កីឡាករ កីឡាការិនីជម្រើសជាតិហែលទឹកកម្ពុជាទាំង៤នាក់ បានបញ្ចប់បេសកកម្ម នៃការចូលរួមប្រកួតកីឡាហែលទឹកជ្រើសរើសជើងឯកពិភពលោក (អាងហែលទឹក២៥ម៉ែត្រ) នៅក្នុងទីក្រុងអាប៊ូដាប៊ី ប្រទេសអារ៉ាប់រួម ជាផ្លូវការហើយ កាលពីថ្ងៃអង្គារ បន្ទាប់ពីពួកគេ បានចាប់ផ្តើមការប្រកួតប្រជែង តាំងពីថ្ងៃទី១៦ ខែធ្នូ ឆ្នាំ២០២១មក។
តាមរយៈការប្រកួតចំនួន៥ថ្ងៃពេញ ក្នុងព្រឹត្តិការណ៍ដ៏ធំ ដែលមានប្រទេសជាច្រើន នៅលើពិភពលោកបានចូលរួមនេះ ទាំងកីឡាករកូនខ្មែររស់នៅអាមេរិក ម៉ាត់ថេវ ហ្រេ្វងតារា បេននីឈី កីឡាការិនី ម៉ីលិតាន មីននិក កូនខ្មែររស់នៅសហរដ្ឋអាមេរិក កីឡាករ មនត្រស ផានសុវណ្ណអារុន ស្ថិតក្រុមជម្រើសជាតិ កំពុងហ្វឹកហាត់នៅប្រទេសថៃ និងកីឡាការិនី កាំង មុយនីន កំពុងហ្វឹកហាត់ ក្នុងក្រុមជម្រើស នៅប្រទេសកម្ពុជា សុទ្ធតែបានបំបែកកំណត់ត្រាថ្មីជាតិ នៅក្នុងព្រឹត្តិការណ៍នេះ។
លោក ហែម គីរី អគ្គលេខាធិការសហព័ន្ធខ្មែរកីឡាហែលទឹកកម្ពុជា និងលោកនាង សូរិទ្ធិយ៉ា ជាគ្រូបង្វឹក បានកត់ត្រានៅថិរវេលា ដែលក្រុមអត្តពលិកកម្ពុជា ធ្វើបាន ហើយក៏បានអបអរសាទរដល់អ្នកទាំង៤នេះ ដែលសុទ្ធតែបានបំបែកកំណត់ត្រាថ្នាក់ជាតិ នៅក្នុងការប្រកួតជើងឯកពិភពលោក ដែលមានន័យថា ថិរវេលា ដែលអត្តពលិកទាំង៤នាក់ ធ្វើបាននៅពេលនេះ គឺកាត់តែខិតកៀក ទៅរកការឈ្នះបានមេដាយ សម្រាប់ការប្រកួតស៊ីហ្គេម ជាពិសេសស៊ីហ្គេម លើកទី៣២ ឆ្នាំ២០២៣ ដែលកម្ពុជា ត្រូវធ្វើជាម្ចាស់ផ្ទះ។
ខាងក្រោមនេះ ជាថិរវេលា ដែលកីឡាករ កីឡាការិនីជម្រើសជាតិកម្ពុជា ធ្វើបាន ទៅតាមប្រភេទវិញ្ញាសានីមួយៗ ដែលពួកគេ បានប្រឹងប្រែងប្រកួតប្រជែងរយៈពេល៥ថ្ងៃ នៅក្នុងការប្រកួតកីឡាហែលទឹកជ្រើសរើសជើងឯកពិភពលោក (អាងហែលទឹក២៥ម៉ែត្រ) នៅក្នុងទីក្រុងអាប៊ូដាប៊ី ប្រទេសអារ៉ាប់រួម។
ការប្រកួតថ្ងៃទី១
– អបអរសាទរ កីឡាករ ម៉ាត់ថេរ ហ្រ្វេងតារាបេននីឈី បានបំបែកកំណត់ត្រាថ្នាក់ជាតិ ក្នុងថិរវេលា ២:០០.៩៥នាទី លើប្រភេទវិញ្ញាសា ចម្ងាយ២០០ម៉ែត្រ ហែលរបៀបមេអំបៅ។
ការប្រកួតថ្ងៃទី២
– អបអរសាទរ កីឡាករ ម៉ាត់ថេរ ហ្រ្វេងតារាបេននីឈី បានបំបែកកំណត់ត្រាថ្នាក់ជាតិ ក្នុងថិរវេលា ៥៥.៦០នាទី លើប្រភេទវិញ្ញាសា ១០០ម៉ែត្រ ហែលរបៀបមេអំបៅ។
ការប្រកួតថ្ងៃទី៣
– អបអរសាទរ កីឡាករ មនត្រស ផានសុវណ្ណអារុន បានបំបែកកំណត់ត្រាថ្នាក់ជាតិ ក្នុងថិរវេលា ២៥.២៨ វិនាទី លើប្រភេទវិញ្ញាសា ៥០ម៉ែត្រ ហែលរបៀបសេរី។
– អបអរសាទរ កីឡាការិនី កាំង មុយនីន បានបំបែកកំណត់ត្រាថ្នាក់ជាតិ ក្នុងថិរវេលា ៣០.៧៧ វិនាទី លើប្រភេទវិញ្ញាសា ៥០ម៉ែត្រ ហែលរបៀបមេអំបៅ។
ការប្រកួតថ្ងៃទី៤
– លទ្ធផលបច្ចេកទេស របស់កីឡាការិនី ម៉ីលិតាន មីននិក ដែលបានប្រកួតលើប្រភេទវិញ្ញាសា ១០០ម៉ែត្រ ហែលរបៀបកង្កែប ធ្វើបានក្នុងថិរវេលា ១:១៩.៨៧ នាទី។
ការប្រកួតថ្ងៃទី៥
– អបអរសាទរ កីឡាការិនី កាំង មុយនីន បានបំបែកកំណត់ត្រាថ្នាក់ជាតិ ក្នុងថិរវេលា ២៨.៤២ វិនាទី លើប្រភេទវិញ្ញាសា ៥០ម៉ែត្រ ហែលរបៀបសេរី។
– អបអរសាទរ កីឡាករ មនត្រស ផានសុវណ្ណអារុន បានបំបែកកំណត់ត្រាថ្នាក់ជាតិ ក្នុងថិរវេលា ៥៥.៧១ វិនាទី លើប្រភេទវិញ្ញាសា ១០០ម៉ែត្រ ហែលរបៀបសេរី។
-អបអរសាទរ កីឡាការិនី ម៉ីលិតាន មីននិក បានបំបែកកំណត់ត្រាថ្នាក់ជាតិ ក្នុងថិរវេលា ១:០៨.៦៨ នាទី លើប្រភេទវិញ្ញាសា ១០០ម ហែលរបៀបមេអំបៅ។
បើតាមព័ត៌មាន ដែលបានបង្ហោះ នៅលើហ្វេសប៊ុកផ្លូវការរបស់សហព័ន្ធខ្មែរកីឡាហែលទឹក បានឱ្យដឹងថា ប្រតិភូ និងក្រុមអត្តពលិកទាំងអស់របស់កម្ពុជា និងត្រឡប់មកមាតុភូមិវិញ នៅថ្ងៃពុធនេះ៕
