បរទេស៖ អ្នកចាំទីអន្តរជាតិបែលហ្ស៊ិក Thibaut Courtois បានតឿនរំឭកដល់អ្នកគាំទ្ររបស់ខ្លួនកុំឲ្យរំពឹងទុកការដណ្តើមបានជ័យជម្នះពីក្រុមដែលមានចំណាត់ថ្នាក់លេខ១ក្នុងពិភពលោករបស់ខ្លួន នៅពេលដែលពួកគេធ្វើជាម្ចាស់ផ្ទះទទួលក្រុមជម្រើសជាតិដាណឺម៉ាក ក្នុងការប្រកួត Nations League នៅរាត្រីនេះ។
ក្រុមជម្រើសជាតិបែលហ្ស៊ិក ត្រូវការត្រឹមតែ១ពិន្ទុគត់ ដើម្បីឈ្នះកៅអីទៅកាន់ជុំផ្តាច់ព្រ័ត្រ នៅខែតុលា ក្រោយពីបានផ្តួលក្រុមជម្រើសជាតិអង់គ្លេស ២-០ ក្នុងទីក្រុង Leuven កាលពីថ្ងៃអាទិត្យ ក្រោយពីការបង្ហាញពីទម្រង់លេងយ៉ាងល្អរបស់ពួកគេ។ ប៉ុន្តែ អ្នកចាំទីរបស់ក្លិប Real Madrid រូបនេះ បានដាស់តឿនឲ្យប្រុងប្រយ័តុ្នចំពោះការមានការរំពឹងទុកដ៏ខ្ពស់សម្រាប់ការប្រកួតជាមួយនឹងក្រុមជម្រើសជាតិដាណឺម៉ាក ដែលត្រូវតែដណ្តើមឲ្យបានជ័យជម្នះ ប្រសិនបើពួកគេចង់រក្សាវត្តមានក្នុងពូលកំពូល។
នៅមុនពេលការប្រកួតនៅទីក្រុង Leuven ដែលមានចម្ងាយ៣០គីឡូម៉ែត្រពីទីក្រុង Brussels អ្នកចាំទី Courtois បានប្រាប់សន្និសីទសារព័ត៌មានមួយថា៖ «យើងមិនត្រូវគិតថា យើងគ្រាន់តែដើរទៅកាន់ទីលាន ហើយឈ្នះនោះឡើយ»។ កីឡាកររូបនេះបានបន្ថែមថា៖ «យើងនឹងត្រូវតែបង្ហាញពីកម្រិតរបស់យើងនៅលើទីលានម្តងទៀត។ នេះហាក់ដូចជាវគ្គផ្តាច់ព្រ័ត្រអ៊ីចឹង យើងត្រូវតែធ្វើឲ្យការប្រកួតស្ថិតក្នុងដៃរបស់យើង។ ដាណឺម៉ាក ជាក្រុមខ្លាំង ពួកគេបានផ្តួលក្រុមអង់គ្លេស កាលពីខែមុន និងមានកីឡាករឆ្នើមៗជាច្រើន»៕
ប្រភពព័ត៌មាន៖ Channel News Asia