បរទេស៖ ខ្សែការពារ Nathan Ake របស់ក្លិប Manchester City បានប្រកាសកាលពីថ្ងៃព្រហស្បតិ៍ថា ឪពុករបស់ខ្លួនបានទទួលមរណៈភាព ត្រឹមតែប៉ុន្មាននាទីប៉ុណ្ណោះ ក្រោយពីខ្សែការពារអន្តរជាតិហូឡង់រូបនេះ បានស៊ុតបាល់បញ្ចូលទីជាលើកដំបូងគេក្នុងក្របខ័ណ្ឌ Champions League។
Ake បានរកគ្រាប់បាល់បើកឆាក នៅនាទី ទី១៦ ក្នុងពេលក្រុមខ្លួនបានយកឈ្នះលើក្រុម RB Leipzig ក្នុងលទ្ធផល ៦-៣។ ប៉ុន្តែ ទោះបីជាយ៉ាងណា ឱកាសមាសរបស់កីឡាករវ័យ២៦ឆ្នាំរូបនេះ បានប្រែទៅជាសោកសៅវិញ ក្រោយពីឪពុករបស់គេគឺលោក Moise ដែលមានជំងឺប្រចាំកាយនោះ បានស្លាប់ភ្លាមៗបន្ទាប់ពីនោះ។ Ake បានសរសេរនៅលើបណ្តាញសង្គម Instagram ថា៖ «រយៈពេលប៉ុន្មានសប្តាហ៍ចុងក្រោយនេះ គឺជាពេលវេលាដ៏លំបាកបំផុតក្នុងជីវិតរបស់ខ្ញុំ។
ឪពុករបស់ខ្ញុំបានឈឺធ្ងន់ ហើយមិនអាចព្យាបាលបានឡើយ។ ម្សិលមិញ បន្ទាប់ពីជួបពេលវេលាដ៏លំបាកមួយ ខ្ញុំបានរកគ្រាប់បាល់ដំបូងរបស់ខ្ញុំក្នុង Champions League ហើយត្រមឹតែប៉ុន្មាននាទី គាត់បានលាចាកលោកទៅយ៉ាងមានក្តីសុខ ដោយមានម្តាយ និងបងប្រុសរបស់ខ្ញុំនៅក្បែរ»៕
ប្រភពព័ត៌មាន៖ Channel News Asia