កីឡាករប្រដាល់ Floyd Mayweather បានបញ្ជាក់ថា រូបគេនឹងធ្វើដំណើរទៅកាន់ការចូលនិវត្តន៍ជាអចិន្ត្រយ៍របស់គេ ក្រោយពីបានបង្កើតប្រវត្តិសាស្ត្ររបស់គេក្នុងកីឡាប្រដាល់តាមរយៈការកត់ត្រាជ័យជម្នះជាលើកទី៥០ជាប់ៗគ្នារបស់គេ នៅពេលប្រកួតជាមួយនឹងអ្នកប្រយុទ្ធគុនចម្រុះ Conor McGregor កាលពីថ្ងៃសៅរ៍ (ត្រូវនឹងព្រឹកថ្ងៃអាទិត្យនៅកម្ពុជា)។
កីឡាករអាមេរិកវ័យ៤០ឆ្នាំរូបនេះ បានគ្រប់គ្រងលើ McGregor ទាំងស្រុងក្នុងការប្រកួតនៅទឹកទី១០នាសង្វៀន T-Mobile Arena ដើម្បីផ្តួលតារាប្រដាល់គុនចម្រុះ (MMA) ឲ្យសន្លប់ដោយបច្ចេកទេស។ ជ័យជម្នះនេះធ្វើឲ្យ Mayweather ដែលបានចាកចេញពីការចូលនិវត្តន៍រយៈពេល២ឆ្នាំ ដើម្បីជួបជាមួយនឹង McGregor ឡើងឈរពីលើអតីតកីឡាករប្រដាល់ទម្ងន់ Rocky Marciano ជាមួយនឹងកំណត់ត្រាឈ្នះ៥០លើក មិនដែលចាញ់។ ក្រោយពីសេចក្តីប្រដាល់ក្នុងទម្ងន់៦៦,៧គីឡូក្រាមរូបនេះ បានបញ្ជាក់ថា រូបគេនឹងមិនបង្ហាញខ្លួននៅលើសង្វៀនប្រកួតម្តងទៀតឡើយ។
ក្រោយពីកោតសរសើរលើដៃគូប្រកួតរបស់ខ្លួន Mayweather បានបញ្ជាក់ថា៖ «ពិតណាស់ នេះគឺជារាត្រីប្រកួតចុងក្រោយរបស់ខ្ញុំហើយ។ រាត្រីនេះ គឺជាការប្រកួតចុងក្រោយរបស់ខ្ញុំ។ នៅរាត្រីនេះ ខ្ញុំបានជ្រើសរើសយកដៃគូរាំដ៏ត្រឹមត្រូវដើម្បីរាំជាមួយ។ Conor គឺជាម្ចាស់ជើងឯកដ៏ខ្លាំងម្នាក់»។ កីឡាករអាមេរិករូបនេះ ក៏នឹងត្រូវទទួលបានប្រាក់តម្លៃខ្លួនប្រមាណជា២០០លានដុល្លារអាមេរិកផងដែរ ដើម្បីធ្វើឲ្យចំណូលសរុបក្នុងអាជីពរបស់គេមានចំនួន១ពាន់លានដុល្លារអាមេរិក។ ស្របពេលជាមួយគ្នានេះ McGregor ដែលជាតារាប្រដាល់គុនចម្រុះក្នុងអង្គភាព Ultimate Fighting Championship នោះត្រូវបានរំពឹងទុកថា ទទួលបានតម្លៃខ្លួន១០០លានដុល្លារអាមេរិក៕
