ក្រុងកាឌីហ្វ: កីឡាករ Anthony Joshua បានអំពាវនាវឲ្យមានការប្រកួតដណ្តើមខ្សែក្រវាត់ទម្ងន់ធ្ងន់រួមជាមួយនឹងកីឡាករ Deontay Wilder តាមរយៈការបញ្ជាក់ថា ខ្លួនមិនមានពេល «ក្នុងការសម្រាកឡើយ និងជិះសេះលែងដៃ» ក្រោយពីបានផ្តួលកីឡាករ Joseph Parker ក្នុងការប្រកួតនៅទីក្រុង Cardiff កាលពីថ្ងៃសៅរ៍ កន្លងមក។
Joshua បានបន្ថែមខ្សែក្រវាត់ទម្ងន់ធ្ងន់ពីស្ថាប័ន WBO របស់ Parker ទៅលើខ្សែក្រវាត់របស់គេដែលរួមមានខ្សែក្រវាត់ពីសហព័ន្ធកីឡាបាល់ទាត់អន្តរជាតិ (IBF) និងសមាគមកីឡាប្រដាល់ពិភពលោក (WBA) តាមរយៈការយកឈ្នះពិន្ទុជាឯកច្ឆន្ទលើកីឡាករសញ្ជាតិនូវែលសេឡង់រូបនេះ ក្រោយពីបានធ្វើការប្រកួត ១២ ទឹកពេញជាលើកទី ១ របស់គេក្នុងអាជីពប្រដាល់មិនស្គាល់ចាញ់ចំនួន ២១ លើក។បច្ចុប្បន្នសម្ពាធផ្សេងៗ នឹងកើនឡើងសម្រាប់ការប្រកួតដណ្តើមខ្សែក្រវាត់រួមមួយជាមួយនឹងកីឡាករប្រដាល់អាមេរិក Wilder ដែលជាម្ចាស់ខ្សែក្រវាត់ WBC។
ក្រោយពីចៅក្រមបានផ្តល់ពិន្ទុឈ្នះ១១៨-១១០ ១១៨-១១០ និង១១៩-១០៩ កីឡាករ សញ្ជាតិអង់គ្លេស Joshua បាននិយាយនៅលើសង្វៀនភ្លាមៗថា៖ «ខ្ញុំចង់ជួបជាមួយ Wilder។ សូមរៀបចំឲ្យរូបគេឡើងសង្វៀន ហើយខ្ញុំនឹងផ្តួលរូបគេឲ្យសន្លប់»។ប៉ុន្តែ ម្ចាស់មេដាយមាសអូឡាំពិកឆ្នាំ ២០១២ ក្នុងទីក្រុងឡុងដ៍រូបនេះ បានស្ថិតក្នុងអារម្មណ៍ល្អប្រសើរជាង ក្នុងសន្និសីទសារព័ត៌មានបន្ទាប់ពីការប្រកួត។
Joshua ដែលស្ថិតក្រោមការគ្រប់គ្រងរបស់អ្នករៀបចំការប្រកួតលោក Eddie Hearn និងលោកគ្រូបង្វឹក Rob McCracken បានឲ្យដឹងថា៖ «ឆ្នាំ ២០១៨ តែងតែជាពេលវេលាក្នុងការដណ្តើមយកខ្សែក្រវាត់ទាំងអស់។ បច្ចុប្បន្ន យើងនៅសល់ខ្សែក្រវាត់តែ ១ ទៀតទេ។ ក្នុងភ្នែករបស់ខ្ញុំ វាគ្មានពេលក្នុងការសម្រាក និងត្រូវជិះសេះលែងដៃឡើយ»។
កីឡាករប្រដាល់មិនស្គាល់ចាញ់ Wilder បានប្រើប្រាស់បណ្តាញសង្គម Twitter ក្រោយពីការប្រកួតកាលពីថ្ងៃសៅរ៍ពីមុខអ្នកទស្សនាចំនួន ៧៨០០០ នាក់នៅសង្វៀន Principality ដើម្បីបញ្ជាក់ថា រូបគេពិតជា «បុរសខ្លាំងបំផុត និងឆ្នើមបំផុតនៅក្នុងពិភពលោក»។
កីឡាករ Joshua បានធ្វើការបដិសេធក្នុងការឆ្លើយតបទៅនឹងការបញ្ចេញមតិរបស់ Wilder ក្នុងនោះរាប់បញ្ចូលទាំងការលើកឡើងកាលពីមុននៅពេលដែលកីឡាករអាមេរិករូបនេះ បាននិយាយថា រូបគេចង់បានរាងកាយមួយស្ថិតនៅលើកំណត់ត្រារបស់គេ ផងដែរ៕
