ភាពចៃដន់ដ៏កម្រមួយ បានកើតមានឡើង ក្នុងការប្រកួតដណ្តើមប្រាក់លាន នៅលើសង្វៀនថោន កាលពីថ្ងៃអាទិត្យ ព្រោះអ្នកឈ្នះ ដែលត្រូវឡើងទៅជួបគ្នានៅវគ្គផ្តាច់ព្រ័ត្រ សុទ្ធតែមានរបួសជាប់ខ្លួន មិនអាចប្រកួតបាន ហើយបញ្ហានេះ បានផ្តល់សំណាងសម្រាប់អ្នកចាញ់ ផល សោភ័ណ្ឌ ឱ្យឈ្នះបានប្រាក់លាន ទៅវិញ ក្រោយរូបគេ បានយកឈ្នះ ឡុង បេនលឿន ក្នុងនាមជាគូប្រកួតស្ម័គ្រចិត្ត នៅវគ្គផ្តាច់ព្រ័ត្រនោះ។
តាមរយៈការប្រកួតយ៉ាងស្វិតស្វាញនោះ ផល សោភ័ណ្ឌ បានបន្តចាញ់ពិន្ទុ យ៉េន ឌីណា មិនឯកច្ឆន្ទ ៣-២ នៅក្នុងវគ្គជម្រុះ៣ទឹកដំបូង ចំណែក លន បញ្ញា ក៏បានយកឈ្នះ ឡុង បេនលឿន ដោយពិន្ទុដូចគ្នា ប៉ុន្តែរឿងដ៏គួរឱ្យសោកស្តាយ និងនឹកស្មានមិនដល់នោះ គឺទាំង យ៉េន ឌីណា និង លន បញ្ញា សុទ្ធតែមានរបួសជាប់ខ្លួន មិនអាចឡើងទៅប្រកួតនៅវគ្គផ្តាច់ព្រ័ត្រដូចគ្នា។
ជាមួយគ្នានោះ ពិធីករប្រចាំនៅសង្វៀនថោន បានប្រកាសពីការសម្រេចរបស់គណៈកម្មការរៀបចំថា ត្រូវលើកពេលការជួបគ្នារវាង យ៉េន ឌីណា និង លន បញ្ញា នេះទៅធ្វើនៅពេលក្រោយ ដោយរក្សាប្រាក់រក្សាប្រាក់ ដែលត្រូវប្រកួតប្រជែងនេះ ទុកនៅដដែល គឺអ្នកឈ្នះបាន១ពាន់ដុល្លារ ហើយអ្នកចាញ់បាន៦០០ដុល្លារ។
ជាមួយហេតុការណ៍ ដែលបានកើតមានឡើងដ៏កម្រនេះ គណៈកម្មការបានសម្រេចឱ្យអ្នកចាញ់ទាំង២នាក់ គឺ ផល សោភ័ណ្ឌ និង ឡុង បេនលឿន ឡើងប្រកួតគ្នាផ្តាច់ព្រ័ត្រជំនួសវិញ ក្នុងនាមជាអ្នកស្ម័គ្រចិត្ត ហើយជាលទ្ធផល ផល សោភ័ណ្ឌ បានទាត់ឱ្យ ឡុង បេនលឿន ខូចកែងដៃស្តាំ និងបោះបង់ចោលការប្រកួត នៅត្រឹមទឹកទី២ ដើម្បីឈ្នះបានប្រាក់លានចំនួន៤លានរៀល និងប្រាក់រង្វាន់បន្ថែម ដោយបានផ្តួលគូប្រកួតឱ្យសន្លប់ចំនួន៨០០ដុល្លារទៀត រីឯ ឡុង បេនលឿន ទទួលបាន ២,៤លានរៀល។
ការក្រសោបបានប្រាក់រង្វាន់យ៉ាងច្រើននេះ ត្រូវបានគេមើលឃើញថា ផល សោភ័ណ្ឌ ជួបនឹងសំណាង ដែលមិនធ្លាប់មានកន្លងមក ព្រោះកុំថាឡើយ យ៉េន ឌីណា និង លន បញ្ញា ដែលមានរបួស គឺសូម្បី ឡុង បេនលឿន ក៏មានរបួសជាប់ខ្លួនដែរ។
ឡុង បេនលឿន បាននិយាយក្រោយការប្រកួតថា៖ «ខ្ញុំមានរបួសដៃឆ្វេង តាំងពីការប្រកួតជាមួយ លន បញ្ញា ហេតុនេះខ្ញុំព្យាយាមបិទខាងឆ្វេង ប៉ុន្តែគាត់ (ផល សោភ័ណ្ឌ) ទាត់ចូលខាងឆ្វេង ធ្វើឱ្យមានរបួសធ្ងន់ជាង មិនអាចបន្តការប្រកួតទៀតបាន។ តែទោះបីជាយ៉ាងណា ខ្ញុំសប្បាយចិត្ត ដែលបានឡើងទៅប្រកួតបន្តទៀត ទាំងរូបខ្ញុំ បានចាញ់ នៅក្នុងវគ្គជម្រុះ ទៅហើយនោះ»។
យ៉ាងណាមិញ សម្រាប់ការដាក់ឱ្យប្រកួតឡើងវិញរវាង លន បញ្ញា និង យ៉េន ឌីណា អាចមានរយៈពេលច្រើនខែទៀត ព្រោះប្រភពច្បាស់ការ បានប្រាក់ឱ្យថា បញ្ហាបាក់ឆ្អឹងថ្គាមរបស់ យ៉េន ឌីណា ពេលប្រកួតជាមួយ ផល សោភ័ណ្ឌ នោះ គឺយ៉ាងហោចណាស់ ក៏ត្រូវការពេលសម្រាកព្យាបាល ចន្លោះពី៣ទៅ៦ខែ ដែរ៕