អ្នកប្រដាល់វ័យក្មេង អេលីត កែវឡុង បានក្លាយជាកីឡាករកម្រិតB ដែលបានឈ្នះប្រាក់លាន ពីការប្រកួតដណ្តើមជើងឯកម៉ារ៉ាតុង នៅលើសង្វៀន PNN មុនគេ ហើយ កែវឡុង ក៏ជាបេក្ខភាព ដែលនឹងទទួលបានប្រាក់តម្លៃខ្លួនខ្ពស់ សម្រាប់ការបង្ហាញខ្លួនក្រោយៗ នៅលើសង្វៀនមួយនេះផងដែរ។
សម្រាប់ការប្រកួតដណ្តើមជើងឯកម៉ារ៉ាតុង ទម្ងន់៥៧គីឡូក្រាម កាលពីថ្ងៃអាទិត្យ ម្សិលមិញនេះ អេលីត កែវឡុង បានចាប់ឆ្នោតប៉ះកីឡាករ លន់ សៀកឡេង ហើយតាមរយៈការប្រកួតយ៉ាងស្វិតស្វាញត្រឹម៣ទឹកនោះ កែវឡុង បានយកឈ្នះ សៀកឡេង ដោយពិន្ទុដាច់ ចំណែក ពុទ្ធ ម៉ាណូយ ក៏បានទម្លាក់ រឿង សារិទ្ធ ជាមួយការយកឈ្នះដោយពិន្ទុដាច់ដូចគ្នា។
យ៉ាងណាក៏ដោយ សម្រាប់ការប្រកួតផ្តាច់ព្រ័ត្រ ដែលត្រូវបានធ្វើឡើងក្នុងថ្ងៃតែមួយនោះ អេលីត កែងឡុង នៅតែធ្វើបានល្អ ក្នុងការយកឈ្នះលើ ពុទ្ធ ម៉ាណូយ ដើម្បីក្លាយជាម្ចាស់ជើងឯក ជាមួយប្រាក់រង្វាន់២,៦លានរៀល ដោយប្រើការប្រកួតសរុបត្រឹម៦ទឹក ចំណែក ពុទ្ធ ម៉ាណូយ បានប្រាក់រង្វាន់ ១,២លានរៀល។
គួរបញ្ជាក់ថា ការប្រកួតដណ្តើមជើងឯកម៉ារ៉ាតុងនេះ ត្រូវបានប្រកាស ក្នុងសន្និសីទកាសែត នៅមុនការប្រកួត កាលពីថ្ងៃអាទិត្យ ម្សិលមិញនោះតែម្តង គឺព្រឹត្តិការណ៍នេះ ត្រូវបានសម្រេចឲ្យរៀបចំឡើង ជំនួសទៅនឹងការប្រកួតដណ្តើមខ្សែក្រវាត់មាស អមដោយប្រាក់រង្វាន់១ម៉ឺនដុល្លារ ដែលត្រូវបានរៀបចំឡើង២រដូវកាលកន្លងមក។
ការផ្លាស់ប្តូររូបមន្តប្រកួតពីការដណ្តើមខ្សែក្រវាត់មាស មកជាការប្រកួតដណ្តើមជើងឯកម៉ារ៉ាតុងនេះ ត្រូវបានលោក ស្រ៊ឺ ស្រេង ហៅ សំណព្វ ប្រធានគ្រប់គ្រងកីឡាប្រចាំនៅ PNN បានលើកឡើង នៅក្នុងសន្និសីទកាសែត កាលពីថ្ងៃអាទិត្យ ថា ដើម្បីធ្វើឲ្យការប្រកួតកាន់តែប្លែក ទាក់ទាញ និងផ្តល់ផលប្រយោជន៍ដល់ការអភិរក្ស និងអភិវឌ្ឍគុនខ្មែរ ជាពិសេស ដើម្បីចូលរួមកសាងធនធានកីឡាករក្នុងកម្រិតB ឲ្យកាន់តែមានគុណភាព សម្រាប់ត្រៀមការប្រកួតស៊ីហ្គេម ឆ្នាំ២០២៣ ដែលកម្ពុជា ត្រូវធ្វើជាម្ចាស់ផ្ទះ។
បន្ថែមលើនេះ ក្រៅពីការទទួលបានប្រាក់រង្វាន់ចំនួន ២,៦លានរៀល ក្នុងការប្រកួតដណ្តើមជើងឯកម៉ារ៉ាតុងនេះ គឺកីឡាករទទួលបានលេខ១ គឺសង្វៀន PNN បានសន្យាថា នឹងផ្តល់តម្លៃខ្លួនប្រកួតមិនក្រោម ១,២លានរៀល សម្រាប់ការប្រកួតក្រោយៗ នៅ PNN ហេតុនេះ អេលីត កែវឡុង ជាបេក្ខភាពដំបូងគេ ដែលនឹងទទួលបានអត្តប្រយោជន៍មួយនេះ៕