ក្លិបបាល់ទាត់ណាហ្គាវើលដ៍ បាននាំយកទាំងខ្សែប្រយុទ្ធ និងគ្រូចាំទី ជនជាតិប្រេស៊ីល ដើម្បីមកចូលរួមជួយក្រុម សម្រាប់ត្រៀមការប្រកួតលីគកំពូលកម្ពុជា រដូវកាលថ្មី ឆ្នាំ២០២២នេះ ដែលមានត្រឹម៨ក្រុម។
ណាហ្គាវើលដ៍ បានប្រកាសពីការនាំយកខ្សែប្រយុទ្ធ Roque Silveira Dos Santos, Cristian និងគ្រូចាំទី Soares Da Costa Osvaldo, Dida កាលពីថ្ងៃចន្ទ ម្សិលមិញ ហើយ
ការនាំយកកម្លាំងមកពីប្រេស៊ីលទាំង២ មកចូលរួមជាមួយក្រុមណាហ្គាវើលដ៍ នាពេលនេះ ត្រូវបានគេគិតថា ជាគំនិតផ្តួចផ្តើមរបស់ប្រធាននាយកបច្ចេកទេសរបស់ក្លិបមួយនេះ ដែលជាជនជាតិប្រេស៊ីល ដូចគ្នា។
តាមរយៈខ្សែវីដេអូខ្លី បានបង្ហាញឱ្យឃើញថាកីឡាករវ័យ២៦ឆ្នាំ Roque Silveira Dos Santos ឬហៅថា Cristian មានគុណភាពលេងល្អទាំងទៅលើល្បឿន ការអូសបាល់ និងការបញ្ចប់ទី ដោយរូបគេមានកម្លាំងជើងខ្លាំង អាចស៊ុតបាល់ចេញពីក្រៅតំបន់គ្រោះថ្នាក់ បានយ៉ាងមានប្រសិទ្ធភាព។
ខ្សែប្រយុទ្ធ Cristian មិនធ្លាប់ចេញទៅប្រកបអាជីព នៅក្រៅប្រទេសនោះទេ ព្រោះក្លិបទាំងអស់ ដែលរូបគេធ្លាប់លេងឱ្យកន្លងមក សុទ្ធតែមានមូលដ្ឋាន នៅប្រទេសប្រេស៊ីល ហេតុនេះកម្ពុជា គឺជាប្រទេសដំបូងគេ ដែល Cristian ត្រូវប្រកបអាជីពបាល់ទាត់ នៅក្រៅប្រទេស។
ជាមួយគ្នានេះ Cristian ក៏ជាកីឡាករបរទេសចុងក្រោយ សម្រាប់លេងឱ្យណាហ្គាវើលដ៍ នៅរដូវកាលនេះផងដែរ ជាមួយបរទេស៣នាក់ទៀត រួមមានកីឡាករជប៉ុន Fumiya Kogure ខ្សែការពាររបស់អេស្ប៉ាញ Manuel Herrera López និងខ្សែប្រយុទ្ធប្រេស៊ីល DA CRUZ GUARDLANO ELIEL ព្រោះរយៈពេលប៉ុន្មានចុងក្រោយនេះ ណាហ្គា បានចុះកិច្ចសន្យាយកកីឡាករបរទេសត្រឹម៤នាក់ប៉ុណ្ណោះ គឺតិចជាងកូតា បានកំណត់ ដែលក្លិបមួយ អាចមានកីឡាករបរទេស៥នាក់៕