«ខ្ញុំមានសិទ្ធប្ដឹងបាន ពីពាក្យសម្ដីរបស់អ្នកស្រី» នេះជាការបញ្ជាក់របស់កីឡាករជម្រើសជាតិ ឈុត សេរីវ៉ាន់ថង តាមសារស័ព្ទរបស់ខ្លួន នៅលើប្រព័ន្ធសង្គមហ្វេសប៊ុក ដើម្បីតប់ទៅនឹងការរិះគន់ចំពោះរូបគេ ពីសំណាក់អ្នកស្រី សាំង សុម៉ាលី ដែលជាប្រពន្ធរបស់អតីតកីឡាករជើងខ្លាំង លោក អេ ភូថង។
សង្រ្គាមពាក្យសម្តី ដែលបានរីកសាយ នៅលើប្រព័ន្ធសង្គមហ្វេសប៊ុកនេះ បានកើតមានឡើង បន្ទាប់ពីអ្នកស្រី សាំង សុម៉ាលី បានបង្ហោះនៅលើហ្វេសប៊ុករបស់ខ្លួន (សសុម៉ាលី ភូថង) ដោយបានចោទ ឈុត សេរីវ៉ាន់ថង ថា ធ្លាប់លួច លទ្ធផល ឡុង ជិន និងចង់លួចលទ្ធផល ម៉ឺន មេឃា ដែលជាកូនរបស់អ្នកស្រីទៀត តែមិនអាចធ្វើទៅបាន។
ការលើកឡើងរបស់អ្នកស្រី សាំង សុម៉ាលី គឺសំដៅទៅដល់ការប្រកួតដណ្តើមខ្សែក្រវាត់ នៅលើសង្វៀន CNCC កន្លងមកនេះ ដោយកាលនោះ ឈុត សេរីវ៉ាន់ថង ត្រូវបានប្រកាសឱ្យឈ្នះពិន្ទុ ឡុង ជិន ទាំងចម្រូងចម្រាស់ នៅវគ្គជម្រុះតាមពូល ប៉ុន្តែសម្រាប់ការជួប ម៉ឺន មេឃា វ៉ានប់ថង បានចាញ់ដោយសន្លប់ និងបានបន្តចាញ់ពិន្ទុ ម៉ឺន មេឃា ទៀត នៅពេលអ្នកទាំង២ បានជួបគ្នាជាថ្មី នៅវគ្គផ្តាច់ព្រ័ត្រ ហើយជ័យជម្នះនោះ បានជួយឱ្យ ម៉ឺន មេឃា ក្លាយជាម្ចាស់ខ្សែក្រវាត់ និងប្រាក់រង្វាន់ចំនួន៥ពាន់ដុល្លារ។
សម្រាប់ការប្រើពាក្យថា លួចលទ្ធផលនេះ ពីសំណាក់អ្នកស្រី សាំង សុម៉ាលី នេះ ឈុត សេរីវ៉ាន់ថង បានប្រតិកម្មខ្លាំង ហើយបានចាត់ទុកទង្វើរបស់អ្នកស្រី សុម៉ាលី ថា ជាបទបរិកេរ្តិ៍ ជាសាធារណៈ ដែលរូបគេអាចប្តឹងបាន ទៅតាម មាត្រា៣០៥។
ឈុត សេរីវ៉ាន់ថង បានសរសេរតបទៅប្រព័ន្ធរបស់ អេ ភូថង កាលពីម្សិលមិញថា៖«ក្នុងនាមខ្ញុំជាកីឡាករគុនខ្មែរ និងជាកីឡាករជម្រើសជាតិឃីកបុកស៊ីង ខ្ញុំមានប្រតិកម្មទៅលើពាក្យសម្ដីរបស់ ភរិយាលោកគ្រូ អេ ភូថង គឺអ្នកស្រី សសុម៉ាលី (សាំង សុម៉ាលី) ក្នុងនោះអ្នកស្រីបានសរសេរថា (#អាណិតខ្លោចចិត្តអត់ វ៉ាន់ថង ធ្លាប់លួចលទ្ធផល ឡុង ជិន ម្ដង មិចចង់លួចលទ្ធផល មេឃា ទៀតមែន តែមិនអាច) ពាក្យគាត់និយាយថា ខ្ញុំលួច គឺស្មើរនឹងគាត់ចោទខ្ញុំថាជា (ចោរ) បាត់ទៅហើយ ទាំងដែលនៅក្នុងនោះ ជាកន្លែងប្ដីអ្នកស្រី ធ្វើការផងដែរ»។
កីឡាករជើងខ្លាំងមកពីជាយដែនរូបនេះ បានបន្តថា៖ «អ្នកស្រី សសុម៉ាលី និយាយបែបនេះ គឺអ្នកស្រីបរិហាកេរ្តិ៍ខ្ញុំ ច្បាស់ណាស់ ពីបទចោទប្រកាន់ថា ខ្ញុំជាចោរ (ចោរលួចលទ្ធផល)។ សូមគិតឱ្យបានច្បាស់ មុននឹងបរិហាកេរ្តិ៍ខ្ញុំ ជាសាធារណៈបែបនេះ ព្រោះកាលដែលសរសេរបែបនេះ វាប៉ះពាល់ដល់កិត្តិយសរបស់ខ្ញុំ ដែលជាកីឡាករជម្រើសជាតិម្នាក់ ព្រោះខ្ញុំមានសិទ្ធប្ដឹងបាន ពីពាក្យសម្ដីរបស់អ្នកស្រី សូមអ្នកស្រី មើលមាត្រា៣០៥ ផង មុននឹងនិយាយឱ្យតែរួចពីមាត់បែបនេះ»។
យ៉ាងណាក៏ដោយ ការប្រើសារស័ព្ទវាយប្រហារគ្នា នៅលើប្រព័ន្ធសង្គមហ្វេសប៊ុកនេះ អាចនឹងត្រូវបញ្ចប់ តាមរយៈការបង្ហោះសារគម្រាមប្តឹងរបស់ ឈុត សេរីវ៉ាន់ថង នេះ ព្រោះបន្ទាប់ពីការបង្ហោះសារនេះ អ្នកស្រី សាំង សុម៉ាលី បានលុបចោលសារទាំងអស់ ដែលអ្នកស្រីបានរិះគន់ មកលើ វ៉ាន់ថង ហើយសកម្មភាពនេះ អាចបង្ហាញថា អ្នកស្រី សុម៉ាលី បានយល់ ហើយដឹងថា ខ្លួនពិតជាមានកំហុស ពីការសរសេរបង្ហោះបរិហារកេរ្តិ៍អ្នកដទៃ នៅលើប្រព័ន្ធសង្គមនេះ ព្រោះច្បាប់ នៅក្នុងប្រទេសកម្ពុជា ពិតជាបានចែកប្រាកដមែន ទៅលើបញ្ហានេះ៕
