បរទេស៖ លោក Mikel Arteta អ្នកចាត់ការទូទៅរបស់ក្លិប Arsenal សង្ឃឹមថា នឹងអាចដាក់ខ្សែការពារ Kieran Tierney ឲ្យចូលលេងសម្រាប់ការប្រកួតក្របខ័ណ្ឌ Premier League នៅលើទឹកដីក្រុម Manchester City នៅថ្ងៃសៅរ៍ ស្របពេលដែលការពិភាក្សាផ្សេងៗជុំវិញការដាក់ឲ្យរូបគេនៅដាច់ដោយឡែក នៅតែបន្ត។
Tierney រួមជាមួយនឹងមិត្តរួមជាតិរបស់គេ Ryan Christie ត្រូវបានណែនាំឲ្យរក្សាខ្លួននៅដាច់ដោយឡែកពីគេសម្រាប់រយៈពេល១៤ថ្ងៃ ក្រោយពីមិត្តរួមក្រុមជម្រើសជាតិស្កុតឡេន Stuart Armstrong បានតេស្តឃើញលទ្ធផលជាវិជ្ជមានទៅលើវីរុសកូរ៉ូណា ក្នុងពេលបំពេញការតព្វកិច្ចអន្តរជាតិ។ ទាំង Tierney និង Christie សុទ្ធសឹងទទួលបានលទ្ធផលអវិជ្ជមានដូចគ្នានិងបានបញ្ជាក់ថា ពួកគេបានអនុវត្តតាមគោលការណ៍ណែនាំនៃការរក្សាគម្លាតក្នុងសង្គមរួចរាល់ហើយ។ ប៉ុន្តែ អាជ្ញាធរសុខាភិបាលស្កុតឡេន បានកំណត់ឃើញកីឡាករទាំង២ ក៏ដូចជាសមាជិក២នាក់ផ្សេងទៀតរបស់ក្រុមជម្រើសជាតិស្កុតឡេន បានប៉ះពាល់ជិតស្និទ្ធិជាមួយនឹង Armstrong។
Tierney បានអវត្តមានក្នុងការប្រកួត៣លើករបស់ក្រុមជម្រើសជាតិស្កុតឡេន និងបានប្រាប់គេហទំព័ររបស់ក្លិប Arsenal ថា រូបគេពិតជាខកចិត្ត និងអស់សង្ឃឹម ក្នុងការធ្លាក់ចូលក្នុងស្ថានភាពបែបនេះ។ ទោះបីជាយ៉ាងណា លោក Arteta គ្រូបង្វឹករបស់ Arsenal បានឲ្យដឹងថា៖ «យើងនៅតែមានការពិភាក្សាផ្សេងៗជាមួយនឹងអាជ្ញាធរ។ នេះគឺជារឿងដ៏ស្មុគស្មាញ នៅពេលដែលអ្នកកំពុងតែបញ្ជូនកីឡាករទៅបរទេស ហើយពិតណាស់ អ្នកបាត់បង់ការគ្រប់គ្រង»៕
ប្រភពព័ត៌មាន៖ Channel News Asia