ក្រុមបិសាចក្រហម Man.United បានបញ្ចប់តួនាទីលោក Jose Mourinho នៅពាក់កណ្តាលរដូវកាល ២០១៨-២០១៩ នេះ ជាមួយនិងបញ្ហាចំរូងចម្រាស់មួយចំនួនដែលមិនទាន់ ត្រូវបានដោះស្រាយនៅឡើយនោះ។ ទោះបីជាបែបនេះក្តីមានកីឡាករមួយចំនួនសម្តែងនៅក្តីសប្បាយរីករាយ ដោយហេតុផលកន្លងមកពួកគេមិនមានទំនាក់ទំនងល្អជាមួយអ្នកចាត់ការទូទៅសញ្ជាតិព័រទុយហ្គាល់រូបនេះ។
ឧទាហរណ៏ជាក់ស្តែងអាជីពរបស់កីឡាករវ័យក្មេងមួយចំនួនមានដូចជា Pogba, Anthony Martial និង Marcus Rashford ហាក់ដូចជានៅទ្រឹងក្រោមការដឹកនាំរបស់គ្រូបង្វឹក Mourinho ខណៈដែល Andreas Pereira ដូចកាន់តែឃ្លាតឆ្ងាយជាងនេះទៀត។ ហើយការពិតលោក Mourinho ត្រៀមនិងលក់រូបគេនៅខែមករាដែលមានការព្យាករណ៏ថា ការសម្រេចចិត្តនេះនិងធ្វើអោយ ក្លឹបសោកស្តាយនៅពេលអនាគត។
ត្រលប់ទៅមើលពីអតីតកាលលោក Mourinho ធ្លាប់បានលក់កីឡាករវ័យក្មេងជាច្រើនមុនកិច្ចសន្យាអស់សុពលភាពក៏ដូចជាកំពុងលេង នៅក្លឹប Manchester United រឺមិនបានផ្តល់ឱកាសគ្រប់គ្រាន់សម្រាប់ពួកគេដើម្បីបង្ហាញខ្លួន។
ខាងក្រោមនេះជាកីឡាករឆ្នើម ៥រូបដែលបង្ហាញទម្រង់លេងលេចធ្លោក្រោយលោក Mourinho លក់ពួកគេចេញពីក្លឹប:
១. Memphis Depay
ខ្សែប្រយុទ្ធវ័យ ២៤ឆ្នាំ Memphis Depay បានផ្ទេរពីក្រុម PSV មក Manchester United ក្នុងឆ្នាំ២០១៥ ជាមួយនឹង ការរំពឹងទុកក្រោយពីរូបគេ រកបាន ២៨គ្រាប់ក្នុង ៤០ប្រកួតនិងជួយឱ្យ PSV ឈ្នះពានរង្វាន់លីកកំពូលហូឡង់ Eredivisie ក្នុងឆ្នាំ ២០១៤-២០១៥។ នៅខែមករា ឆ្នាំ២០១៧ ក្រោយពីលោក Mourinho ចូលមកដឹកនាំក្រុមជំនួសអតីតគ្រូបង្វឹក លោក Luis Van Gaal កីឡាករអន្តរជាតិហូឡង់រូបនេះ ត្រូវបានលោក Mourinho លក់ទៅក្រុម Lyon នៅខែមករា ឆ្នាំ២០១៧។ ក្រោយមកដល់ក្រុម Lyon ពេលនេះ Depay បង្ហាញទម្រង់លេងដល់ចំនុចកំពូល មានន័យថារូបគេអាចលេងបានពហុជំនាញមិនថាប្រយុទ្ធនៅស្លាបឆ្វេង-ស្តំា និងកណ្តាល ព្រមជាមួយកំនត់ត្រាស៊ុតបញ្ចូលទីបាន ៣៣គ្រាប់និង Assist ៣៤ដងអោយក្រុម Lyon និង រកបាន ៨គ្រាប់ក្នុងការប្រកួតសរុប ១៦ដងអោយក្រុមជម្រើសជាតិផងដែរ។
២. Romelu Lukaku
ជារឿងគួរអស់សំណើច ដែលលោក Mourinho បានលក់ Romelu Lukaku កាលនៅក្លឹបតោខៀវ Chelsea ក្រោយមកបានចុះហត្ថលេខាជាមួយតម្លៃដ៏ថ្លៃនាំយករូបគេមកកាន់ក្រុម Manchester United ក្នុងឆ្នាំ២០១៧។
Lukaku បានផ្ទេរពី Anderlecht មកចូលរួមជាមួយក្រុម Chelsea កាលពីឆ្នាំ២០១១ ប៉ុន្តែដោយសារមានឱកាសចូលលេងតិចតួចក្រុម West Brom បានខ្ចីជើងទៅ នៅរដូវកាល ២០១២/២០១៣ និងស៊ុតបញ្ចូលទីបាន ១៧គ្រាប់ក្នុង ៣៥ប្រកួតនៅក្របខ័ណ្ឌ Premier League។ នៅរដូវកាល ២០១៤-២០១៥ Lukaku បានផ្ទេរពី Chelsea ទៅលេងអោយក្រុម Evertonជាមួយកំនត់ត្រារកបាន ៨៧គ្រាប់ គ្រប់ក្របខណ្ឌប្រកួតចំនួន ១៦៦លើក។ សម្រាប់ក្រុមជម្រើសជាតិបែលហ្សិក Lukaku ជាកីឡាករនាំមុខគេដោយរកគ្រាប់បាល់បាន ៤៥គ្រាប់ក្នុង ៧៩ប្រកួត។
