាល្លឺម៉ង់ លើក្រុមជម្រើសជាតិអ៊ីតាលី ក្នុងកីឡដ្ឋាន Olympic នៅទីក្រុងប៊ែរឡាំង កាលពីឆ្នាំ១៩៣៩ អ៊ីចឹងដែរ។
អ្នកចាំទី Manuel Neuer ប្រធានក្រុមនៃក្រុមជម្រើសជាតិអាល្លឺម៉ង់ បាននិយាយថា លទ្ធផល គឺជាសមិទ្ធផលដ៏សំខាន់មួយសម្រាប់ក្រុមរបស់ខ្លួន។ រូបគេបានឲ្យដឹងថា៖ «អ្នកអាចប្រាប់នៅថ្ងៃនេះថា យើងចង់បង្ហាញពីភាពខ្លាំងរបស់យើង»៕
ប្រភពព័ត៌មាន៖ Channel News Asia
