ការប្រកួតលីកកំពូលកម្ពុជា ឆ្នាំ២០២០ នៅថ្ងៃសៅរ៍ និងថ្ងៃអាទិត្យ ចុងសប្តាហ៍នេះ មិនមានការប្រជែងគ្នារវាងក្រុមកំពូលទាំង៦ (ចំណាត់ថ្នាក់ទាំង៦ក្រុមលើ) នោះទេ គឺមានតែការប្រកួតគ្នារវាងក្រុមចំណាត់ថ្នាក់ទាំង៧ក្រោម (ក្រុមលេខ៧ ដល់លេខ១៣) ប៉ុណ្ណោះ។
ការគ្មានវត្តមានប្រកួតរវាងក្រុមកំពូលទាំង៦ រួមមាន បឹងកេត ព្រះខ័នរាជស្វាយរៀង ភ្នំពេញក្រោន ណាហ្គាវើល វិសាខា និងក្រុមកងយោធពលខេមរភូមិន្ទ(ទ័ព) សម្រាប់ការប្រកួតលីកកំពូល នៅសប្តាហ៍នេះ ត្រូវបានគេដឹងច្បាស់ថា ដោយសារគណៈកម្មការប្រកួតបាល់ទាត់ជាតិកម្ពុជា (CNCC) បានទុកពេលឲ្យក្រុមទាំង៦នេះ សម្រាក ដើម្បីត្រៀមការប្រកួតជើងទី២ វគ្គ៨ក្រុមចុងក្រោយ ពានរង្វាន់សម្តេច ហ៊ុន សែន ឆ្នាំ២០២០ នៅថ្ងៃពុធ និងថ្ងៃ ព្រហស្បតិ៍ សប្តាហ៍ក្រោយនេះ។
ផ្ទុយទៅវិញ ក្រុមគិរីវង់សុខសែនជ័យ ដែលត្រូវប្រកួតពានសម្តេច ហ៊ុន សែន ដែរនោះ
ហាក់មិនទទួលបានភាពយុត្តិធម៌ ទៅនឹងចំណាត់ការនេះទេ ព្រោះនៅថ្ងៃសៅរ៍នេះ ពួកគេត្រូវប្រកួតលីកកំពូលកម្ពុជា ដោយត្រូវស្វាគមន៍ក្រុមភ្ញៀវ អគ្គិសនីកម្ពុជា នៅលើទឹកដីខ្លួនឯង ខណៈការប្រកួតជើងទី១ ក្រុមទាំង២នេះ បានស្មើគ្នា ២-២។
តាមរយៈកាលវិភាគប្រកួតនេះ បានបង្ហាញថា ក្រុមគិរីវង់សុខសែនជ័យ បានសម្រាកតែ៣ថ្ងៃប៉ុណ្ណោះ ព្រោះពួកគេ នឹងត្រូវប្រកួតជើងទី២ ពានរង្វាន់សម្តេច ហ៊ុន សែន នៅថ្ងៃពុធ ទី៧ ខែតុលា ខណៈភ្នំពេញក្រោន ដែលបានឈ្នះ ២-១ កាលពីជើងទី១នោះ បែរជាមានពេលសម្រាក និងហ្វឹកហាត់ពង្រឹងសមត្ថភាព រហូតដល់១០ថ្ងៃពេញ ដែលវាមិនមានភាពយុត្តិធម៌ ដល់ក្រុមគិរីវង់ នោះទេ។
យ៉ាងណាក៏ដោយ ក្រុមគិរីវង់ អាចនឹងមិនសូវផ្តោតខ្លាំងទៅការប្រកួតលីកកំពូលកម្ពុជា នៅថ្ងៃសៅរ៍នេះ ជាមួយក្រុមអគ្គិសនីកម្ពុជា ប៉ុន្មានទេ គឺក្រុមនេះ អាចនឹងទុកកីឡាករសំខាន់ៗ ឲ្យសម្រាក សម្រាប់ត្រៀមជួបក្រុមភ្នំពេញក្រោន នៅថ្ងៃពុធ សប្តាហ៍ក្រោយ ព្រោះក្រុមមានមូលដ្ឋាននៅទីរួមខេត្តតាកែវ មួយនេះ ធ្លាប់បានប្រាប់ថា ពួកគេ មានការផ្តោតខ្លាំង ទៅលើការប្រកួតពានសម្តេច ហ៊ុន សែន ខ្លាំងជាងលីកកំពូល ដ្បិតអី គិរីវង់ មើលឃើញថា ការប្រកួតប្រជែង ដោយប្រើប្រាស់កីឡាករខ្មែរសុទ្ធ គឺពួកគេ អាចមានលទ្ធភាព ស្មើនឹងក្រុមធំៗ ក្នុងការប្រជែងយកពាន។
គួរបញ្ជាក់ថា សម្រាប់ការប្រកួតជើងទី២ វគ្គ៨ក្រុមចុងក្រោយ ពានរង្វាន់សម្តេច ហ៊ុន សែន ឆ្នាំ២០២០ ក្រុមគិរីវង់ ត្រូវទទួលក្រុមភ្នំពេញក្រោន នៅពុធ ទី៧ ខែតុលា វេលាម៉ោង ៣:៣០ គឺមុនពេលការជួបគ្នារវាងក្រុមម្ចាស់ផ្ទះ ព្រះខ័នរាជស្វាយរៀង ជាមួយណាហ្គាវើល នៅម៉ោង៦ល្ងាច។ ចំណែកនៅថ្ងៃព្រហស្បតិ៍បន្ទាប់ ក្រុមខេត្តព្រៃវែង ត្រូវស្វាគមន៍ក្រុមទ័ព ដែលពួកគេបានចាញ់ ១-០ ក្នុងជើងទី១ នៅរសៀលម៉ោង ៣:៣០ ហើយម្ចាស់ផ្ទះ វិសាខា ត្រូវប្រកួតកាត់សេចក្តីជាមួយក្រុមបឹងកេត ដើម្បីបញ្ចប់ភាពមន្ទិលនៃការស្មើគ្នា ១-១ កាលពីជើងទី១៕
