យុវជនថ្នាលចំនួន៨នាក់ ត្រូវបានសហព័ន្ធកីឡាបាល់ទាត់កម្ពុជា បញ្ចប់ការសិក្សា និងហ្វឹកហាត់ ពីមជ្ឈមណ្ឌល និងសាលាកីឡាបាល់ទាត់ជាតិបាទី ខេត្តតាកែវ គឺពួកគេ នឹងត្រូវរំសាយទៅកាន់ក្លិប ឬសមាគមដើមរបស់ពួកគេវិញ។
យ៉ាងណាក៏ដោយ តាមសេចក្តីជូនដំណឹង កាលពីថ្ងៃអង្គារម្សិលមិញ សហព័ន្ធកីឡាបាល់ទាត់កម្ពុជា ក៏បានចាត់ទុកថា ជាការជូនដំណឹងដល់ក្លិបទាំង១២ កំពុងនៅលីកកំពូលកម្ពុជា ឲ្យមានទាក់ទងយុវជនទាំង៨នាក់នេះ យកទៅប្រកបអាជីព នៅតាមក្លិប ដែលចង់បានពួកគេផងដែរ។
នៅក្នុងសេចក្តីជូនដំណឹងនោះ បានបញ្ជាក់ថា៖«ព័ត៌មាននេះ ចាត់ទុកជាសេចក្តីជូនដំណឹងដល់ក្លិបទាំង១២ ដែលមានបំណងចុះកិច្ចសន្យាជាមួយយុវជនទាំងអស់នោះ ដើម្បីបន្តអាជីព នៅក្នុងក្លិបរបស់ខ្លួន គឺអាចធ្វើការទាក់ទងជាមួយកីឡាករទាំង៨រូបនោះ តាមរយៈសហព័ន្ធកីឡាបាល់ទាត់កម្ពុជា ដើម្បីទទួលបាននូវព័ត៌មាន និងលក្ខខណ្ឌផ្សេងៗ ក្នុងការរៀបចំធ្វើកិច្ចសន្យា»។
គួរបញ្ជាក់ថា យុវជនថ្នាលទាំង៨នាក់ ដែលត្រូវបានរំសាយពីមជ្ឈមណ្ឌល និងសាលាកីឡាបាល់ទាត់ជាតិបាទី នោះ រួមមានខ្សែការពារ រី លាភផេង ខ្សែបម្រើ ជូ ស៊ីនទិ ខ្សែប្រយុទ្ធ ស្រួច ជីវ័ណ្ណ ដែលអ្នកទាំង៣នេះ មានដើមកំណើតនៅខេត្តបន្ទាយមានជ័យ ខ្សែបម្រើ ភេម តៅសិញ អ្នកចាំទី កយ សាលីម ដែលពួកគេ មានដើមកំណើតនៅខេត្តកំពត ខ្សែការពារ តាំង ប៊ុនឆៃ នៅភ្នំពេញ ខ្សែបម្រើ អ៊ឹម វីនុន មកពីខេត្តស្វាយរៀង និងខ្សែប្រយុទ្ធ សេង សម្បត្តិ មានដើមកំណើតនៅខេត្តប៉ៃលិន។
ជុំវិញការចេញសេចក្តីជូនដំណឹង ស្តីពីការបញ្ចប់ការសិក្សារបស់យុវជនសាលាបាល់ទាត់ជាតិបាទី៨នាក់ ជាសាធារណៈនេះ ត្រូវបានមន្រ្តីជំនាញរបស់សហព័ន្ធកីឡាបាល់ទាត់កម្ពុជា ប្រាប់នៅថ្ងៃពុធនេះថា៖«ការធ្វើបែបនេះ ដើម្បីឲ្យមានតម្លាភាពដល់ក្លិបទាំង១២ បានដឹងដូចគ្នា កុំឲ្យមានពាក្យថា សហព័ន្ធ លាក់បាំងព័ត៌មាន ឬប្រាប់តែក្លិបមួយចំនួន អ៊ីចឹងក្រោយការជូនដំណឹងនេះ ក្លិបដែលចង់បានពួកគាត់ ទាំង៨នាក់នេះ អាចទាក់ទងមកសហព័ន្ធ បានដូចគ្នា»៕
