ក្រុមអត្តពលិកជម្រើសជាតិកីឡាហែលទឹកកម្ពុជា នឹងចាប់ផ្តើមប្រកួតប្រជែង នៅលើវិញ្ញាសារបស់ខ្លួន ក្នុងព្រឹត្តិការណ៍ប្រកួតកីឡាហែលទឹកជ្រើសរើសជើងឯកកម្រិតពិភពលោក ទីខ្លី អាងហែលទឹកប្រវែង២៥ ម៉ែត្រ «World Swimming Championships (25 meters) នៅ ទីក្រុងអាប៊ូដាប៊ី ប្រទេសអារ៉ាប់រួម នាថ្ងៃព្រហស្បតិ៍នេះ បន្ទាប់ពីពួកគេ បានហ្វឹកហាត់សម និងទៅដល់ទីនោះ កាលពីថ្ងៃទី១៤ ខែធ្នូ ឆ្នាំ២០២១។
តាមព័ត៌មាន ដែលត្រូវបានបង្ហោះនៅលើផេចហ្វេសប៊ុករបស់សហព័ន្ធខ្មែរកីឡាហែលទឹក
កាលពីព្រឹកថ្ងៃព្រហស្បតិ៍នេះ បានឱ្យដឹងថា កីឡាករកូនខ្មែររស់នៅសហរដ្ឋអាមេរិក ម៉ាត់ថេរ ហ្រ្វេងតារាបេននីឈី នឹងត្រូវធ្វើការប្រកួតមុនគេ នៅលើវិញ្ញាសាហែលរបៀបមេអំបៅ ចម្ងាយ២០០ម៉ែត្រ នៅថ្ងៃនេះ។
យ៉ាងណាក៏ដោយ សម្រាប់ការប្រកួតជើងឯកពិភពលោកនេះ ត្រូវបានលោក ហែម គីរី បានប្រាប់ថា មានអត្តពលិក មកពីប្រមាណ១៨០ប្រទេស នៅលើពិភពលោក បានចូលរួមប្រកួតប្រជែង ហើយគោលដៅសំខាន់របស់ក្រុមជម្រើសជាតិហែលទឹកកម្ពុជា គឺប្រកួតប្រជែងស្វែងរកសមិទ្ធផលល្អ ដើម្បីអភិវឌ្ឍកម្រិតបច្ចេកទេសបន្ថែមទៀត ពោលកម្ពុជា មិនទាន់អាចមានលទ្ធភាព ឈានទៅប្រកួតរកមេដាយ នៅក្នុងការប្រកួតកម្រិតពិភពលោកនេះទេ។
តែទោះបីជាយ៉ាងណា អគ្គលេខាធិការសហព័ន្ធខ្មែរកីឡាហែលទឹក លោក ហែម គីរី មានការជឿជាក់ថា បេក្ខភាពតំណាងឱ្យកម្ពុជា ដែលត្រូវបានបញ្ជូនឱ្យទៅប្រកួតជើងឯកពិភពលោក លើកនេះ គឺមានសមត្ថភាពល្អ អាចនឹងដណ្តើមបានមេដាយ នៅក្នុងការប្រកួតស៊ីហ្គេម លើកទី៣១ ឆ្នាំ២០២២ នៅវៀតណាម ជាពិសេសស៊ីហ្គេម លើកទី៣២ ឆ្នាំ២០២៣ ដែលកម្ពុជា ត្រូវធ្វើជាម្ចាស់ផ្ទះ។
គួរបញ្ជាក់ថា សម្រាប់ការប្រកួតជើងឯកពិភពលោក ដែលត្រូវចាប់ផ្តើមថ្ងៃនេះ រហូតដល់ថ្ងៃទី២១ ខែធ្នូ ឆ្នាំ២០២១នោះ សហព័ន្ធខ្មែរកីឡាហែលទឹក បានបញ្ជូនក្រុមអត្តពលិកចំនួន៤នាក់ ទៅចូលរួម ក្រោមការដឹកនាំរបស់លោកគ្រូ នាង សូរិទ្ធិយ៉ា ហើយបេក្ខភាពទាំង៤នាក់នេះ រួមមានកីឡាករ ម៉ាត់ថេវ ហ្រេ្វងតារា បេននីឈី កូនខ្មែររស់នៅសហរដ្ឋអាមេរិក កីឡាការិនី ម៉ីលិតាន មីននិក កូនខ្មែររស់នៅសហរដ្ឋអាមេរិក កីឡាករ មនត្រស ផានសុវណ្ណអារុន ស្ថិតក្រុមជម្រើសជាតិ កំពុងហ្វឹកហាត់នៅប្រទេសថៃដោយទទួលបានអាហារូបករណ៍ ពីសហព័ន្ធហែលទឹកអន្តរជាតិ(FINA) និងកីឡាការិនី កាំង មុយនីន កំពុងហ្វឹកហាត់ ក្នុងក្រុមជម្រើស នៅប្រទេសកម្ពុជា៕
