វិមានកីឡដ្ឋាន នៃពហុកីឡដ្ឋានជាតិមរតកតេជោ គ្រោងនឹងរៀបចំពិធីសម្ពោធដាក់ឱ្យប្រើប្រាស់ជាផ្លូវការ នាចុងខែវិច្ឆិកា ឆ្នាំ២០២១នេះ ហើយពិធីសម្ពោធនេះ ត្រូវបានថ្នាក់ដឹកនាំ គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ (CAMSOC) នឹងរៀបចំក្នុងទ្រុងទ្រាយធំ ដ៏ពិសេស គឺធ្វើយ៉ាងណាឱ្យស័ក្តិសមជានិមិត្តរូប នៃចំណងមិត្តភាពដែលថែប ដ៏យូរអង្វែងរវាងកម្ពុជា-ចិន។
នៅក្រោយកិច្ចប្រជុំប្រចាំសប្តាហ៍របស់ CAMSOC ក្រោមអធិបតីភាព លោកបណ្ឌិត ថោង ខុន ជាអនុប្រធានអចិន្ដ្រៃយ៍ CAMSOC កាលពីថ្ងៃអង្គារម្សិលមិញ លោក វ៉ាត់ ចំរើន បានថ្លែងថា អង្គប្រជុំលើកនេះ បានលើកឡើង អំពីការត្រៀមរៀបចំពិធីសម្ពោធដាក់ឱ្យប្រើប្រាស់ជាផ្លូវការ នៅ«វិមានកីឡដ្ឋាន នៃពហុកីឡដ្ឋានជាតិមរតកតេជោ» ដែលគ្រោងនឹងរៀបចំ នៅចុងខែវិច្ឆិកាខាងមុខ បន្ទាប់ពីសមិទ្ធផលប្រវត្តិសាស្ដ្រដ៏អស្ចារ្យនេះ ត្រូវបានរៀបចំពិធីប្រគល់-ទទួល រួចរាល់ កាលពីថ្ងៃទី១២ ខែកញ្ញា។
អគ្គលេខាធិការ CAMSOC លោក វ៉ាត់ ចំរើន បញ្ជាក់ថា៖ «ដោយមានការណែនាំផ្ទាល់ពីឯកឧត្តមបណ្ឌិត ថោង ខុន ពិធីសម្ពោធនេះ គឺធ្វើយ៉ាងណាឱ្យស័ក្ដិសម ទៅនឹងហេដ្ឋារចនាសម្ព័ន្ធដ៏មហិមា និងស័ក្ដិសមជានិមិត្តរូប នៃចំណងមិត្តភាពដែកថែប ដ៏យូរអង្វែងរវាងកម្ពុជា-ចិន អ៊ីចឹងកម្មវិធីនេះ មានទាំងកម្មវិធីសិល្បៈវប្បធម៌ និងកម្មវិធីកីឡា ដែលយើងកំពុងស្វែងរកនូវប្រភេទកីឡាណា ដែលអាចប្រកួតជាមិត្តភាពកម្ពុជា-ចិន បាន»។
ជាមួយគ្នានេះ ពិធីសម្ពោធ វិមានកីឡដ្ឋាន នៃពហុកីឡដ្ឋានជាតិមរតកតេជោ ក៏នឹងត្រូវធ្វើឡើង ដើម្បីជាភាពគំរូមួយ ដើម្បីបើកផ្លូវ ឈានទៅធ្វើជាម្ចាស់ផ្ទះស៊ីហ្គេម លើកទី៣២ ឆ្នាំ២០២៣ ជាប្រវត្តិសាស្រ្ត លើកដំបូង របស់កម្ពុជា ផងដែរ ខណៈពហុកីឡដ្ឋានថ្មីនេះ បានសាងសង់លើផ្ទៃដី ១៦,៤ហិកតា ផ្ទៃក្រឡាសំណង់អាគារ ៨៦,០០០ម៉ែត្រការ៉េ ដែលអាចផ្ទុកអ្នកទស្សនាបាន ៦ម៉ឺននាក់ ដែលជាជំនួយឥតសំណងរបស់សាធារណរដ្ឋប្រជាមានិតចិន ក្នុងទឹកប្រាក់ប្រមាណ ១៥០លានដុល្លារអាមេរិក។
អ្នកជំនាញកីឡា លោក វ៉ាត់ ចំរើន បានបញ្ជាក់បន្ថែមថា៖ «ឥឡូវនេះ យើងកំពុងរៀបចំគណៈកម្មការរៀបចំពិធីសម្ពោធនេះ ដែលគ្រោងរៀបចំឡើងក្រោមអធិបតីភាពដ៏ខ្ពង់ខ្ពស់របស់សម្ដេចតេជោនាយករដ្ឋមន្ដ្រី ហើយនិងធ្វើឱ្យកម្មវិធីនេះ ក្លាយទៅជាព្រឹត្តិការណ៍មួយ ដែលបើកផ្លូវឆ្ពោះទៅរកស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣ របស់យើង។ ឯកឧត្តមបណ្ឌិត ថោង ខុន បញ្ជាក់ថា យើងត្រូវរួសរាន់ធ្វើឱ្យទាន់ពេលវេលា និងធ្វើឱ្យមានប្រសិទ្ធភាព ហើយធ្វើឱ្យត្រឹមត្រូវ តាមកិត្តិយស នៃមរតកដ៏មហាសាលនេះ»៕