កីឡាការិនីជម្រើសជាតិមានជំនាញទាំងប្រដាល់សកល គុនខ្មែរ និងវាយដាក់ទ្រុង MMA នៅ ស្រីពៅ បានសារភាពថា រូបនាងអាចនឹងសន្លប់ក្រោមស្នាដៃរបស់កីឡាការិនីរបស់ចិន Tain Yang សម្រាប់ការបង្ហាញខ្លួនជាលើកដំបូង ក្នុងការប្រកួត Mas Fight មួយទឹកមាន៩នាទីពេញ នៅលើសង្វៀនថោន កាលពីថ្ងៃអាទិត្យ ម្សិលមិញ។
នៅ ស្រីពៅ បានសរសើរទៅដល់ភាពស៊ូរបស់ Tain Yang ដែលមិនបានបង្ហាញភាពទន់ជ្រាយក្រោមកណ្តាប់ដៃ និងការទាត់ក្រោមខ្លាំងៗរបស់ខ្លួន គឺកីឡាការិនីរបស់ចិនរូបនេះ នៅតែមានជំហររឹងមាំ និងបានព្យាយាមវាយសងទៅលើ ស្រីពៅ រហូតចប់៩នាទី ហើយទទួលបានលទ្ធផលស្មើគ្នាតាមច្បាប់របស់ Mas Fight ដែលគ្មានអ្នកសន្លប់ កំណត់ឱ្យស្មើគ្នា។
កីឡាការិនី នៅ ស្រីពៅ បាននិយាយក្រោយការប្រកួតថា៖ «ការប្រកួតម៉ាហ្វៃ ជាលើកដំបូងនេះ ខ្ញុំហាត់ពេញ តែបើសិនខ្ញុំហាត់អត់ពេញទេ ខ្ញុំទៅតែម្តង (សន្លប់) ព្រោះកីឡាការិនីចិន Tian Yang រូបនេះ ស៊ុហ្វល្អមែនទែន អ៊ីចឹងបើខ្ញុំហាត់អត់ពេញ ចាញ់ស៊ុហ្វគាត់ គឺយើងអាចសន្លប់របស់គាត់បាន»។
កីឡាការិនី ដែលធ្លាប់សាងបានស្នាដៃ នៅក្នុងការប្រកួតវាយដាក់ទ្រុង ក្នុងព្រឹត្តិការណ៍ ONE Championship នៅ ស្រីពៅ បានបន្ថែមថា៖ «ខ្ញុំធ្លាប់បានមើលការប្រកួតរបស់គាត់ ដោយភាគច្រើនគាត់ផ្តួលដៃគូគាត់ឱ្យសន្លប់ ហើយគាត់ក៏ធ្លាប់ប្រកួត នៅក្នុងព្រឹត្តិការណ៍របស់ ONE Championship ផងដែរ។ គាត់ល្អដៃ ហើយម្យ៉ាងទៀត គាត់រកចាប់ក្លេខ្ញុំ ប៉ុន្តែខ្ញុំបានវាយជាប្រយោល មិនឱ្យគាត់ចូលក្លេខ្ញុំបានទេ»។
នៅ ស្រីពៅ បានបញ្ជាក់ថា៖«ខ្ញុំបានព្យាយាមទាត់ក្រោមច្រើន ប៉ុន្តែគាត់មានការស៊ូមែនទែន។ ខ្ញុំទាត់គាត់ ឡើងឈឺជើងខ្លួនឯង តែខ្ញុំអត់ត្រូវបានគាត់វ៉ៃចំគោលដៅធ្ងន់នោះទេ ហើយតាមរយៈការប្រកួតម៉ាហ្វៃ៩នាទីនេះ ខ្ញុំទទួលបានបទពិសោធថា បើយើងអត់ហាត់ពេញទេ គឺដៃគូម្ខាងទៀត អាចឈ្នះយើង ប៉ុន្តែខ្ញុំចង់ជួបគាត់ម្តងទៀត អ៊ីចឹងបើមានឱកាស ហើយខាងប៉ុស្តិ៍ដាក់ឱ្យជួបទៀត ខ្ញុំនឹងប្រកួតសងសឹកម្តងទៀត»៕
