បរទេស៖ លោក Andrea Pirlo បានច្រានចោលការលើកឡើងថា អនាគតក្នុងក្រុម Juventus របស់លោក កំពុងតែស្ថិតក្នុងភាពមិនច្បាស់ នៅក្នុងការប្រកួតជើងទី២នៃក្របខ័ណ្ឌ Champions League វគ្គ១៦ក្រុមចុងក្រោយរបស់ពួកគេជាមួយនឹងក្រុម Porto នៅរាត្រីនេះ ខណៈដែលក្រុមយក្សរបស់អ៊ីតាលីមួយនេះ កំពុងតែដេញតាមពីក្រោយ ២-១ មុននឹងឈានទៅកាន់ការប្រកួតនៅទីក្រុង Turin។
លោក Maurizio Sarri និង Massimiliano Allegri ដែលជាគ្រូបង្វឹកមុនលោក Pirlo សុទ្ធសឹងបានចាកចេញពី ដោយដោយសារតែមិនអាចដឹកនាំឲ្យ Juventus ឈ្នះពានក្នុងក្របខ័ណ្ឌកំពូលរបស់ទ្វីបអឺរ៉ុប។ លោក Pirlo បានប្រាប់សន្និសីទសារព័ត៌មាននៅក្នុងទីក្រុង Turin ថា៖ «ប្រសិនបើខ្ញុំបានគិតថា អនាគតរបស់ខ្ញុំស្ថិតក្នុងភាពមិនច្បាស់ ខ្ញុំនឹងមិនមានវត្តមានៅទីនេះឡើយ។ សម្រាប់ខ្ញុំ វាជាការប្រកួតមួយដែលសំខាន់ដូចនឹងការប្រកួតផ្សេងដែរ។ ខ្ញុំបន្តធ្វើការជារៀងរាល់ថ្ងៃ ដោយដឹងពីផែនការរបស់ខ្ញុំ និងក្លិបនេះ»។ គ្រូបង្វឹករូបនេះបានប្រាប់បន្តថា៖ «នៅថ្ងៃស្អែកនេះ វាជាការប្រកួតកាត់សេចក្តីមួយ ក្នុងការបោះជំហានទៅមុខ ប៉ុន្តែ សម្រាប់អនាគតរបស់ខ្ញុំ ក្លិបនេះ នឹងតែងតែកាត់សេចក្តីដោយផ្អែកទៅលើលទ្ធផល»។
សម្ពាធកំពុងតែស្ថិតនៅលើលោក Pirlo ដែលជាអតីតតារាឆ្នើមរបស់ Juventus ក្នុងការរក្សាធ្វើឲ្យក្រុមនេះ ស្ថិតក្នុងការប្រជែងពាន Champions League ដែលពួកគេបានឈ្នះជាលើកចុងក្រោយកាលពីឆ្នាំ២៥ឆ្នាំមុន។ បុរសវ័យ៤១ឆ្នាំរូបនេះ បានបន្ថែមថា៖ «យើងដឹងថា យើងកំពុងតែស្ថិតក្រោមសម្ពាធ។ យើងនឹងមិនមើលស្រាលក្រុម Porto នៅថ្ងៃស្អែកនេះឡើយ»៕
ប្រភពព័ត៌មាន៖ Channel News Asia