៣. Leonardo Bonucci
លោក Jose Mourinho បានជួយក្រុម Inter Milan ឈ្នះពានរង្វាន់បីជាប្រវត្តិសាស្ត្រ កាលពីឆ្នាំ២០១០។ Leonardo Bonucci ត្រូវបានក្លឹប Treviso នៅក្របខណ្ឌ Serie B និង Perisa មុនពេលលក់រូបគេទៅអោយក្រុម Genoa។ នៅឆ្នាំ២០១០ ក្រុម Juventus បាននាំយក Bonucci មករួមក្រុមនិងបានបង្ហាញទម្រង់លេងដ៏ល្អបំផុតនៅតំបន់ការពារកណ្តាលព្រមទាំង ជួយក្រុមឈ្នះពានជាច្រើនដូចជា SerieA, SerieA Footballer of the year, FIFPro World XI ២០១៧ជាដើម។
៤. Kevin De Bruyne
នៅឆ្នាំ២០១៣ Debruyne បានវិលត្រលប់មកលេងអោយក្រុម Chelsea វិញក្រោយលេងក្នុងលក្ខណ្ឌខ្ចីជើងនៅក្រុម Weder Bremen។ ក្រោយពីបានចាប់ផ្តើមត្រឹមតែ ៥ប្រកួតប៉ុណ្ណោះក្នុងរដូវកាល ២០១៣/២០១៤ ក្រោមការដឹកនាំរបស់លោក Jose Mourinho ខ្សែបម្រើអន្តរជាតិបែលហ្សិករូបនេះ បានចាកចេញពី Chelsea ទៅចូលរួមជាមួយ Wolfsburg។ គាត់មានរដូវកាលដ៏អស្ចារ្យមួយសម្រាប់ក្រុម Wolfsburg រដូវកាល២០១៤-២០១៥ ដោយស៊ុតបញ្ចូលទីបាន ១៦គ្រាប់និង Assistបាន ២៧ដង ក្នុងការប្រកួតសរុប ៥១លើក ហើយត្រូវបានជាប់ឈ្មោះជាកីឡាករឆ្នើមប្រចាំឆ្នាំនៃក្របខ័ណ្ឌ Bundesliga ផងដែរ។ ក្រោយផ្ទេរមកក្រុម Man.City នៅឆ្នាំ២០១៥ និងឈានដល់រដូវកាល២០១៧-២០១៨ Debruyne បានបង្ហាញទម្រង់លេងដល់ចំនុចកំពូលដោយស៊ុតបញ្ចូលទីបាន ១២គ្រាប់និង Assist ២១ដង នៅក្នុងការប្រកួតទាំងអស់សម្រាប់ Man City និងជាប់ជាកីឡាករ Assist បានច្រើនបំផុតនៅក្នុងលីកកំពូល ៥ របស់ទ្វីបអឺរ៉ុប។
៥. Mohamed Salah
Salah ស្ទើរតែនិងផ្ទេរទៅលេងនៅ Liverpool ប៉ុន្តែត្រូវបានក្រុម Chelsea នាំយកមករួមក្រុមនាពេលនោះ។ក្រោមការដឹកនាំរបស់លោក Mourinho នាពេលនោះ Salah ពិបាកនិងបង្ហាញវត្តមានជាប់លាប់ ដោយបង្ហាញខ្លួនបាន ៦ដងប៉ុណ្ណោះ(កីឡាករបម្រុង)ក្នុងចំនោម ១២ប្រកួត។ ក្រោយមកទៀតនៅឆ្នាំ២០១៥ Salah បានផ្ទេរទៅលេងនៅក្របខណ្ឌ SerieA ជាមួយក្រុម Fiorentina (ខ្ចីជើង)និងRoma។ ក្រោយមកទៀតនៅឆ្នាំ២០១៦-២០១៧បានបង្ហាញទម្រង់លេងល្អ និងត្រូវក្រុម Liverpool នាំយកមករួមក្រុមរដូវកាល២០១៧-២០១៨ ជាមួយរដូវកាលដំបូង Salah ស៊ុតបញ្ចូលទី បាន ៤៤គ្រាប់ក្នុង ៥២ប្រកួត និងរដូវកាលថ្មី(២០១៨-២០១៩)នេះរកបានបន្ថែម ១៣គ្រាប់ព្រមជាមួយ ១៨ Assist អាចនិយាយបានថាល្អបំផុតសម្រាប់កីឡាករដែលត្រូវលោក Mourinho មើលរំលងនាពេលកន្លងមក។
ប្រភព៖ sportskeeda
