ប្រទេសអង់គ្លេស៖ ក្លិប Manchester City កាលពីថ្ងៃពុធ បានប្រកាសពីការចុះហត្ថលេខាជាមួយនឹងខ្សែការពារ Nathan Ake របស់ក្លិប Bournemouth ក្នុងកិច្ចសន្យារយៈពេល៥ឆ្នាំ ខណៈដែលរូបគេជាកីឡាករចំណូលថ្មីទី២ដែលបានចូលរួមនៅកីឡដ្ឋាន Etihad ក្នុងពេលបើកទីផ្សារដោះដូរកីឡាករនារដូវនេះ។
ក្រុមរបស់លោក Pep Guardiola បានយល់ព្រមលើតម្លៃខ្លួន៤០លានផោន (ស្មើនឹង៥២លានដុល្លារអាមេរិក) សម្រាប់ខ្សែការពារកណ្តាលអន្តរជាតិហូឡង់រូបនេះ ខណៈដែលតម្លៃខ្លួននោះ អាចនឹងកើនដល់៤១លានផោន។ ការចុះហត្ថលេខានេះ កើតឡើង ត្រឹមតែ១ថ្ងៃ ក្រោយពីក្លិបបានប្រកាសថា ពួកគេបាននាំយកខ្សែបម្រើស្លាបអន្តរជាតិអេស្ប៉ាញ Ferran Torres ពីក្លិប Valencia។ Ake វ័យ២៥ឆ្នាំ បានឲ្យដឹងក្នុងសេចក្តីថ្លែងការណ៍មួយថា៖ «Man City គឺជាក្រុមដ៏ខ្លាំងបំផុតក្នុងក្របខ័ណ្ឌ Premier League ក្នុងរយៈពេល១ទសវត្សរ៍ក្រោយនេះ។ ការចូលរួមនៅទីនេះ គឺជាក្តីសុបិនមួយសម្រាប់ខ្ញុំ។
នេះគឺជាក្រុមកំពូលមួយ ដែលពោរពេញដោយកីឡាករកម្រិតពិភពលោក។ បើមើលគ្រប់ចំណុចទាំងអស់ក្នុងក្រុមនេះ យើងឃើញមានកីឡាករឆ្នើមៗជាច្រើន រួមជាមួយនឹងបទពិសោធអន្តរជាតិ»។លោក Txiki Begiristain ប្រធានផ្នែកកីឡាបាល់ទាត់របស់ Man City បានបញ្ជាក់ថា៖ «Nathan គឺជាខ្សែការពារដែលពោរពេញដោយគុណភាពម្នាក់»៕
ប្រភពព័ត៌មាន៖ Channel News Asia