បរទេស៖ អធិរាជបាល់ទាត់ប្រេស៊ីលលោក Pele បច្ចុប្បន្នមានវ័យ ៨០ ឆ្នាំបានទទួលការចាក់វ៉ាក់សាំងការពារមេរោគ Covid-១៩ កាលពីថ្ងៃអង្គារនៅប្រទេសកំណើត។
រូបលោកបានពណ៌នាថាជាព្រឹត្តការណ៏រំភើបមិនអាចបំភ្លេចបានខណៈពេលដែលរូបលោកបានទទូចដល់ប្រជាជនប្រេស៊ីលអោយឆាប់មកទទួលយកវ៉ាក់សាំង ដើម្បីប្រឆាំងនឹងមេរោគដែលកំពុងគំរាមកំហែងពិភពលោកដ៏គ្រោះថ្នាក់មួយនេះ។ ក្រុមអ្នកសារព័ត៌មានមិនអាចទទួលបានចម្លើយពីរូបលោកបានទេ ថាតើវាជាវ៉ាក់សាំងដែលរូបលោកបានចាក់ជាលើកទី១រឺក៏លើកទី២រឺយ៉ាងណា។
Pele ជាកីឡាករតែម្នាក់គត់ដែលមានប្រវត្តិដ៏អស្ចារ្យធ្លាប់ឈ្នះពានបាល់ទាត់ពិភពលោក (World Cup) ៣ ដង គឺនៅប្រទេសស៊ុយអែតក្នុងឆ្នាំ ១៩៥៨ ឈីលីនៅឆ្នាំ ១៩៦២ និងម៉ិកស៊ិកូនៅឆ្នាំ ១៩៧០ បានសម្រេចចិត្តរស់នៅដាច់ដោយឡែកនៅផ្ទះរបស់លោកនារដ្ឋសៅប៉ូឡូ។ ពោលគឺចាប់តាំងពីបញ្ហាការឆ្លងរីករាលដាលនៃ មេរោគរលាកដង្ហើមប្រភេទថ្មី(កូវីត-១៩)ដែលបានសម្លាប់មនុស្ស ២៥៥.០០០ នាក់ ក្នុងប្រទេសប្រេស៊ីលខណៈ ការចាក់វ៉ាក់សាំងហាក់មានភាពយឺតយ៉ាវកំពុងបានចាប់ផ្តើម៕
ប្រភពព័ត៍មាន៖ Besoccer