កីឡាករថៃ រិទ្ធី របស់កម្ពុជា បានកត់ត្រាជ័យជម្នះដ៏រំភើបក្នុងការប្រកួតជាលើកទី១របស់ខ្លួនក្នុងកម្មវិធីរបស់ ONE Championship ពេលប្រកួតជាមួយកីឡាករ Jerome S Paye សញ្ជាតិលីប៊ឺរី ក្នុងការប្រកួតព្រឹត្តិការណ៍យុទ្ធគុនចម្រុះ ONE: Total Victory នៅលើសង្វៀន Jakarta Convention Center កាលពីយប់ថ្ងៃសៅរ៍។
ប៉ុន្តែ កីឡាករកម្ពុជាពីរនាក់ផ្សេងទៀតដែលរួមមានស៊ីម ប៊ុនស្រ៊ុន និងផាត់ សូដា សុទ្ធសឹងបានរងបរាជ័យដ៏គួរឲ្យសោកស្តាយដូចគ្នាពេលប្រកួតជាមួយនឹងកីឡាករម្ចាស់ផ្ទះ Stefer Rahardian និង Adrian Matheis រៀងៗខ្លួន។ ក្នុងការប្រកួតក្នុងទម្ងន់៦៨,៣គីឡូក្រាម ថៃ រិទ្ធី បានគ្រប់គ្រងលើគូប្រកួតទាំងស្រុងចាប់តាំងពីទឹកទី១ តាមរយៈការប្រើប្រាស់ស្នៀតគុនខ្មែររបស់ខ្លួន ដើម្បីគ្រប់គ្រងទៅលើដៃគូ ហើយបើទោះបី S Paye បានប្រើប្រាស់ស្នៀតដើម្បីព្យាយាមក្លេទៅលើរិទ្ធី ក៏ដោយ ប៉ុន្តែ កីឡាករកម្ពុជារូបនេះបានដោះខ្លួន និងគេចផុតយ៉ាងល្អ រហូតដល់បញ្ចប់ទឹកទី១។
ក្រោយពីការប្រកួតនេះបានចាប់ផ្តើមភ្លាមៗក្នុងទឹកទី២ ទាំងកីឡាករថៃ រិទ្ធី និងកីឡាករ S Paye បានចូលប្តូរកណ្តាប់ដៃគ្នា ប៉ុន្តែ ការវាយចំគោលដៅយ៉ាងល្អជាបន្តបន្ទាប់ បានធ្វើឲ្យរិទ្ធី បញ្ចប់ដៃគូរបស់ខ្លួនតិចជាងរយៈពេល១នាទីក្នុងទឹកនោះតែម្តង។ ប៉ុន្តែ ក្នុងការប្រកួតនាថ្ងៃនាថ្ងៃដដែលនោះរបស់កីឡាករកម្ពុជាពីរនាក់ផ្សេងទៀត ផាត់ សូដា និងស៊ីម ប៊ុនស្រ៊ុន សុទ្ធសឹងបានជួបការខកចិត្ដដូចគ្នា ក្រោយពីចាញ់កីឡាករ Matheis និង Rahardian របស់ឥណ្ឌូនេស៊ី ដោយស្នៀតក្លបំពង់ខ្យល់ក្នុងទឹកទី១រៀងៗខ្លួន៕