អ្នកជំនាញផ្នែកកីឡារបស់គណៈកម្មាធិការជាតិរៀបចំ ការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ (CAMSOC) លោក វ៉ាត់ ចំរើន បានអះអាងថា សំណង់ដ៏ធំស្កឹមស្កៃនៃពហុកីឡដ្ឋានជាតិមរតកតេជោ មិនមែនសម្រាប់ប្រើគ្រាន់តែជាកន្លែងរៀបចំការប្រកួតស៊ីហ្គេម ប៉ុណ្ណោះទេ ប៉ុន្តែពហុកីឡដ្ឋានថ្មនេះ ក៏នឹងក្លាយជាទីកន្លែង សម្រាប់រៀបចំការប្រកួតកីឡាអូឡាំពិក និងការប្រកួតបាល់ទាត់ពិភពលោក (World Cup) នាពេលអនាគត ផងដែរ។
លោក វ៉ាត់ ចំរើន អគ្គលេខាធិការ CAMSOC ដែលបានដឹកនាំគណៈប្រតិភូមួយក្រុម ចុះទៅពិនិត្យមើលពហុកីឡដ្ឋានជាតិមរតកតេជោ កាលពីព្រឹកថ្ងៃព្រហស្បតិ៍នេះ បានថ្លែងថា៖«តាមការដើរមើលពិនិត្យយ៉ាងលម្អិតនៅថ្ងៃនេះ យើងឃើញថា ពហុកីឡដ្ឋានជាតិមរតកតេជោ ដ៏ធំនេះ មានលក្ខណៈបច្ចេកទេស នៃការរៀបចំ ទៅតាមលំដាប់លំដោយ គឺត្រូវនឹងស្តង់ដារពហុកីឡដ្ឋានអន្តរជាតិ»។
លោកបានបន្តថា៖ «ពហុកីឡដ្ឋានថ្មីនេះ យើងអាចរៀបចំព្រឹត្តិការណ៍ធំៗ យើងអាចរៀបចំការប្រកួតកម្រិតអន្តរជាតិ ពីកម្រិតទាប ដល់កម្រិតខ្ពស់បំផុត ចំណែកព្រឹត្តិការណ៍ពីកម្រិតតូច ដល់កម្រិតធំ ក៏យើងអាចធ្វើបាន និងរៀបចំពិធីជាតិធំៗ ក៏អាចធ្វើបាន នៅទីនេះ ព្រោះមានភាពងាយស្រួល តែសំខាន់ការរៀបចំឱ្យមានសណ្តាប់ធ្នាប់ តាមបន្ទប់នីមួយៗ តាមកន្លែងនីមួយៗ ដើម្បីយើងងាយស្រួល ក្នុងការធ្វើពិធី និងងាយស្រួលដល់ការរក្សានៅសណ្តាប់ធ្នាប់ និងសន្តិសុខ ហើយងាយស្រួល ក្នុងការចូល និងចេញ ទៅតាមទីតាំងមួយៗ ដែលបានកំណត់រួចហើយ»។
អ្នកជំនាញកីឡា ដែលជាអគ្គលេខាធិការ NOCC ផងនោះ បានបន្ថែមថា៖«អ៊ីចឹងទេ ពហុកីឡដ្ឋានជាតិមតកតេជោ ជាពហុកីឡដ្ឋានមួយ ដែលថ្ងៃអនាគតទៅ យើងអាចរៀបចំការប្រកួតកម្រិតអន្តរជាតិធំៗ ដោយពេលនេះ យើងត្រៀមសម្រាប់ការប្រកួតស៊ីហ្គេម លើកទី៣២ ឆ្នាំ២០២៣ និងត្រៀមសម្រាប់ការប្រកួតហ្គេមផ្សេងៗទៀត ដែលយើងអាចឈានដល់អាស៊ីហ្គេម អូឡាំពិកហ្គេម នៅថ្ងៃក្រោយទៀត»។
លោកបានបញ្ជាក់ថា៖«បន្ថែមលើនេះ យើងក៏អាចឈានធ្វើជាបេក្ខភាពការប្រកួតបាល់ទាត់ពិភពលោក ផងដែរ ព្រោះយើងមានពហុកីឡដ្ឋានក្នុងកម្រិតស្តង់ដារអន្តរជាតិរួចហើយ។ អ៊ីចឹងថ្ងៃនេះ យើងពិនិត្យ នៅរាល់បន្ទប់ទាំងអស់ ដែលយើងប្រើប្រាស់បាន និងរៀបចំបំពាក់ស្លាកបន្ទប់ រៀបចំកន្លែងបច្ចេកទេស និងកន្លែងសម្រាកជាដើម ឱ្យបានត្រឹមត្រូវ រួចរាយការណ៍ទៅថ្នាក់ដឹកនាំ ដើម្បីឱ្យលោកសម្រេច ទៅលើការបំពាក់ និងការរៀបចំ ជាចុងក្រោយ»៕
