កីឡាករកំពុងទទួលបានភាពល្បីល្បាញ ធន់ អៀនឡៃ បានបង្ហាញការសោកស្តាយខ្លាំង និងមានការតូចចិត្តចំពោះខ្លួនឯង ខណៈរូបគេមិនទទួលបានផលអ្វីសោះពីការផ្តួលឲ្យ ភួន ឡាំងកូស៊ីន ឲ្យសន្លប់ សម្រាប់ការប្រកួតជម្រុះតាមពូលដណ្តើមខ្សែក្រវាត់ ទម្ងន់៥៤គីឡូក្រាម នៅលើសង្វៀន PNN។
សម្រាប់ការប្រកួតបើកឆាក ប្រចាំពូលA កាលពីថ្ងៃអាទិត្យ កន្លងមកនេះ ធន់ អៀនឡៃ បានចំណាយពេលត្រឹម៣ទឹក ក្នុងការបុកជង្គង់ឲ្យ ភួន ឡាំងកូស៊ីន ឲ្យសន្លប់ធំ ប៉ុន្តែ អៀនឡៃ មិនទទួលភាពរីករាយចំពោះការឈ្នះនេះទេ ព្រោះរូបគេ ធ្វើគីឡូ(ទម្ងន់) មិនបានតាមការកំណត់ ដែលធ្វើឲ្យគណៈកម្មការប្រកួត សម្រេចផ្តល់៣ពិន្ទុឲ្យទៅ ឡាំងកូស៊ីន តាំងពីមុនការប្រកួតចាប់ផ្តើមម្ល៉េះ មានន័យថា ជំនួបបើកឆាករបស់ ធន់ អៀនឡៃ គ្រាន់តែជាការប្រកួតមិត្តភាពប៉ុណ្ណោះ។
នៅក្រោយការប្រកួតបានបញ្ចប់ ធន់ អៀនឡៃ និយាយថា៖ «ខ្ញុំពិតជាមានការសោកស្តាយខ្លាំងមែនទែន ដោយមិននឹកស្មានថា ខ្ញុំធ្វើគីឡូមិនបាន ខណៈនៅសល់តែ៤ខាំទៀតសោះ តែខ្ញុំធ្វើមិនបាន គឺខ្ញុំមានអារម្មណ៍តូចចិត្តចំពោះខ្លួនឯងណាស់ ព្រោះការទទួលបានឱកាសចូលប្រកួតខ្សែក្រវាត់នេះ ខ្ញុំបានទន្ទឹងរង់ចាំជាយូរមកហើយ»។
យ៉ាងណាក៏ដោយ ធន់ អៀនឡៃ នៅតែមានឱកាសប្រជែងកៅអីចំនួន២ ក្នុងពូលAនេះ ដើម្បីបានឡើងទៅប្រកួតនៅវគ្គពាក់កណ្តាលផ្តាច់ព្រ័ត្រ បើសិនជារូបគេ អាចយកឈ្នះទាំង ស៊ឺន ថៃសាន់ និង រិន ដាវីត សម្រាប់ការប្រកួត២លើកចុងក្រោយនោះ ខណៈការប្រកួតរវាងអ្នកទាំង២នេះ គឺ រិន ដាវីត បានយកឈ្នះ ស៊ឺន ថៃសាន់ ដោយពិន្ទុជាឯកចន្ទ ៥-០ ដើម្បីមាន៣ពិន្ទុស្មើជាមួយ ភួន ឡាំកូនស៊ីន។
នៅពេលសួរដល់ការប្រកួត២លើកចុងក្រោយនោះ ធន់ អៀនឡៃ បាននិយាយថា៖«សម្រាប់ការជួប ស៊ឺន ថៃសាន់ និង រិន ដាវីត នៅក្នុងការប្រកួតបន្ទាប់ នឹងមានការភាពតឹងខ្លាំងដូចគ្នា ព្រោះពួកគេសុទ្ធតែមានសមត្ថភាពល្អ និងស៊ូខ្លាំង ប៉ុន្តែខ្ញុំនឹងព្យាយាមឲ្យអស់ពីសមត្ថភាព។ ជាមួយគ្នានេះ ខ្ញុំនឹងព្យាយាមកាត់បន្ថយការហូបចុក និងធ្វើគីឡូឲ្យគ្រប់តាមការកំណត់ ហើយខ្ញុំក៏នឹងមិនទទួលយកការប្រកួត នៅកម្មវិធីផ្សេងទៀតនោះដែរ គឺខ្ញុំនឹងខំហ្វឹកហាត់ សម្រាប់ត្រៀមតែការប្រកួតនេះ»។
ជាមួយគ្នានេះ ភួន ឡាំងកូស៊ីន ក៏បានបង្ហាញការសោកស្តាយផងដែរ ដែលបានសន្លប់ក្រុមទម្ងន់ជង្គង់របស់ ធន់ អៀនឡៃ ត្រឹមទឹកទី៣ ប៉ុន្តែរូបគេបានអះអាងថា នឹងព្យាយាមពង្រឹងចំណុចខ្សោយនេះ ដើម្បីត្រៀមប្រកួតជាមួយ រិន ដាវីត និង ស៊ឺន ថៃសាន់ សម្រាប់ជំនួបបន្ទាប់។
ភួន ឡាំងកូស៊ីន បាននិយាយថា៖ «ខ្ញុំមានការសោកស្តាយខ្លាំងមែនទែន ព្រោះខ្ញុំក៏ព្យាយាមចង់ងើបដែរ ប៉ុន្តែនៅពេលគាត់បុកជង្គង់ចូលនោះ ធ្វើឲ្យខ្ញុំឆ្អល់ ដកដង្ហើមអត់ចេញ អ៊ីចឹងហើយ ខ្ញុំត្រូវពង្រឹងកន្លែងហ្នឹង និងពង្រឹងជើងក្រោមរបស់ខ្ញុំផងដែរ ដ្បិតអីការបន្តទៅជួបទាំង រិន ដាវីត និង ស៊ឺន ថៃសាន់ នឹងមានភាពតានតឹងដូចគ្នា ព្រោះតាមរយៈការប្រកួតមុននេះ ខ្ញុំមើលឃើញថា ពួកគាត់ល្អដូចគ្នា»៕