សហព័ន្ធកីឡាបាល់ទាត់កម្ពុជា (FFC) កាលពីព្រឹកថ្ងៃសុក្រនេះ បានប្រកាសពីការបញ្ចប់ការសិក្សា និងហ្វឹកហាត់របស់យុវជនចំនួន៥នាក់ នៅមជ្ឈមណ្ឌល និងសាលាកីឡាបាល់ទាត់ជាតិ បាទី គឺមានន័យថា ពួកគេ ដល់ពេលវេលា ដែលត្រូវប្រើចំណេះ និងជំនាញ នៅក្នុងអាជីពជាអ្នកបាល់ទាត់ ជាផ្លូវការហើយ។
តាមរយៈការប្រកាសព័ត៌មាន កាលពីព្រឹកថ្ងៃសុក្រនេះ FFC បានបញ្ជាក់ថា កីឡាករ កើត ពេជ, ហួត ដានីន, សៅ វឌ្ឍនា, យ៉ែម ពេជ្រមេសា និង ផាត សុខា ដែលបានក្រេបជញ្ជក់ចំណេះដឹងទាំងផ្នែកការសិក្សារៀនសូត្រ និងជំនាញបាល់ទាត់ អស់រយៈពេលជាច្រើនឆ្នាំ នៅមជ្ឈមណ្ឌល និងសាលាកីឡាបាល់ទាត់ជាតិ នោះ បានបញ្ចប់ការសិក្សា និងការហ្វឹកហាត់ ជាផ្លូវការហើយ។
ជាមួយគ្នានេះ FFC បានជូនដំណឹងដល់ក្លិប-សមាគមបាល់ទាត់ ជាសមាជិករបស់សហព័ន្ធកីឡាបាល់ទាត់កម្ពុជា ដែលមានបំណងចង់បានអ្នកទាំង៥នាក់នេះ យកទៅលេងឱ្យក្លិប ឬសមាគមរបស់ខ្លួន សូមទាក់ទងមកសហព័ន្ធ។
«សេចក្តីប្រកាសព័ត៌មាននេះ អាចចាត់ទុកជាការជូនដំណឹងដល់ក្លិប/សមាគមកីឡាបាល់ទាត់ ដែលជាសមាជិករបស់ FFC ដែលមានបំណងចង់ចុះកិច្ចសន្យាជាមួយនឹងយុវជនទាំងនោះ ដើម្បីបន្តអាជីព នៅក្នុងក្លិប/សមាគមរបស់ខ្លួន អាចធ្វើការទាក់ទងជាមួយនឹងកីឡាករទាំង៥រូបនោះ តាមរយៈសហព័ន្ធកីឡាបាល់ទាត់កម្ពុជា ដើម្បីទទួលបានព័ត៌មានពាក់ព័ន្ធ និងលក្ខខណ្ឌផ្សេងៗ ក្នុងការរៀបចំធ្វើកិច្ចសន្យា»។ FFC បានបញ្ជាក់ នៅក្នុងសេចក្តីប្រកាស៕