គ្រូបង្វឹកលោក ស៊ន អេលីត បានចាត់ទុកការទទួលបានជោគជ័យ សម្រាប់ការរៀបចំព្រឹត្តិការណ៍ប្រដាល់ «គុនខ្មែរអលស្តារ៌» លើកទី១ កាលពីថ្ងៃអាទិត្យ កន្លងមកនេះ ថា ធ្វើឡើងដើម្បីខ្មែរ ហើយក៏ដើម្បីបំពេញក្តីស្រម៉ៃម្តាយរបស់ខ្លួនផងដែរ។
យ៉ាងណាក៏ដោយបងប្រុសបង្កើតរបស់វីរកីឡាការិនីតេក្វាន់ដូ ស៊ន សៀវម៉ី លោក ស៊ន អេលីត ហាក់មិនទាន់ប្រាកដថា ខ្លួននឹងអាចរៀបចំការប្រកួតប្រដាល់គុនខ្មែរនអលស្តារ បានជាលើកទី២ ឬក៏យ៉ាងណានោះទេ ប៉ុន្តែបុរសមាត់រឹង សម្តីត្រង់រូបនេះ បានសន្យាថា នឹងខិតខំបន្តទៀត ដើម្បីគុនមខ្មែរ។
លោក ស៊ន អេលីត បានសរសេរបង្ហោះ នៅលើផេចហ្វេសប៊ុករបស់ខ្លួន កាលពីយប់ថ្ងៃចន្ទ ម្សិលមិញថា៖ «ខ្ញុំសប្បាយចឹត្តណាស់ ព្រោះខ្ញុំបានធ្វើរឿងនេះ (រៀបចំការប្រកួតគុនខ្មែរអលស្តារ) ដើម្បីខ្មែរហើយ ហើយក៏បានបំពេញក្តីស្រម៉ៃខ្ញុំហើយដែរ តែខ្ញុំមិនទាន់ហ៊ានសន្យាថា នឹងមានលើកទីពីរទេ ប៉ុន្តែខ្ញុំសន្យា នឹងខឹតខំបន្តទៀត ដើម្បី គុនខ្មែរ»។
ជាមួយគ្នានេះ លោក ស៊ន អេលីត ក៏បានយកថវិកា ដែលទទួលបានពីការចូលរួមរបស់អ្នកគាំទ្រ តាមរយៈ ABA, Wing និង ACLEDA ទៅទិញសម្ភារហ្វឹកហាត់ ដើម្បីចែកជូនទៅដល់ក្លិបប្រដាល់មួយចំនួន ដើម្បីបំពេញទៅតាមការសន្យារបស់ខ្លួនផងដែរ ដោយរូបគេបានបញ្ជាក់ថា៖« ខ្ញុំ ស៊ន អេលីត ហ៊ានសន្យា គឺហ៊ានធ្វើ»។
អង្គរក្សការពារថ្នាក់ដឹកនាំ លោក ស៊ន អេលីត បានសរសេរបង្ហោះ នៅព្រឹកថ្ងៃអង្គារនេះថា៖«ជាដំបូង សូមអរគុណទឹកចិត្តបងប្អូនអ្នកគាំទ្រគុនខ្មែរ ដែលបានចំណាយថវិការ តាមរយៈ ABA Wing Acleda ១ដុល្លា ២ដុល្លា …ដើម្បីចូលរួម មូលនិធិគុនខ្មែរអលស្តារ វគ្គ១ សរុបជាថវិកាបាន ៨៣៥.១៧ដុល្លា»។
អ្នករៀបចំព្រឹត្តិការណ៍ប្រដាល់គុនខ្មែអលស្តាររូបនេះ បានបន្ថែមថា៖ «មូលនិធិអលស្តារ ទី១នេះ យើងបញ្ចប់ត្រឹមថ្ងៃនេះ ហើយខ្ញុំបាទបានយកថិកាទាំងនោះ ទិញជាសម្ភារមួយចំនួនជួយដល់៩ក្លិប ដោយមួយក្លិបៗទទួលបាន ហ្គង់៤គូ និង អង្ករ១បេ សរុបជាទឹកប្រាក់អស់ ១៣៥០ដុល្លា ដូចនេះខ្ញុំបានចំណាយលុយខ្ញុំផ្ទាល់ខ្លួនចំនួន ៥១៥ដុល្លា ពីលើមូលនិធិនេះ ដើម្បីបង្គ្រប់ចំនួនខ្ទង់ចំណាយ»៕
