បរទេស៖ គណៈកម្មាធិការប្រតិបត្តិ នៃសហព័ន្ធកីឡាបាល់ទាត់កម្ពុជា (FFC) ក្រោមការដឹកនាំរបស់ឧត្តមនាយឧត្តមសេនីយ៍ សៅ សុខា បានប្រកាសតែងតាំង លោក សាតូស៊ី សៃតូ (Satoshi Saito) ដែលធ្លាប់មានបទពិសោធជាអ្នកគ្រប់គ្រងផ្នែកទីផ្សារនៅក្លិបយក្ស FC Barcelona និងជាទីប្រឹក្សារបស់សហព័ន្ធកីឡាបាល់ទាត់ពិភពលោក(FIFA) ផងនោះ មកធ្វើជានាយកប្រតិបត្តិនៃក្រុមហ៊ុនលីគបាល់ទាត់កម្ពុជា ដែលទើបត្រូវបានបង្កើតឡើង ជាលើកដំបូង នៅកម្ពុជា។
គំនិតផ្ដួចផ្ដើមដ៏សំខាន់របស់សហព័ន្ធកីឡាបាល់ទាត់កម្ពុជា ក្នុងការបង្កើតក្រុមហ៊ុនលីគបាល់ទាត់កម្ពុជានេះ គឺជាជំហានដ៏សំខាន់មួយទៀត ក្នុងការធានានូវការអភិវឌ្ឍ និងភាពជោគជ័យ សម្រាប់បាល់ទាត់កម្ពុជា នៅថ្ងៃអនាគត រួមទាំងគោលដៅដែលបានកំណត់សម្រាប់ការប្រកួតកីឡាស៊ីហ្គេម ឆ្នាំ២០២៣ នៅកម្ពុជា។
ជាមួយគ្នានេះ ក្រោមការដឹកនាំរបស់ លោក សាតូស៊ី សៃតូ ដែលធ្លាប់មានបទពិសោធយ៉ាងជោគជាំ លើជំនាញនេះ បានធ្វើឱ្យប្រធាន FFC ជឿថា នឹងជួយឱ្យវិស័យបាល់ទាត់ នៅកម្ពុជា កាន់តែរីកចម្រើន។
ឧត្តមនាយឧត្តមសេនីយ៍ សៅ សុខា បានថ្លែងថា៖«នេះ គឺជាយុគសម័យថ្មីមួយនៃបាល់ទាត់កម្ពុជា។ បើយើងសម្លឹងមើលប្រទេសដែលមានបាល់ទាត់ឈានមុខជុំវិញពិភពលោក ការមានលីគអាជីពប្រកបដោយគុណភាពខ្ពស់ នឹងរួមចំណែកដ៏ភាពជោគជ័យរបស់ក្រុមជម្រើសជាតិ និងពង្រឹងប្រព័ន្ធអេកូបាល់ទាត់ (Football Ecosystem) បានកាន់តែប្រសើរទៀតផង» ។
លោកបានបន្ថែមថា៖ «ខ្ញុំជឿជាក់ថា លោក សាតូស៊ី ដែលមានបទពិសោធច្រើនក្នុងការគ្រប់គ្រងកីឡាបាល់ទាត់ ជាបុគ្គលមួយរូបដែលស័ក្ខិសមបំផុត ក្នុងការតម្រង់អនាគតរបស់ក្រុមហ៊ុនលីគបាល់ទាត់កម្ពុជា ដែលទើបបង្កើតថ្មីនេះ និងធ្វើការយ៉ាងជិតស្និទ្ធជាមួយភាគីពាក់ព័ន្ធរបស់យើង ដើម្បីភាពជោគជ័យថ្មីមួយទៀត នៅក្នុងវិស័យបាល់ទាត់កម្ពុជា»។
ចំណែកលោក សាតូស៊ី បានលើកឡើងថា «ខ្ញុំបានឃើញពីការផ្លាស់ប្ដូររបស់បាល់ទាត់កម្ពុជាក្នុងរយៈពេល ៨ឆ្នាំចុងក្រោយនេះ ហើយវាគឺជាកិត្តិយសដ៏ធំធេងរបស់ខ្ញុំ ដែលបានចូលរួមក្នុងដំណើរនេះ ដើម្បីនាំមកនូវភាពរុងរឿងដល់បាល់ទាត់កម្ពុជា។ ខ្ញុំសូមសម្ដែងនូវសេចក្ដីអរគុណយ៉ាងក្រៃលែង ចំពោះទំនុកចិត្ត និងភាពជឿជាក់ដ៏ធំធេងលើរូបខ្ញុំ ពីឯកឧត្តមប្រធាន និងសមាជិកគណៈកម្មាធិការប្រតិបត្តិរបស់សហព័ន្ធកីឡាបាល់ទាត់កម្ពុជា»។
លោក សាតូស៊ី បន្ដថា «ដំណើរឆ្ពោះទៅមុខក្នុងស្ថានភាពជំងឺរាតត្បាតនេះ អាទិភាពរបស់ខ្ញុំ គឺការវាយតម្លៃឡើងវិញ អំពីការរៀបចំលីគ ក្នុងនោះមានទាំងរចនាសម្ព័ន្ធ ដើម្បីធ្វើឱ្យកាន់តែប្រសើរឡើងនូវការគ្រប់គ្រង និងសហការណ៍ជាមួយក្លិបជាសមាជិក ដើម្បីលើកកម្ពស់ និងពង្រឹងនៃប្រតិបត្តិការទូទៅ និងបង្កើនចំណងមិត្តភាពរបស់យើង ក្នុងកិច្ចទំនាក់ទំនងជាមួយភាគីពាក់ព័ន្ធ ដើម្បីរួមគ្នាផ្លាស់ប្ដូរ និងអភិវឌ្ឍវិស័យបាល់ទាត់កម្ពុជារបស់យើង ប្រកបដោយចីរភាព និងនិរន្ដរភាព»៕
