បរទេស៖ លោក Steven Gerrard ត្រូវបានប្រកាសថា ជាអ្នកចាត់ការទូទៅថ្មីរបស់ក្លិប Aston Villa ក្នុងកិច្ចសន្យារយៈពេល៣ឆ្នាំកន្លះ ក្រោយពីចាកចេញពីក្លិប Rangers។
អតីតខ្សែបម្រើដ៏ឆ្នើមរបស់ក្លិប Liverpool និងក្រុមជម្រើសជាតិអង់គ្លេសរូបនេះ ចូលជំនួសកន្លែងលោក Dean Smith ដែលត្រូវបានបណ្តេញចេញក្រោយពីការរងបរាជ័យ៥លើកជាប់ៗគ្នា។ លោក Gerrard បានក្លាយជាអ្នកចាត់ការទូទៅរបស់ក្លិប Rangers ចាប់តាំងពីខែមិថុនា ឆ្នាំ២០១៨ និងបានឈ្នះពានក្របខ័ណ្ឌស្កុតឡេន Premiership កាលពីរដូវកាលមុន។ លោកនឹងចាកចេញពីក្លិបដែលកំពុងតែស្ថិតក្នុងចំណាត់ថ្នាក់លេខ១ លើតារាងលីក ខណៈដែលពួកគេក៏ត្រូវតែត្រៀមសម្រាប់ការប្រកួតពាន League Cup វគ្គពាក់កណ្តាលផ្តាច់ព្រ័ត្រ ជាមួយនឹងក្រុម Hibernian នៅថ្ងៃអាទិត្យនេះ ផងដែរ។
ក្លិប Aston Villa បានចាត់ទុកលោក Gerrard ជាគោលដៅទី១របស់ពួកគេ ខណៈដែលពួកគេកំពុងតែព្យាយាមឡើងឲ្យផុតចំណាត់ថ្នាក់លេខ១៦ ដោយនាំមុខពីលើក្រុមស្ថិតក្នុងតំបន់កាត់ចោល២ពិន្ទុ ក្រោយពីបានបញ្ចប់ក្នុងចំណាត់ថ្នាក់លេខ១១ កាលពីរដូវកាលមុន។ ការប្រកួតទី១របស់លោក Gerrard គឺលើទឹកដីខ្លួនឯង ដោយត្រូវប៉ះជាមួយនឹងក្រុម Brighton នៅថ្ងៃសៅរ៍ សប្តាហ៍ក្រោយ។ អតីតប្រធានក្រុម Liverpool នឹងត្រូវដឹកនាំ Aston Villa ទៅកាន់កីឡដ្ឋាន Anfield នៅថ្ងៃទី១១ ខែធ្នូ៕
ប្រភពព័ត៌មាន៖ The Guardian
