អ្នកប្រយុទ្ធវាយមិនដកថយ ប៊ុន សុធា បានកក់កៅអី នៅក្នុងការប្រកួតដណ្តើមខ្សែក្រវាត់ ទម្ងន់៥៧គីឡូក្រាម នៅលើសង្វៀនទើបបើកឱ្យមានការប្រកួតឡើងវិញ PNN មុនគេ បន្ទាប់ពីរូបគេបានទម្លាក់កីឡាករ យ៉ន ពិសី នៅក្នុងវគ្គជម្រុះបើកឆាក។ ចំណែកជើងថ្មីកំពុងសាងបានភាពល្បី ពុទ្ធ ម៉ាណូយ បានក្លាយជាកីឡាករដំបូងគេ ដែលបានផ្តួលដៃគូឱ្យសន្លប់ នៅក្នុងព្រឹត្តិការណ៍ថ្មី OneStrike ហើយ ប៊ន ពន្លឹក ក៏បានក្លាយជាម្ចាស់ជើងឯក ពីការប្រកួតម៉ារ៉ាតុន នៅលើសង្វៀននេះដូចគ្នា។
តាមរយៈការប្រកួតយ៉ាងស្វិតស្វាញ កាលពីថ្ងៃអាទិត្យ ម្សិលមិញនេះ ប៊ុន សុធា និង យ៉ន ពិសី បានប្រកួតគ្នាយ៉ាងស្វិតស្វាញបំផុត ប៉ុន្តែ ប៊ុន សុធា បានវាយចូលគោលដៅល្អជាង ពិសេសការចូលចាប់បុកជង្គង់របស់គេ ដែលធ្វើឱ្យ យ៉ន ពិសី មានការលំបាក និងធ្លាក់កម្លាំងគួរឱ្យកត់សម្គាល់ ហើយជាលទ្ធផល ចៅក្រមទាំង៥នាក់ បានសម្រេចផ្តល់ពិន្ទុឱ្យ ប៊ុន សុធា ឈ្នះជាឯកច្ឆន្ទ ៥-០ តែម្តង។
តាមរយៈការទទួលបានជ័យជម្នះ នៅក្នុងការប្រកួតជម្រុះ១៦នាក់ដំបូង ប៊ុន សុធា បានក្លាយជាបេក្ខភាពទី១ ដែលត្រូវឡើងទៅប្រកួត នៅក្នុងវគ្គជម្រុះ៨នាក់ចុងក្រោយ បានមុនគេ ដោយរង់ចាំការប្រកួតរវាងជើងខ្លាំងចំនួន១៤នាក់ទៀត ចំណែក យ៉ន ពិសី បានធ្លាក់ចេញពីការប្រកួតនេះហើយ ព្រោះរូបមន្តនៃការប្រកួតនេះ គឺប្រកួតជម្រុះចាញ់ធ្លាក់ៗ រហូតរកឃើញបេក្ខភាព២នាក់ចុងក្រោយ ដែលត្រូវឡើងទៅប្រកួតផ្តាច់ព្រ័ត្រ ដណ្តើមយកខ្សែក្រវាត់ និងប្រាក់រង្វាន់ចំនួន៤០លានរៀល។
ដោយឡែកកីឡាករជើងថ្មី ពុទ្ធ ម៉ាណូយ បានក្លាយជាបេក្ខភាព ដំបូងគេ ដែលទទួលបានប្រាក់រង្វាន់បន្ថែមចំនួន១លានរៀល ពីការប្រកួត OneStrike នៅលើសង្វៀន PNN នេះ បន្ទាប់ពីរូបគេបានទាត់កីឡាករ ឃន គឹមហេង បណ្តាលឱ្យខូចជើង មិនអាចបន្តការប្រកួតទៀតបាន នៅក្នុងទឹកទី២នោះ។
សម្រាប់ការប្រកួតព្រឹត្តិការណ៍ថ្មី OneStrike នេះ មានរូបមន្តប្រកួតប្លែក និងថ្មីសន្លាងតែម្តង ព្រោះតម្រូវឱ្យកីឡាករទាំង២នាក់ ប្រកួតតែ២ទឹកទេ ដោយ១ទឹកមានរយៈពេល៧នាទី ហើយមានអាជ្ញាកណ្តាលកាត់សេចក្តីតែម្នាក់គត់ គ្មានចៅក្រមទេ ដ្បិតអីការប្រកួតនេះ កំណត់ការចាញ់ឈ្នះ ដោយការវាយគូប្រកួតឱ្យសន្លប់ និងត្រូវអាជ្ញាកណ្តាលបញ្ឈប់ ប៉ុន្តែបើគ្មានអ្នកសន្លប់ ក្រោយការប្រកួតទាំង២ទឹក បានបញ្ចប់ទេ គឺការប្រកួតនេះ ចាត់ទុកថា មិនយកជាការ ហើយក៏មិនប្រកាសលទ្ធផលនោះដែរ។
សម្រាប់ការប្រកួត កាលពីថ្ងៃអាទិត្យនោះដែរ កីឡាករ ប៊ន ពន្លឹក បានក្លាយជាម្ចាស់ជើងឯក នៅក្នុងការប្រកួតម៉ារ៉ាតុន ទម្ងន់៥៤គីឡូក្រាម ក្រោយរូបគេបានយកឈ្នះដោយពិន្ទុមិនឯកច្ឆន្ទ ២-១លើ កីឡាករ នូវ សុខទី នៅវគ្គផ្តាច់ព្រ័ត្រ ខណៈការប្រកួតវគ្គជម្រុះ៣ទឹកដំបូង ប៊ន ពន្លឹក បានឈ្នះពិន្ទុ សូត្រ សុឃីម ហើយ នូវ សុខទី បានឈ្នះពិន្ទុ សេក សារ៉ាន់៕
