អគ្គលេខាធិការក្លិបបាល់ទាត់គិរីវង់សុខសែនជ័យ លោក Florian បានអះអាងថា ថ្នាក់ដឹកនាំរបស់ក្លិប មានការខកចិត្តខ្លាំង ទៅលើលទ្ធផលនៃការប្រកួតជើងទី២ ក្នុងលីគកំពូលកម្ពុជា ឆ្នាំ២០២១ ដែលក្រុមមានមូលដ្ឋាននៅខេត្តតាកែវ មួយនេះ ធ្វើមិនបានល្អសោះ។
«ទាក់ទងនឹងលទ្ធផលរដូវកាលមុន (ឆ្នាំ២០២១នេះ) យើងបានសម្រេចតាមគោលដៅ ដោយស្ថិតនៅក្រុមលំដាប់កំពូលទាំង៨ ប៉ុន្តែថ្នាក់ដឹកនាំមានការខកចិត្តជាខ្លាំង សម្រាប់លទ្ធផលជើងទី២ ដោយយើងរំពឹងថា នឹងអាចរំខានក្លិបធំៗ ក្នុងការប្រកួតប្រជែង ហើយនាំយកជ័យជម្នះជូនក្លិប ប៉ុន្តែយើងធ្វើមិនបានល្អទាល់តែសោះ»។ នេះជាការលើកឡើងរបស់លោក Florian នៅលើផេចហ្វេសប៊ុកផ្លូវការរបស់ក្លិបគិរីវង់សែនជ័យ កាលពីថ្ងៃពុធ។
សម្រាប់ការប្រកួតលីគកំពូល ឆ្នាំ២០២១នេះ ក្រុមគិរីវង់ បានជាប់នៅក្នុងចំណោមក្រុមកំពូលតារាងទាំង៨ (Top8) ដែលមានសិទ្ធិ ប្រកួតប្រជែងយកពាន នៅជុំទី២ បន្ទាប់ពីពួកគេ បានលេខ៨ ក្រោយបញ្ចប់ការប្រកួតជុំទី១ ប៉ុន្តែតាមរយៈការប្រកួតទាំង៧លើក ក្នុងជុំទី២ គិរីវង់ បានចាញ់ទាំងអស់ គឺបានចាញ់ក្រុមកងយោធពលខេមរភូមិន្ទ ៣-១ ចាញ់ ភ្នំពេញក្រោន ៣-១ ចាញ់ បឹងកេត ៣-២ ចាញ់ អង្គរថាយហ្គឺរ ៦-១ ចាញ់ ព្រះខ័នរាជស្វាយរៀង ៦-០ និងចាញ់ ណាហ្គាវើលដ៍ ៥-២ ដោយមានត្រឹម១៣ពិន្ទុ ក្នុងការប្រកួតទាំង២ និងទទួលបានលេខ៨ ប្រចាំឆ្នាំ២០២១។
បន្ថែមលើនេះ ក្រុមគិរីវង់ ក៏បានជួបការខកចិត្តផងដែរ នៅក្នុងការប្រកួតថ្នាក់ជាតិ ពានរង្វាន់សម្តេច ហ៊ុន សែន ឆ្នាំ២០២១ ខណៈពួកគេ បានធ្លាក់ត្រឹមវគ្គជម្រុះ១៦ក្រុមដំបូង ក្រោយចាញ់ក្រុមអាស៊ីអឺរ៉ុប ៣-២ នោះ ហើយជាមួយលទ្ធផលដ៏អាក្រក់នេះ គិរីវង់ បានសម្រេចមិនបន្តកុងត្រាជាមួយកីឡាករជាច្រើននាក់។
ចំណែកក្រុមបង្គោលជនជាតិថៃ លោក Ekapob Potisai ក៏បានចាកចេញផងដែរ ហើយតាងនាមឱ្យក្លិបគិរីវង់សុខសែនជ័យ លោក Florian បានសម្តែងអរគុណទៅដល់លោក Ekapob Potisai សម្រាប់ការប្រឹងប្រែងជួយក្លិប៣រដូវកាលកន្លងមក និងបានជួយអភិវឌ្ឍសមត្ថភាពកីឡាករថ្នាលយុវជនរបស់ក្រុមមួយនេះ កាន់តែមានអនាគតភ្លឺស្វាង។
លោក Florian បានបញ្ជាក់ថា៖ «ឥឡូវនេះ យើងនឹងមានរជ្ជកាលមួយថ្មី ជាប្រវត្តិសាស្ត្ររបស់ក្លិប ប្រសិនបើយើងចង់បន្តរីកចម្រើន និងឈានឆ្ពោះទៅមុខ។ នៅក្នុងដំណាក់កាលផ្លាស់ប្តូរនេះ យើងបានសម្រេចចិត្ត សម្រាប់ការចាកចេញ និងមិនបន្តកុងត្រាដល់កីឡាករជាច្រើន ដើម្បីនាំយកកីឡាករថ្មីៗ ដែលមានបទពិសោធ ក៏ដូចជាផ្តល់ឱកាសដល់កីឡាករថ្នាលយុវជនរបស់យើង ដូចអ្វីដែលយើង បាននឹងកំពុងធ្វើកន្លងមក»។
យ៉ាងណាក៏ដោយ គិតត្រឹមពេលនេះ ក្រុមគិរីវង់សុខសែនជ័យ នៅមិនទាន់ឃើញចេញសេចក្តីប្រកាស ចែកផ្លូវជាមួយកីឡាករណាម្នាក់នៅឡើយទេ ប៉ុន្តែលោក Florian បានសន្យា ទៅកាន់អ្នកគាំទ្ររបស់ក្រុមគិរីវង់សុខសែនជ័យថា នឹងនាំយកមោទនភាព ជូនដល់ក្លិបមួយនេះ សម្រាប់ការប្រកួត នៅរដូវកាលថ្មី ឆ្នាំ២០២២ ខាងមុខនេះលោក Florian បានបញ្ជាក់ថា៖«យើងសន្យាថា នឹងយើងខិតខំប្រឹងប្រែងឱ្យកាន់តែខ្លាំងឡើងៗ សម្រាប់រដូវកាលបន្ទាប់ និងធ្វើឱ្យអ្នកគាំទ្រ មានមោទនភាព សម្រាប់ក្លិបនេះ។ យើងទន្ទឹងរង់ចាំអ្នកគាំទ្ររបស់យើងរួចរាល់ហើយ សម្រាប់រដូវកាលខាងមុខនេះ»៕
