ភ្នំពេញៈ ក្រុមសីដក់ដេអិន គ្រោងនឹងបង្កើនការហ្វឹកហាត់ឲ្យបានកាន់តែខ្លាំង ដើម្បីត្រៀមការប្រកួតកីឡាសីដក់ជ្រើសរើសជើងឯកថ្នាក់ជាតិ ឆ្នាំ ២០១៨ បន្ទាប់ពីក្រុមមួយនេះ បានជម្នះការប្រកួតយ៉ាងស្វិតស្វាញ ដើម្បីក្លាយជាម្ចាស់ជើងឯកការប្រកួតកីឡាសីដក់«ពានរង្វាន់សម្ព័ន្ធសីដក់ លើកទី ១ ឆ្នាំ ២០១៨» ដែលបានបញ្ចប់កាលពីថ្ងៃអាទិត្យ។
លោក ស្រូយ សុវណ្ណរ៉ា ប្រធានក្លិបកីឡាសីដក់ដេអិន បានថ្លែងក្រោយការប្រកួតថា៖ «ការប្រកួតនេះ ពិតជាមានភាពស្វិតស្វាញមែនទែន ព្រោះមានក្លិបល្អៗចូលរួមប្រកួតច្រើន។ យើងបានជួបការលំបាកតាំងពីការប្រកួតលើកទី ១ រហូតដល់វគ្គផ្តាច់ព្រ័ត្រ ប៉ុន្តែការទទួលបានជោគជ័យនៅថ្ងៃនេះ ដោយសារក្រុមរបស់យើង បានសហការគ្នាល្អ ទាំងថ្នាក់ដឹកនាំ និងកីឡាករ ពិសេសយើងបានប្រមូលផ្តុំគ្នាហ្វឹកហាត់ជារៀលល្ងាច នៅម្តុំក្តាន់ ២»។
ក្រុមសីដក់ដេអិន បានក្លាយជាម្ចាស់ជើងឯក ការប្រកួតកីឡាសីដក់ពានរង្វាន់សម្ព័ន្ធសីដក់ លើកទី ១ ឆ្នាំ ២០១៨ ក្រោយពេលពួកគេបានយកឈ្នះក្រុមសីដក់ក្រសួងការពារជាតិ ២-០ ក្នុងការប្រកួតវគ្គផ្តាច់ព្រ័ត្រ ដែលត្រូវបានធ្វើឡើង នៅពហុកីឡដ្ឋានជាតិ កាលពីល្ងាចថ្ងៃអាទិត្យ ហើយក្រុមសីដក់គ្លីនិកហំសីហៈ បានយកឈ្នះក្រុមសីដក់ព្រះខ័នរាជ ដើម្បីទទួលបានចំណាត់ថ្នាក់លេខ ៣ ។
យ៉ាងណាក៏ដោយ មុននឹងបានឡើងមកជួបក្រុមសីដក់ក្រសួងការពារជាតិ នៅវគ្គផ្តាច់ព្រ័ត្រ កាលថ្ងៃអាទិត្យនោះ កីឡាករ ស៊ុក សុវណ្ណដា, រាជ ប៊ុនរាម, សុន រ៉ាវី, ចាន់ មីនា និងកីឡាករ ឈិន វិទូ របស់ក្លិបសីដក់ដេអិន បានសហការគ្នាលេងយ៉ាងល្អ ក្នុងការប្រកួតវិលជុំ នៅរៀងរាល់ថ្ងៃសៅរ៍ និងថ្ងៃអាទិត្យ ដែលបានចាប់ផ្តើមតាំងពីថ្ងៃទី ៣ ខែមីនា មក។
ក្រុមកីឡាសីដក់តំណាងឲ្យក្លិបចំនួន ៩ បានដាក់ពាក្យចូលរួមការប្រកួតកីឡាសីដក់ពានរង្វាន់សម្ព័ន្ធសីដក់ ប្រចាំឆ្នាំ ២០១៨ នេះ ក្នុងនោះមានក្លិបកីឡាសីដក់ក្រសួងការពារជាតិ, ព្រះខ័នរាជ, គ្លីនិកហំសីហៈ, យុវខេមរា, បានលុង, ដេអិន, ទន្លេបាសាក់, មេគង្គកីឡា, និងក្លិបកីឡាសីដក់អូឡាំពិក ហើយក្លិបទាំងនេះ អាចនឹងវិលមកជួបគ្នាម្តងទៀត ក្នុងការប្រកួតកីឡាសីដក់ជ្រើសជ្រើសរើសជើងឯកថ្នាក់ជាតិ ឆ្នាំ ២០១៨ ដែលនឹងគ្រោងធ្វើពីថ្ងៃទី១ ដល់ថ្ងៃទី ៧ ខែកក្កដា ខាងមុខនេះ។