បើគិតមកដល់ពេលនេះលីគបាល់ទះថៃ និងវៀតណាម សុទ្ធតែបង្កើតឡើងបានជាង១០ឆ្នាំដូចគ្នា រីឯ លីគបាល់ទះអាជីពកម្ពុជាវិញ ទើបតែបង្កើតឡើងកាលពីឆ្នាំមុន ពោលគឺបានមួយឆ្នាំប៉ុណ្ណោះ។
១-លីគបាល់ទះវៀតណាម៖ ក្លឹបបាល់ទះអាជីពរបស់វៀតណាមមាន ១២ ក្រុម ពានរង្វាន់បាល់ទះលីគនេះត្រូវបានបង្កើតឡើងកាលពីឆ្នាំ២០០៤ ពោលគឺ ១៤ឆ្នាំហើយ។ ចំណែកក្លឹបកំពុងលេងនៅលីគអាជីពនេះមានចំនួន ១២ រួមមាន Thể Công , Biên phòng, Becamex ARMY 4 , Long An, Công an TPHCM , VLXD Bình Dương, Sanest Khánh Hòa , Maseco TPHCM, Tràng An Ninh Bình, Hà Tĩnh , SXKT Vĩnh Long និង Quân khu 4 ។
២-លីគបាល់ទះអាជីពថៃ៖ ក្លឹបបាល់ទះអាជីពរបស់ថៃមានចំនួន ៨ ដែលក្លឹបទាំង ៨ នេះកំពុងប្រកួតក្នុងលីគបាល់ទះលំដាប់កំពូលរបស់ថៃ លីគអាជីពនេះត្រូវបានបង្កើតឡើងកាលពីឆ្នាំ២០០៥ ពោលគឺ១៣ ឆ្នាំ។ ក្លឹបទាំង ៨ រួមមាន Air Force , Cosmo Chiang Rai, Kasetsart, Khonkaen Municipal, Diamond Food RMUTL Phitsanulok, Samanan Ratchaburi និង Visakha។
៣-លីគបាល់ទះកម្ពុជា៖ សម្រាប់កម្ពុជាឆ្នាំ២០១៨មិនទាន់កំណត់បានថា មានការប្រកួតលីគបាល់ទះអាជីពមានឬយ៉ាងណាទេ បើទោះកាលពីឆ្នាំមុនលីគអាជីពត្រូវបានបង្កើតឡើងក្ដី។ ដោយផ្អែកលើការបញ្ជាក់របស់លោក បឹង គឹមតោ អគ្គលេខាធិការសហព័ន្ធបាល់ទះកម្ពុជាថា ត្រូវរង់ចាំមើលសិន។ សម្រាប់ក្លឹបបាល់ទះអាជីពរបស់កម្ពុជាវិញសព្វថ្ងៃមានចំនួន ៤ ដែលមានសកម្មភាពគឺមាន វិសាខា ក្រសួងមហាផ្ទៃ កងពងធំអន្តរាគមលេខ៣ និងបញ្ជាការដ្ឋានអង្គរក្ស។ ដោយឡែកពីរក្លឹបទៀតគឺសាលាខេត្តកំពង់ចាម និងស្នងការនគរបាលខេត្តបាត់ដំបងមិនមានសកម្មភាព៕
Via :news.sabay
