បរទេស៖ ខ្សែការពារស្លាបឆ្វេងអន្តរជាតិអង់គ្លេស Ben Chilwell កាលពីថ្ងៃពុធ បានក្លាយជាកីឡាករចំណូលថ្មីដែលមានតម្លៃខ្លួនខ្ពស់ទី៣របស់ Chelsea នៅរដូវកាលនេះ ក្រោយពីបានចាកចេញពីក្លិប Leicester សម្រាប់តម្លៃខ្លួន៥០លានផោន (ស្មើនឹង៦៦លានដុល្លារអាមេរិក)។
ការផ្ទេររបស់ Chilwell ទៅកាន់កីឡដ្ឋាន Stamford Bridge ក្នុងកិច្ចសន្យារយៈពេល៥ឆ្នាំ កើតឡើង ក្រោយពីការចុះហត្ថលេខាជាមួយនឹងកីឡាករ Hakim Ziyech និង Timo Werner ពីក្លិប Ajax និង RB Leipzig ខណៈដែលក្លិប Chelsea ត្រូវបានរំពឹងទុកថា នឹងមានភាពមមាញឹកក្នុងទីផ្សារដោះដូរិកីឡាករ។ បើទោះបីទាំងក្លិប Chelsea និង Leicester មិនបានបង្ហាញតម្លៃខ្លួនជាផ្លូវការសម្រាប់កីឡាករ Chilwellក៏ដោយ ប៉ុន្តែ ក្លិបសាម៉ី បានចេញផ្សាយនៅលើគេហទំព័ររបស់ខ្លួនថា៖ «នេះគឺជាការផ្ទេរមួយក្នុងចំណោមការផ្ទេរដែលមានតម្លៃខ្លួនខ្ពស់បំផុតមកទល់ពេលនេះ»។ Chilwell វ័យ២៣ឆ្នាំ បានប្រាប់គេហទំព័ររបស់ Chelsea ថា៖ «ខ្ញុំពិតជារីករាយណាស់ដើម្បីចូលរួមជាមួយនឹងក្លិប Chelsea ក្នុងពេលវេលាដ៏រំភើបនេះ សម្រាប់ក្លិបនេះ»។
កីឡាកររូបនេះបានប្រាប់បន្តថា៖ «ខ្ញុំកំពុងតែសម្លឹងឆ្ពោះទៅកាន់ការចូលរួមជាមួយនឹងក្រុមដែលប្រជុំដោយកីឡាករវ័យក្មេង និងពោរពេញដោយថាមពល ក្រោមការដឹកនាំរបស់លោក Frank Lampard ខណៈដែលយើងនឹងប្រជែងដណ្តើមពានជាច្រើននៅសប្តាហ៍ក្រោយ»។ Chilwell ដែលជាផលិតចេញពីថ្នាលរបស់ក្លិប Leicester និងបានបង្ហាញខ្លួនអន្តរជាតិ១១លើកឲ្យក្រុមអង់គ្លេសនោះ បានបង្ហាញខ្លួនជាលើកទី១សម្រាប់ Leicester កាលពីខែតុលា ឆ្នាំ២០១៥ និងបានបង្ហាញខ្លួន១២៣លើកសម្រាប់ក្លិបនេះ៕
ប្រភពព័ត៌មាន៖ Channel News Asia
