ក្លិបបាល់ទាត់ណាហ្គាវើលដ៍ បានបន្តចែកផ្លូវជាមួយគ្រូជំនួយ និងគ្រូពេទ្យប្រចាំក្លិបនេះ ចំនួន២នាក់ ជាផ្លូវការហើយ កាលពីថ្ងៃអង្គារ ហើយក្លិបមួយនេះ ក៏បានបញ្ចប់កុងត្រាជាមួយខ្សែប្រយុទ្ធម្នាក់ផងដែរ ប៉ុន្តែមិនទាន់បានប្រកាស ការនាំចូលអ្នកចំណូលថ្មី មកជំនួសទីតាំងនេះ នៅឡើយទេ។
«ក្លិបបាល់ទាត់ណាហ្គាវើលដ៍ សូមជូនដំណឹងទៅដល់អ្នកគាំទ្រ និងអ្នកសារព័ត៌មានឱ្យបានជ្រាបអំពីដំណឹង នៃការសម្រេចចែកផ្លូវគ្នា ជាមួយលោកគ្រូពេទ្យប្រចាំក្លិប ស្រេង ហុង ក្លិបសូមជូនពរឱ្យលោកគ្រូ ហុង ជួបសំណាងល្អ និង ទទួលបានជោគជ័យក្នុងអាជីពបន្តទៀត អរគុណចំពោះការមើលថែទាំកីឡាករកន្លងមកនេះ»។
នេះជាសេចក្តីប្រកាសរបស់ក្លិបណាហ្គាវើលដ៍ ដែលបានបញ្ជាក់ពីការចែកផ្លូវជាមួយលោកគ្រូពេទ្យ ស្រេង ហុង កាលពីថ្ងៃអង្គារ ម្សិលមិញ ហើយជាមួយគ្នានេះ ណាហ្គាវើលដ៍ ក៏បានជូនដំណឹង ពីការសម្រេចចែកផ្លូវគ្នា ជាមួយគ្រូជំនួយលោក ចាយ សង្ហា កាលពីម្សិលមិញនោះផងដែរ។
តាមរយៈការប្រកាសនេះ អាចបញ្ជាក់បានថា ក្លិបណាហ្គាវើលដ៍ គិតមកដល់ពេលនេះ បានចែកផ្លូវជាមួយគ្រូបង្វឹក២នាក់ និងគ្រូពេទ្យប្រចាំក្លិប១នាក់ ខណៈគ្រូបង្គោលលោក មាស ចាន់ណា ត្រូវបានក្លិបមួយនេះ ប្រកាសពីការមិនបន្តកុងត្រា ដោយចម្រូងចម្រាស មុនគេ កាលពីចុងខែតុលា ឆ្នាំ២០២១។
ជាមួយគ្នានេះ ណាហ្គាវើលដ៍ ក៏បានចែកផ្លូវជាមួយខ្សែប្រយុទ្ធរបស់សាធារណរដ្ឋម៉ុលដាវី Leuca Petru ផងដែរ ដែលបានឡើង កាលពីថ្ងៃចន្ទ ប៉ុន្តែក្រុមមួយនេះ នៅមិនទាន់ឃើញ នាំយកអ្នកចំណូលថ្មី មកជំនួសទីតាំងទាំងនេះ នៅឡើយទេ ចំណែកលោក គង់ ប៊ុនសៀង ជាមនុស្សដំបូង ដែលណាហ្គាវើលដ៍ បាននាំចូលមក ដើម្បីធ្វើជាអ្នកចាត់ការទូទៅនៃសាលាបាល់ទាត់ ណាហ្គាវើលដ៍៕
