បរទេស៖ ខ្សែប្រយុទ្ធ Ousmane Dembele របស់ក្រុមមាន់គកបារាំងនិងត្រូវអវត្តមានសម្រាប់ការប្រកួតពានរង្វាន់អឺរ៉ូឆ្នាំ ២០២០ សម្រាប់ការប្រកួតដែលនៅសល់ក្រោយពេលក្រុមលោក Diddier Deschampប្រកួតស្មើគ្នាជាមួយហុងគ្រី។
ខ្សែប្រយុទ្ធរបស់ក្រុមបាសេឡូណារូបនេះត្រូវបានប្តូរជំនួសដោយមិត្តរួមជាតិ Thomas Lemar របស់ក្រុម AT Madrid នៅតង់ទី ២ កាលពីថ្ងៃសៅរ៍ពោលគឺក្នុងរយៈពេលតែ ៣០ នាទីប៉ុណ្ណោះបន្ទាប់ពីចូលលេងនៅលើទីលាន ។អ្នកចាត់ការទូទៅលោក Deschamps បាននិយាយថា Dembele បានព្យាយាមបន្តការប្រកួត ប៉ុន្តែកីឡាករវ័យ ២៤ ឆ្នាំរូបនេះត្រូវបានប្តូរចេញ ។យោងគេហទំព័រ Daily Mail បានចុះផ្សាយថា Dembele បានរងរបួសជង្គង់។
គួររំលឹកថាចាប់តាំងពីចូលរួមជាមួយ Barcelona ពីក្លឹប Borussia Dortmund ក្នុងតម្លៃ ១០០ លានផោនក្នុងឆ្នាំ ២០១៧ មក Dembele បានតស៊ូនឹងបញ្ហារបួសជាញឺកញាប់ហើយពេលនេះនឹងត្រូវវិលត្រឡប់ទៅកាន់ក្លិបយក្សអេស្ប៉ាញវិញដើម្បីចាប់ផ្តើមព្យាបាលរបួសអោយបានជាសះស្បើយ។បារាំងបច្ចុប្បន្នកំពុងឈរនៅកំពូលតារាងពូល F ហើយត្រូវជួបព័រទុយហ្កាល់នៅថ្ងៃពុធស្អែកនេះក្នុងការប្រកួតចុងក្រោយសម្រាប់វគ្គជម្រុះក្នុងពូលក្រោយពីបានកក់កៅអីទៅវគ្គ ១៦ក្រុមដោយស្វ័យប្រវត្តិរួចទៅហើយនោះ៕
ប្រភពព័ត៍មាន៖ Sportsmole