បរទេស៖ ខ្សែបម្រើដ៏មានឥទ្ធិពល Xherdan Shaqiri របស់ក្រុមបាល់ទាត់ជម្រើសជាតិស្វ៊ីស កាលពីថ្ងៃអង្គារ បាននិយាយកោតសរសើរលោក Roberto Mancini អតីតគ្រូបង្វឹកក្លិប Inter Milan របស់គេចំពោះការធ្វើឲ្យក្រុមជម្រើសជាតិអ៊ីតាលី ក្លាយជាបេក្ខភាពប្រជែងដណ្តើមពាន Euro ឆ្នាំ២០២០ បើទោះបីខ្វះតារាឆ្នើមៗក្នុងក្រុមក៏ដោយ។
ក្រុមជម្រើសជាតិស្វ៊ីស បានបញ្ចប់ក្នុងលទ្ធផលស្មើ ១-១ ជាមួយនឹងក្រុមជម្រើសជាតិវេលស៍ ក្នុងការប្រកួតបើកឆាកនៃពូល A ក្នុងទីក្រុង Baku ហើយនៅរាត្រីនេះ ពួកគេនឹងត្រូវប៉ះជាមួយនឹងក្រុមជម្រើសជាតិអ៊ីតាលី ដែលបានផ្តួលក្រុមជ្រើសជាតិតួកគី ក្នុងលទ្ធផល ៣-០ ក្នុងទីក្រុងរ៉ូម។ Shaqiri ដែលលេងឲ្យក្លិប Liverpool និងបានចំណាយពេលយ៉ាងខ្លីក្នុងការលេងឲ្យក្លិប Inter Milan កាលពី៦ឆ្នាំមុននោះ បានឲ្យដឹងថា៖ «ខ្ញុំពិតជាចង់លេងការប្រកួតនេះណាស។ ខ្ញុំពិតជាចង់ឃើញលោក Roberto ម្តងទៀតនៅថ្ងៃស្អែកនេះ។ គាត់ជាគ្រូបង្វឹកដ៏អស្ចារ្យ និងពោរពេញដោយសមត្ថភាពម្នាក់។ អ៊ីតាលី គឺជាក្រុមដ៏ខ្លាំងមួយដែលស្ថិតក្នុងចំណោមក្រុមដែលអាចឈ្នះពាន។ ក្រុមនេះពិតជាមានភាពរឹងមាំណាស់ ទាំងក្នុងតំបន់ប្រយុទ្ធ និងការពារ»។
Shaqiri បានបន្ថែមទៀតថា៖ «ពួកគេជាក្រុមដ៏អស្ចារ្យមួយ ដែលលេងស៊ីសង្វាក់គ្នាយ៉ាងល្អ។ មិនមានកីឡាករឆ្នើមៗដូចកាលពីមុនដូចជា (Andrea) Pirlo ឡើយ ប៉ុន្តែលោក Mancini បានបំពេញការងាររបស់លោកបានយ៉ាងល្អ»។ ក្រុមជម្រើសស្វ៊ីស នឹងត្រូវប៉ះអ៊ីតាលី ដែលមិនបានរបូតគ្រាប់បាល់សូម្បីតែ១គ្រាប់ក្នុងការប្រកួត៩លើកជាប់ៗគ្នា៕
ប្រភពព័ត៌មាន៖ Channel News Asia