បរទេស៖ អតីតតារាឆ្នើមអន្តរជាតិហូឡង់ Arjen Robben បានប្រកាសពីការចូលនិវត្តន៍របស់គេ ពីក្លិប FC Groningen របស់គេ កាលពីថ្ងៃព្រហស្បតិ៍ ដើម្បីបញ្ចប់អាជីពដ៏ត្រចះត្រចង់ដែលមានរយៈពេល២ទសវត្សរ៍។ ខណៈដែលត្រូវបានចាត់ទុកថា ជាខ្សែបម្រើស្លាបម្នាក់ក្នុងចំណោមខ្សែបម្រើស្លាបដ៏ឆ្នើមបំផុតក្នុងជំនាន់របស់គេ Robben បានចូលរួមជាមួយនឹងក្លិបយុវជនរបស់គេ FC Groningen កាលពីឆ្នាំមុន ក្រោយពីបានចំណាយពេលជាមួយនឹងក្លិប Chelsea, Real Madrid និង Bayern Munich។
Robben បានសរសេរនៅលើបណ្តាញសង្គម Twitter ថា៖ «ខ្ញុំបានសម្រេចចិត្តបញ្ចប់កីឡាបាល់ទាត់របស់ខ្ញុំហើយ»។ ទាក់ទងនឹងការសម្រេចចិត្តរបស់គេ ដែលត្រូវបានប្រកាសឡើងដោយក្លិប FC Groningen កីឡាករវ័យ៣៧ឆ្នាំរូបនេះ បានឲ្យដឹងថា៖ «វាគឺជាជម្រើសដ៏លំបាកមួយ»។ ក្លិបបានឲ្យដឹងក្នុងសេចក្តីថ្លែងការណ៍មួយថា៖ «គ្រប់គ្នានៅក្លិប FC Groningen បានសង្ឃឹមថា Robben នឹងបន្តលេងមួយរដូវកាលទៀត ប៉ុន្តែ រូបគេបានសម្រេចចិត្ត ក្រោយពីការពិចារណាដ៏យូរអង្វែង»។
ក្នុងនាមជាខ្សែបម្រើម្នាក់ក្នុងចំណោមខ្សែបម្រើស្លាបដ៏លឿនបំផុត និងមានទេពកោសល្យបំផុតជាមួយនឹងជំនាញជើងឆ្វេងរបស់គេ Robben បានស៊ុតបាល់បញ្ចូលទីច្រើនជាង២០០គ្រាប់ ក្នុងកម្រិតក្លិប និង៣៧គ្រាប់សម្រាប់ក្រុមជម្រើសជាតិហូឡង់ ខណៈដែលការប្រកួតជាលើកចុងក្រោយរបស់គេ បានកើតឡើងពេលប៉ះក្រុមស៊ុយអែត ក្នុងទីក្រុង Amsterdam កាលពីខែតុលា ឆ្នាំ២០១៧៕
ប្រភពព័ត៌មាន៖ Channel News Asia
