គ្រូបង្គោលក្រុមអាស៊ីអឺរ៉ុបយូណាយធីត លោក សុក វាសនា នឹងត្រូវដឹកនាំក្រុមរបស់លោក ទៅជួបក្រុមម្ចាស់ផ្ទះកំពុងស្រេកឃ្លានការឈ្នះ៣ពិន្ទុ ព្រះខ័នរាជស្វាយរៀង នៅកីឡដ្ឋានខេត្តស្វាយរៀង នាល្ងាចម៉ោង៦ ថ្ងៃសៅរ៍ចុងសប្តាហ៍នេះ ខណៈពេលនេះ លោកកំពុងមានទុកក្រៀមក្រំ។
ខណៈការប្រកួតកាន់តែខិតចូលមកដល់នោះ លោក សុក វាសនា បានសរសេរប្រកាសនៅលើហ្វេសប៊ុករបស់ខ្លួនថា លោកកំពុងតែមានទុក្ខក្រៀមក្រំ ដោយសារតែយាយរបស់លោកឈ្មោះ លឹម ហៀង បានទទួលអនិច្ចកម្ម ដោយរោគាពាធ ក្នុងអាយុ៩៣ឆ្នាំ កាលពីម្សិលមិញ ហើយបានបូជា នៅវត្តឫស្សីស្រស់ ស្ថិតនៅសង្កាត់ព្រែកប្រា ខណ្ឌច្បារអំពៅ នាថ្ងៃរសៀលថ្ងៃព្រហស្បតិ៍នេះ។
បន្ថែមលើទុក្ខក្រៀមក្រំ លោក សុក វាសនា ត្រូវបានគេមើលឃើញថា ក៏កំពុងតែទទួលរងសម្ពាធ ក្នុងការដឹកនាំក្រុមអាស៊ីអឺរ៉ុប មកកាន់ទីលានប្រកួតជាថ្មីផងដែរ ព្រោះការវិលវិញនេះ ពួកគេ ត្រូវប្រឈមជាមួយក្រុមម្ចាស់ជើងឯក ព្រះខ័នរាជស្វាយរៀង ដែលមានការជឿជាក់ខ្លាំងបំផុត ក្នុងការដណ្តើមយក៣ពិន្ទុ។
លោក ជូ សារឿន គ្រូជំនួយក្រុមព្រះខ័នរាជស្វាយរៀង បានប្រាប់នៅថ្ងៃនេះថា៖«យើងនឹងខំប្រឹងប្រែងយកឈ្នះឲ្យបាន ព្រោះទិសដៅសំខាន់របស់យើង ត្រូវដណ្តើមឲ្យបាន៣ពិន្ទុ ពីក្រុមអាស៊ីអឺរ៉ុប ព្រោះនេះជាការប្រកួតនៅលើទឹកដីរបស់យើង ហើយក៏ដើម្បីរក្សាទីតាំងលេខ១របស់យើងផងដែរ»។
គួរបញ្ជាក់ថា សម្រាប់ការប្រកួតឡើងវិញនៃលីកកំពូលកម្ពុជា កាលពីសប្តាហ៍មុននេះ ក្រុមព្រះខ័នរាជស្វាយរៀង បានលត់ក្រុមយុវជនបាល់ទាត់ជាតិបាទី រហូតដល់ ១០-០ ដើម្បីប្រជែងយកលេខ១ ពីក្រុមភ្នំពេញក្រោន វិញ ដោយមាន១៦ពិន្ទុ ខណៈភ្នំពេញក្រោន បានត្រឹមស្មើ ២-២ជាមួយក្រុមវិសាខា នោះ។ ចំណែកក្រុមអាស៊ីអឺរ៉ុប ដែលទើបប្រកួតបាន៥ដងនោះ កំពុងឈរនៅលេខរៀងទី៨ ដោយមាន៧ពិន្ទុ ជាមួយការឈ្នះ២ ស្មើ១ និងចាញ់២ប្រកួត៕